Svetoga Januša apoštola list prvi

Koji duhi jesu od Boga i koji nesu; buduč da je nas Bog z ljubavjum pretekel davši za nas svojega Sina, tak i mi moramo ljubiti Boga i bližnjega, zvršena pako ljubav nema straha.

Preljubljeni, ne verujte vsakomu duhu,^* nego zveđajte duhe^* je li jesu iz Boga^* ar je vnogo kriveh prorokov izišlo na svet.
Iz toga se spoznaje Božji Duh^*: vsaki duh koj valuje da je Ježuš Krištuš došel vu telu je iz Boga.^*
I vsaki duh koj razmeče Ježuša^* ni iz Boga i ov^* je Antikrst^* od kojega jeste vi čuli da je došel i on je vre sada na svetu.
Vi jeste iz Boga, dečica, i jeste njega obladali^* ar on koj je vu vas, je vekši kak koj je na svetu.^*
Oni jesu od sveta^* zato govoriju od sveta i svet nje posluša.
Mi jesmo iz Boga.^* Koj pozna Boga, posluša nas, koj ni iz Boga, ne posluša nas. Iz toga spoznajemo duha istine i duha bljudnosti.^*
Preljubljeni, ljubemo se med sobum^* ar ljubav je iz Boga^* i vsaki koj ljubi, je iz Boga rođen i pozna Boga!
Koj ne ljubi, ne pozna Boga ar Bog je ljubav.
Vu tom se Božja ljubav proti nam iskazala da je Bog svojega jedinorođenoga Sina poslal na svet da mi po njem živemo. Jan 3,16.
Vu tom stoji ljubav: ne da mi jesmo Boga ljubili, nego da je on nas prveši ljubil i poslal svojega Sina na pomirenje za naše grehe. Gore 2,2.
Preljubljeni, pokehdob da je nas Bog natuliko ljubil, tak se i mi moramo med sobum ljubiti.
Boga ni nigdar nigdo videl. Ako se pako med sobum ljubimo, tak Bog ostaje vu nas i njegva ljubav je vu nas zvršena.^*
Po tom spoznajemo da mi vu njem prebivamo i on vu nas pokehdob je nam on od svojega Duha dal.^*
I mi jesmo to videli i svedočimo to da je Otec poslal svojega Sina kakti zveličitela sveta.
Koj goder valuje da Ježuš je Božji Sin, vu njem ostaje Bog i on vu Bogu.^*
I mi jesmo spoznali i veruvali ljubav koju Bog ima proti nam. Bog je ljubav i koj ostaje vu ljubavi, on ostaje vu Bogu i Bog je vu njem.
Po tom je Božja ljubav pri nas zvršena ako mi, kak je on, ravno tak jesmo na svetu,^* tak da mi na Dan suda moremo imati zaufanost.^*
Vu ljubavi ni straha,^* nego zvršena ljubav izganja strah ar strah ima muku^*, koj se pako boji, neje vu ljubavi zvršen.
Ljubemo anda Boga ar Bog je nas prveši ljubil.^*
Ako gdo reče: „Ja ljubim Boga“, svojega pako brata odurjava, on je lažec. Ar koj ne ljubi svojega brata kojega vidi, kak more ljubiti Boga kojega ne vidi?^*
Takaj ovu zapoved imamo od Boga da on koj ljubi Boga, naj ljubi takaj svojega brata. Jan 13,34;15,12; Efez 5,2.

