Krištuš nazvešča svoje raspinjanje. Židovi drže tolnač proti njemu. Njegvo namazanje. Judaš kani ga izdati. Jeđenje vuzmenoga janjčeca i naređenje presvetoga oltarskoga sakramenta. Ježuš naprvo poveda Petrovo zatajenje, ide na Olivetansku goru, izdaje se od Judaša i vodi se pred Kajfaša. Peter zataja njega i čini pokoru.
- I včinjeno je kad bi Ježuš vsa ova govorenja bil dokončal, rekel je svojem vučenikom:
- „Vi znate da za dvemi dnevi bude Vuzem i Sin Človečji bude izdan da se raspne.“
- Onda se skup spravili jesu aldovnički poglavari i starešine ljudstva vu dvor aldovničkoga poglavnika koj se je zval Kajfaš.
- I držali jesu tolnač kak bi Ježuša z prevarum vlovili i vmorili.
- Rekli su pako: „Ne na svetečni dan da morebiti med ljudstvom kakva zmutnja ne nastane.“
- Kad bi pako bil Ježuš vu Betaniji, vu hiži gubavoga Šimuna,
- pristupi k njemu nekoja žena koja vu posudi iz alabaštra je imala drage masti i zleje ju njemu na glavu kad bi pri stolu bil sedel.
- Kad bi pako to vučeniki bili videli, jadili se jesu govoreči: „K čemu je taj zgubiček?
- Ar ta mast bi se bila mogla drago prodati ter siromakom podeljiti.“
- Pokehdob pako da je to Ježuš znal, reče njim: „Zakaj ste neprilični ovoj ženi? Ar ona je dobro delo nad menum zvršila.
- Ar siromake imate vsigdarz sobum, mene pako vsigdar nemate.
- Kajti da je ona ovu mast na moje telo zlejala, to je ona na moje pokapanje včinila.
- Stanovito velim vam: gde se goder ov evangelijum po celem svetu bude nazveščal, bude se njoj na spomenek govorilo kaj je ona včinila.“
- Ondaodide jeden zmed dvanajsteh koj se je zval Judaš Iškariot k aldovničkem poglavnikom
- i reče njim: „Kaj mi hočete dati i ja vam ga izdam?“ A oni su njemu obečali trideset srebrnjakov.
- I od ovoga časa je iskal priliku da bi njega predal.
- Prvi pako dan Nekvasneh kruhov pristupili su k Ježušu vučeniki govoreči: „Gde hočeš da ti vuzmeno janje k jelu pripravimo?“
- Ježuš pako reče: „Hote vu varaš k nekomu i recite njemu: ʻMešter veli: moj čas je blizu, pri tebi hoču Vuzem z mojemi vučeniki držati.ʼ“
- I vučeniki jesu včinili tak kak je njim Ježuš zapovedal i pripravili su vuzmeno janje.
- Kad bi pako večer bil nastal, sel je k stolu z svojemi dvanajstemi vučeniki.
- I kad bi jeli, reče: „Stanovito velim vam da me jeden zmed vas bude izdal.“
- I kruto se jako jesu ražalostili i vsaki zmed njih je počel govoriti: „Gospone, jesem li ja?“
- A on odgovori i reče: „Koj z menum ruku zamače vu zdelu, on me bude izdal.
- Sin Človečji doisto ide kak je od njega pisano, ali jaj onomu človeku po kojem se Sin Človečji bude izdal: njemu bi bolje bilo da se on človek ne bi bil rodil.“
- Judaš pako, koj ga je izdal, odgovori i reče: „Rabi, jesem li ja? “, a on reče njemu: „Ti si rekel.“
- Kad bi pako večerjali, vzeme Ježuš kruh, blagoslovi ga, prelomi i podelji svojem vučenikom i reče: „Vzemite i ječte, ovo je moje telo.“
- Vzel je pako i kelih i kad bi bil zahvalil, dal je njega njim govoreči: „Pite vsi iz njega
- ar ovo je moja krv novoga Zakona koja se bude za vnoge na otpuščenje grehov prelejala.
- Velim pako vam da od vezda ne budem pil od ovoga trsnoga ploda tja do onoga dneva kad budem pil z vami novoga vu Kraljestvu mojega Oca.“
- I kad bi z pesmum bili zahvalili, izišli su van na Olivetansku goru.
- Onda reče njim Ježuš: „Vi se ovu noč vsi budete nad menum spačili. Ar je pisano: ʻVudrim pastira i rastepeju se ovce črede.ʼ
- Potlam pako, kad se od mrtveh gore stanem, budem pred vami išel vu Galileju.“
- Peter pako odgovori njemu i reče: „I ako se nad tobum vsi spačiju, ja se nigdar ne spačim.“
- Veli njemu Ježuš: „Stanovito govorim tebi da me ovu noč, prvlje nego pevec zapopeva, trikrat zatajiš.“
- Reče njemu Peter: „Da bi ja z tobum istom vumreti moral, tak te vendar ne zatajim.“ Ravno tak jesu i vsi ostali vučeniki govorili.
- Onda dojde Ježuš z njimi vu ves koja se zove Getsemani i reče svojem vučenikom: „Sedite ovde dok odidem tam ter se pomolim.“
- I vzeme z sobum Petra i dva Zebedejuševe sine i počel je žalosten i turoben postajati.
