Krištuš vodi se pred Pilatuša. Judaševo zdvojenje. Ježuš pred Pilatušem. Barabaš razbojnik pretpostavlja se Ježušu koj se z trnjem koruni i pšani, na Kalvariju pelja i med dvemi tolvaji raspne. Za tmicum, koja je tri vure trpela, spušča on svu dušu. Čuda po njegvoj smrti. Jožef od Arimateje pokapa njega, grob se straži.
- Kad bi pako jutro bilo nastalo, držali su vsi poglavari aldovnički i starešine ljudstva tolnač proti Ježušu da bi ga na smrt predali.
- I zvezanoga jesu dopeljali i predali poglavaru Poncijušu Pilatušu.
- Onda kada bi bil videl Judaš, koj ga je izdal, da je opsuđen, je se kajal i nazad donesel oneh trideset srebrnjakov poglavarom aldovničkem i starešinam
- govoreči: „Ja sem pregrešil pokehdob da sem izdal nedužnu krv.“ Oni pako jesu rekli: „Kaj je nam zato? Ti budi videl.“
- On pako hiti te srebrnjake vu Cirkvu, obrne se, odide i obesi se za vužinec.
- Poglavari pako aldovnički vzeli su te srebrnjake i rekli: „Nje ni slobodno dati vu cirkvenu ladicu ar je krvi cena.“
- Poklamkam bi pako tolnač bili držali, kupili su za nje polje nekojega lončara na pokapanje putnikov.
- Zbog toga se zove ono polje Haceldama, to je ‘Krvno polje’, tja do denešnjega dneva.
- Onda se je spunilo kaj je bilo rečeno po Jeremijašu proroku govorečem: „I oni su vzeli trideset srebrnjakov, cenu precenjenoga, kojega su oni od izraelskeh sinov kupili
- i dali su nje za polje nekojega lončara, kak je meni Gospon zapovedal.“
- Ježuš pako je stal pred poglavarom i opita ga poglavar govoreči: „Ti li si kralj židovski?“ Reče njemu Ježuš: „Ti veliš.“
- I kad bi ga poglavari aldovnički i starešine bili tužili, nikaj ni odgovoril.
- Onda reče njemu Pilatuš: „Je li ne čuješ kulika proti tebi govoriju svedočanstva?“
- I on mu ni na ni jednu reč odgovoril tak da se je poglavar jako začudil.
- K dnevu pako svetečnemu je bil poglavar navaden ljudstvu spustiti jednoga vuznika kojega bi oni hoteli.
- Imal je pako za onda jednoga glasovitoga vuznika koj se je zval Barabaš.
- Kad bi se anda bili skup spravili, reče Pilatuš: „Kojega hočete da vam spustim, Barabaša ali Ježuša koj se zove Krištuš?“
- Ar je znal da su ga bili po jalu izdali.
- Kad bi pako on na sudbenem stolcu bil sedel, poslala je k njemu njegva žena govoreča: „Nikaj se ne pačaj vu onega pravičnoga ar ja sem denes zbog njega vu snu vnogo trpela.“
- Poglavari pako aldovnički i starešine jesu vputili ljudstvo da bi naj prosili Barabaša, Ježuša pako naj bi pogubili.
- Poglavar pako odgovori i reče njim: „Kojega hočete da vam zmed dveh spustim?“ A oni su rekli: „Barabaša!“
- Reče njim Pilatuš: „A kaj budem včinil z Ježušem koj se zove Krištuš?“
- Oni su vsi rekli: „Naj se raspne!“ Reče njim poglavar: „A kaj je zla včinil?“ Ali oni su jošče jakše kričali govoreči: „Naj se raspne!“
- Kad bi pako Pilatuš bil videl da nikaj ne more opraviti, dapače, da vekše zburkanje nastaje, vzeme vode ter si ruke pred ljudstvom opere govoreči: „Ja sem čist od krvi ovoga pravičnoga. Vi videte.“
- I vse ljudstvo je odgovorilo i reklo: „Njegva krv naj dojde zvrhu nas i zvrhu našeh sinov!“
- Onda je njim pustil Barabaša, Ježuša pako zbičuvanoga je njim predal da bi se raspel.
- Onda su poglavarevi vojniki vzeli Ježuša z sobum na večnicu i skupili su k njemu vsega šerega.
- I kad bi ga bili slekli, odeli su ga z škrlatnem plaščom.
- I korunu iz trnja spletenu postavili su njemu na glavu, a trstiku vu njegvu desnu ruku. I poklekavali su pred njim i pšanili njega govoreči: „Zdravo, kralj židovski!“
- Takaj su pljuvali vu njega i trstiku vzimali ter njega z njum po glavi tukli.
