Gorestajanje Ježuševo. Angel nazvešča svetem ženam gorestajanje, dapače se sam Ježuš njim iskažuje. Straža se podmičuje od velikeh aldovnikov. Ježuševo iskazanje vu Galileji. Poslanje apoštolsko i vtemelenje nevkanljivoga Cirkvenoga vučeništva.
- Po soboti pako, kak je prvi dan tjedna osvenul, došla je Marija Magdalena i druga Marija videt grob.
- I, nut, nastal je veliki zemlje potres. Ar angel Gosponov je iz nebes dole stupil i pristupivši odvalil je kamen i sel si je na njega.
- Pogled pako njegov je bil kakti blisk, a njegve svite bele kakti sneg.
- Od straha pako pred njim jesu se splašili stražani i postali su kakti mrtvi.
- Angel pako odgovori i reče ženam: „Vi se najte bojati ar ja znam da vi iščete Ježuša koj je raspet.
- Ni ga ovde ar je gore stal kak je rekel. Hote i poglejte mesto gde je bil položen Gospon.
- I hitro hote ter povečte njegvem vučenikom da je gore stal i, nut, pred vami ide vu Galileju: onde ga budete videli. Nut, ja jesem vam naprvo povedal.“
- I izišle su hitro iz groba z strahom i velikem veseljem bežale su nazveščat njegvem vučenikom.
- I, nut, Ježuš je nje zestal govoreči: „Da ste zdrave!“ One pako jesu pristupile i objele njegve noge i njemu jesu vklanjale.
- Onda reče njim Ježuš: „Najte se bojati! Hote, nazvestete mojem bratom da naj idu vu Galileju, onde me budu videli.“
- Koje kad bi bile odišle, nut, nekoji zmed stražanov jesu došli vu varaš i nazvestili su poglavarom aldovničkem vsa koja su bila včinjena.
- Ovi se pako jesu skup zebrali z starešinami i poklamkam bi bili tolnač držali, dali su vojnikom obilno penez
- govoreči: „Recite da su njegvi vučeniki v noči došli i njega vkrali dok smo mi spali.
- I ako to bude čul poglavar, mi ga nagovorimo ter vas segurne včinimo.“
- Oni su anda vzeli peneze i včinili kak su bili podvučeni. I razglašena je ova reč med Židovmi, tja do denešnjega dneva.
- Oni pako jedenajst vučeniki jesu odišli vu Galileju na goru, kak je njim zapovedal Ježuš.
- I kad bi ga videli, njemu se jesu vklanjali, nekoji pako jesu dvojili.
- I pristupi Ježuš i reče njim govoreči: „Meni je dana vsa oblast na Nebu i na Zemlji.
- Hote anda, vučete vse narode i krstete nje vu ime Oca i Sina i Duha Svetoga.
20. I vučete nje obdržavati vsa koja god jesem vam zapovedal. I, nut, ja jesem z vami vse dneve, tja do skončanja sveta.“