- Onda reče njim: „Moja duša je turobna tja do smrti: potrpete ovde i skoznujte z menum.“
- I odide nekuliko dalje i opade na svoj obraz moleči i govoreči: „Moj Otec, ako je moguče, tak me naj mine ov kelih. Ništar manje ne kak ja hoču, nego kak ti.“
- I dojde k svojem vučenikom i najde nje speče i reče Petru: „Tak neste mogli niti jednu vuru z menum skoznuvati?
- Skoznujte i molete da ne prepadnete vu skušavanje. Duh je doisto pripraven, ali telo je slabo.“
- Ipak drugoč odide i moli govoreči: „Moj Otec, ako me ne more minuti ov kelih, nego da ga pijem, naj se spuni tvoja volja!“
- I dojde ipak i najde nje speče ar su bile njihove oči žmehke.
- I ostavi nje ter ipak odide i tretjič moli one iste reči govoreči.
- Onda dojde k svojem vučenikom i reče njim: „Spete samo i počivajte. Nut, približala se je vura i Sin Človečji bude izdan vu ruke grešnikov.
- Stanite se, hodmo! Nut, blizu je on koj me bude izdal.“
- Dok bi on jošče govoril, nut, Judaš, jeden zmed dvanajsteh, je došel i z njim velika vnožina z meči i oščeki, poslani od aldovničkeh poglavarov i starešin ljudstva.
- On pako koj je njega izdaval, dal je njim znamenje govoreči: „Kojega goder kušnem, on je, njega primite.“
- I taki pristupi k Ježušu i reče: „Zdravo, mešter!“ I kušnul je njega.
- Ježuš pako reče njemu: „Prijatel, zakaj si došel?“ Onda su pristupili i na Ježuša ruke vrgli ter njega zgrabili.
- I, nut, jeden zmed oneh koji su bili z Ježušem pretegne ruku, spukne svoj meč i vudri slugu aldovničkoga poglavara ter mu odseče vuho.
- Onda reče njemu Ježuš: „Zatekni tvoj meč vu svoje mesto. Ar vsi koji prijemlju meč, od meča pogiblju.
- Štimaš li da ne morem prositi mojega Oca i pošle mi vezdaj več kak dvanajst šeregov angelov?
- Kak bi se anda spunila Pisma, pokehdob da tak mora biti?“
- Vu onoj pako vuri reče Ježuš vnožinam: „Izišli ste van kakti na tolvaja z palaši i kihačami lovit mene. Ja sem vsaki dan pri vas sedel i vu Cirkvi vučil ter me neste prijeli.“
- Vse pako to je včinjeno da se ispuniju pisma prorokov. Onda su njega vsi vučeniki ostavili i pobegli.
- Oni pako koji su Ježuša prijeli, otpeljali su ga k Kajfašu, velikomu aldovniku, gde se jesu bili skup spravili pisci i starešine.
- Peter pako je njega zdalka nasleduval tja vu dvor aldovničkoga poglavara. I kad bi nuter bil zašel, sel si je k dvorjanikom da bi videl konec.
- Poglavari pako aldovnički i vse spravišče iskali su proti Ježušu krivo svedočanstvo da bi ga na smrt predali
- i nesu našli akoprem je vnogo kriveh svedokov naprvo došlo. Zadnjič pako došli su dva krivi svedoki
- i rekli su: „Ov je rekel: ʻJa morem Cirkvu Božju porušiti i nju za tremi dnevi nazad zezidati.ʼ“
- Onda se podigne veliki aldovnik i reče njemu: „Nikaj ne odgovarjaš na ova koja proti tebi svedočiju?“
- Ježuš pako je mučal. I veliki aldovnik reče njemu: „Zaklinjem te z živem Bogom da nam poveš je li jesi ti Krištuš, Sin Božji?“
- Reče njemu Ježuš: „Ti si rekel. Ništer manje velim vam da od vezda budete videli Sina Človečjega sedeti na desnici Božje mogučnosti i dojti vu nebeskeh oblakih.“
- Onda je veliki aldovnik svoje svite rastrgal govoreči: „On je blaznil. Kaj nam je više potrebno svedokov? Nut, sada ste čuli blaznost.
- Kaj se vam vidi?“ A oni odgovorivši rečeju: „Vreden je smrti.“
- Onda su oni pljuvali vu njegov obraz i pljuskali njega. Drugi pako jesu z peščami njegvo lice tukli
- govoreči: „Poveđ nam, Krištuš, gdo je koj te je vudril?“
- Peter pako je sedel vani na dvorišču i pristupi k njemu nekoja dekla govoreča: „I ti si bil z Ježušem Galilejanskem.“
- On pako je tajil pred vsemi govoreči: „Ja ne znam kaj govoriš.“
- Kad bi pako on čez vrata van bil išel, zagleda ga druga dekla i reče onem koji su bili onde: „I ov je bil z Ježušem Nazarenskem.“
- Ipak je tajil z prisegum: „Ja ne poznam toga človeka.“
- I za kratek čas pristupiju oni koji su onde stali i rečeju Petru: „Zaisto, i ti jesi jeden zmed oneh ar i tvoje govorenje tebe očivesnoga čini.“
- Onda se je počel preklinjati i prisigati da ne pozna toga človeka. I sproti je pevec zapopeval.
- I spomenul se je Peter iz Ježuševe reči koju je bil rekel: „Prvlje nego pevec zapopeva, trikrat me zatajiš.“ I izišel je van i žuhko se je plakal.