Objašnjenje

*
Vsakomu navučitelu, vsakomu navuku. ↩︎
*
Poleg navuka koj je vam nazveščen (red 6.). Božja reč, kak se vu Cirkvi vuči i čuva, je skusni kamen vsakoga navuka. ↩︎
*
Je li imaju svoj začetek iz istine, je li istinska opčuju. ↩︎
*
Iz toga se spoznaje je li gdo iz Božjega duha, iz istine govori ako valuje da itd. ↩︎
*
Koj valuje da je Sin Božanski (Mat 26,63) človečansku naravu na se vzel ter se vu Ježušu Nazarenskem na Zemlji iskazal, je pravi božanski navučitel. Januš ima pred očmi krive navučitele koji jesu pravu človečansku Krištuša naravu tajili ali od Ježuševoga nazočibitja na Zemlju dvojili. ↩︎
*
Koj ali njegvu človečansku naravu i poslanje ali njegvu božansku čast ali vu opčinskem potreboču njegvoga otkuplenja posla taji. Drugi tolnačiju: koj Ježuša luči, to je: koj taji da Ježuš od Nazareta je obečani božanski Mesijaš (gore 2,22). ↩︎
*
Duh. ↩︎
*
Ne vu osobi, vre pako vu duhu vu svojeh prehodnikih. V. gore 2,18. ↩︎
*
Antikrsta, najmre one navučitele koji se kakti njegvi prehodniki vu njegvem namenenju podižeju. ↩︎
*
Ar Božji duh koj vas oživljuje daje vam moč, ako li neg njemu verni ostanete, duha Antikrstovoga, njegve vkanljive navuke i temelji obladati i vu njihovoj niščetnosti spoznati. ↩︎
*
Goniju se od duha nasladnostih i poželenj. ↩︎
*
Mi apoštoli jesmo božanskoga namenenja. ↩︎
*
Koj ima božansko namenenje, pravo spoznanje Boga, posluša apoštolski navuk, koj ima svetska namenenja, neče naše navuke poslušati. Iz ovoga poslušanja ali neposlušanja spoznajemo koj se goni od duha Istine i koj od duha bljudnosti. ↩︎
*
Apoštol prehađa na ljubav kajti istinito preporođeni nema samo pravo spoznanje, nego takaj primerno čini, to je ljubi ar ljubav je duša činenja i vu njoj se vse kreposti zjediniju. ↩︎
*
Ar ljubav je sad preporođenja, božanskoga detinstva. ↩︎
*
Nevidljivomu Bogu ne moremo njegvu ljubav zraven po povračnoj ljubavi nadomestiti, ako se pako med sobum ljubimo, tak njega vu njegvoj spodobi nezraven ljubimo, mi ostajemo z njim vu opčinstvu i ovak naša ljubav proti njemu samomu stigava svoju zvršenost. ↩︎
*
Pokehdob da je nam pravo spoznanje (veru) i pravu ljubav dal, kak to sledeči red razlaguje ter primerom reda 14., 15. zjedinenje z Bogom visi od spoznanja, a primerom 16. od ljubavi. ↩︎
*
Vera vu Ježuša Krištuša, Sina Božanskoga, stoji za vsu krščansku veru ar vu Ježušu ne da se nikaj lučiti i on ne veruje istinito vu njega koj ne veruje vse kaj je on vučil i kaj njegvi namesniki, apoštoli i biškupi, kakti njegov navuk jesu predali. ↩︎
*
Ravno tak ljubimo bližnjega kak je on nas ljubil ako ljubimo, kak je on ljubil. V. gore pasku 16. ↩︎
*
Neboječ se nikakve kaštige. ↩︎
*
Najmre sužni strah pred kaštigum kajti ljubeči ni velik grešnik, posledno se niti nikakve kaštige nema bojati. Suprotivno pako, z ljubavjum zvršeno se slaže dečinski strah ljubleni predstavek zbantuvati, dapače ona sama je taj strah. ↩︎
*
Ar strah je čutenje stisku zavdavajuče pred kaštigum pokehdob se z ovum ljubečemu ne nagraža, tak anda pri ljubavi ne more ovakov strah biti. ↩︎
*
I ovu ljubav očitujmo vu ljubavi bližnjega. ↩︎
*
Ar gdo svojega brata koj je Božje dete, Božja spodoba (dole 5,1) vu kojoj Bog takrekuč je vidljiv postal, ne ljubi, kak bi se moglo veruvati da on nevidljivoga Boga ljubi, on samoga sebe vkanjuje i takaj druge vkanjuje ako on to potvrđava, je lažec. ↩︎