- I kad bi ga bili opšanili, slekli su njemu plašč i oblekli ga vu njegvu opravu ter otpeljali da ga raspneju.
- Kad bi pako van bili izišli, našli su nekojega človeka cirenenskoga imenom Šimun, ovoga su prisilili da bi nesel njegov križ.
- I došli su na mesto koje se zove Golgota, to je ‘Mrtvačkeh glav mesto’.
- I dali su mu piti vino z žučjum zmešano. I kad bi bil pokušal, neje hotel piti.
- I poklamkam bi njega bili raspeli, razdeljili su si njegve oprave hitajuč zvrhu njih kocke da bi se spunilo kaj je rečeno po proroku govorečem: „Razdeljili su si moje oprave i zvrhu moje halje jesu hitali kocke.“
- I oni se jesu vseli ter njega stražili.
- Zvrhu njegve pako glave jesu nastavili zrok njegve smrti napisan: „Ovo je Ježuš, kralj židovski.“
- Onda su bili z njim dva tolvaji raspeti, jeden iz desna, a drugi iz leva.
- Oni pako koji su prehađali, jesu ga preklinjali i z svojemi glavami nakimavali
- i govorili: „O, ti, koj rušiš Cirkvu Božju i za tremi dnevi ju nazad zeziđeš, pomozi sam sebi: ako si Sin Božji, izidi dole iz križa!“
- Ravno tak su ga pšanili poglavari aldovnički skupa z pisci i starešinami govoreči:
- „On je drugem pomagal, a sam sebi ne more pomoči. Ako je kralj izraelski, tak naj sada izide dole iz križa i mi budemo njemu veruvali.
- On se je ufal vu Boga naj ga oslobodi sada ako hoče ar je rekel: ʻJa jesem Sin Božji!ʼ.“
- To isto pako jesu njemu spočitavali takaj tolvaji koji su bili z njim raspeti.
- Od šeste pako vure tja do devete je nastala tmica po vsoj zemlji.
- I okolo devete vure zakriči Ježuš z velikem glasom govoreči: „Eli, Eli, lamma sabacthani?“ To je: ‘Moj Bože, moj Bože, zakaj si me zapustil?’
- Nekoji pako koji su onde stali i to čuli, rekli su: „Ov zove Elijaša.“
- I sproti jeden zmed njih odrči, vzeme gubu, napuni ju z octom i natekne na trstiku ter mu je daval piti.
- Ti drugi pako jesu rekli: „Pusti da vidimo je li dojde Elijaš njega oslobodit.“
- A Ježuš ipak zakriči z velikem glasom i spusti dušu.
- I, nut, zastor cirkveni je se raspuknul na dve strani odzgor tja do dole i zemlja se je gibala i pečine su popucale.
- I grobi se jesu otprli i vnoga tela sveteh koja su počivala jesu gore stala.
- I kad bi po njegvem gorestajanju iz svojeh grobov van bila izišla, došla su vu sveti varaš i vnogem se jesu iskazala.
- Kad bi pako stotnik i oni koji su z njim bili i stražili Ježuša, bili videli potres zemlje i ona koja su bivala, jako se jesu bojali govoreči: „Zaisto, ov je bil Sin Božji.“
- Bilo je pako onde vnogo žen koje su zdalka gledale i Ježuša od Galileje nasleduvale da njemu dvoriju.
- Med kojemi je bila Marija Magdalena i Marija, Jakopova i Jožefova mati, i mati Zebedejuševih sinov.
- Kad bi pako večer bil nastal, došel je nekoj bogat človek iz Arimateje varaša, imenom Jožef, koj je takaj sam vučenik Ježušev bil.
- Ov je išel k Pilatušu i prosil ga je za Ježuševo telo. Onda je zapovedal Pilatuš dati telo.
- Jožef pako vzeme telo ter je zavije vu čisto platno.
- I položi je vu svoj novi grob kojega je bil iz pečine isekel. I zavalil je velik kamen pred vrata groba i odišel.
- Bila je pako onde Marija Magdalena i druga Marija koje su naproti grobu sedele.
- Drugi pako dan, koj je bil za pripravlanja dnevom, skup se spravili jesu poglavari aldovnički i farizejuši k Pilatušu
- govoreči: „Gospone, mi smo se spomenuli da je on spačitel jošče za sebe živoga rekel: ʻZa tremi dnevi ipak se gore stanem.ʼ
- Zapoveđ anda stražiti grob do tretjega dneva da morebiti ne dojdu njegvi vučeniki i vkradneju njega ter rečeju ljudstvu: ʻStal se je od mrtveh!ʼ I bude poslednja smutnja gorša od prve.“
- Reče njim Pilatuš: „Imate stražu, hote, stražete kak znate.“
- Oni pako jesu odišli, opstrli grob z stražami i zapečatili kamen.
