Svetoga Januša apoštola list prvi — Del III.

Od božanske proti nam ljubavi i kak se razlučavaju koji jesu od Boga i koji jesu od vraga; od ljubavi i mrzenja bratov; koj z čistum pametjum i verum vu Krištuša kaj goder od Boga prosi, zadobiva.

Gledajte kakvu nam ljubav je iskazal Otec da se mi Božja deca zovemo i jesmo. Zato nas svet ne pozna kajti njega ne pozna.^*
Preljubljeni, sada jesmo Božja deca, ali se jošče ni skazalo kaj budemo.^* Mi pako znamo da, kada se iskaže, budemo njemu spodobni ar mi budemo njega videli kak je.^*
I vsaki koj ovo ufanje vu njega postavlja, posvečuje se kak je i on svet.^*
Vsaki koj čini greh, čini i krivicu i greh je krivica.^*
I vi znate da se je on iskazal da grehe naše odneme i vu njem ni greha.^*
Vsaki koj vu njem ostaje, ne greši i vsaki koj greši, ni njega videl niti njega ni spoznal.^*
Dečica, ne dajte se od nikoga napeljati. Koj čini pravicu, je pravičen kak je i on pravičen.^*
Koj čini greh, je iz vraga^* ar vrag od početka greši, Sin pako Božji je se zato iskazal da zatere vražja dela.^*
Vsaki koj je iz Boga rođen, ne čini greh kajti vu njem njegvo seme ostaje i on ne more grešiti kajti je iz Boga rođen.^*
Vu tom se spoznavaju Božja deca i vražja deca. Vsaki koj ni pravičen, neje iz Boga i koj ne ljubi svojega brata^*
ar ovo je nazveščenje koje vi od početka jeste čuli da se med sobum ljubite, Jan 13,34; 15,
ne tak kak Kajn koj je bil iz Hudobnoga i vubil svojega brata.^* Pak zakaj je njega vubil? Kajti njegva dela jesu bila hmanja, njegvoga pako brata pravična.^*
Ne čudete se, bratja, ako vas svet odurjava.
Mi znamo da iz smrti jesmo prenešeni na živlenje ar ljubimo brate.^* Koj ne ljubi, on ostaje vu smrti.^*
Vsaki koj odurjava svojega brata, je ljudomorec,^* a vi znate da nijeden ljudomorec nema vekivečno živlenje opstojno vu sebi.^*
Vu tom jesmo Božju ljubav spoznali da je on za nas svoje živlenje položil^* i mi takaj moramo za brate živlenje položiti.
Koj ima ovoga sveta imetek ter vendar kada vidi da njegov brat trpi potreboču, zapira pred njim svoje srce ‒ kak ostaje vu njem Božja ljubav?^*
Moja dečica, ne ljubemo se z rečmi i jezikom, nego z činenjem i istinum!
Iz toga^* spoznajemo da mi jesmo iz istine^* i mi budemo vu njegvi nazočnosti vpokojili naša srca.
Ar ako nas kudi naše srce, Bog je jošče vekši nego je naše srce pokehdob vsa zna.^*
Preljubljeni, ako nas ne kudi naše srce, tak imamo zaufanost k Bogu
i budemo kaj goder prosimo od njega zadobili pokehdob njegve zapovedi obdržavamo i činimo ona koja se njemu dopadaju.
I ovo je njegva zapoved da verujemo vu ime njegvoga Sina, Ježuša Krištuša i da se med sobum ljubimo kak je on nam zapovedal.
I koj obdržava njegve zapovedi, ov ostaje vu njem i on vu njem i iz toga spoznajem da on vu nas ostaje, iz Duha kojega je on nam dal. Dole 4,13. Jan 14,23; Rim 8,9,1; Kor 12,3.

Objašnjenje

*
Svet nas ne spoznava za Božju decu, dapače, on nas prepoznaje, nas preganja, ali to vas naj ne zmuti, zrok toga vu tom leži kajti niti on ne pozna Boga. Da bi on nezmernu Boga svetost, ljubav i pravicu spoznal, tak bi on takaj dobro previdel da moramo vu velikoj držanja čistoči, krotenju i vu zevsema sebe aldujučoj ljubavi živeti ako hočemo njegvi biti. ↩︎
*
Vas svet takaj zato ne spoznaje kajti samo poleg zvunjskoga sudi, vi se pako vu zvunjskem jošče ne iskažujete kakti Božja deca vu božanski zmožnosti. ↩︎
*
Ali, akoprem krščenikov odičenost jošče sada je zakrita (Kol 3,3), tak vendar segurno znamo da kada se Krištuš pri svojem drugem došestku bude vu svojoj zmožnosti očivesto iskazal, mi njemu budemo vu očitoj odičenosti spodobni. Temelj anda naše odičenosti je sopstveno spoznanje koje mi od njega, od Boga imamo, koje se ipak nad našem nuternjem opčinstvom z njim, nad našum svetostjum temelji. To je: kajti mi primerom naše svetosti vu nuternjem opčinstvu z njim stojimo i njega zvršeno spoznajemo, zato takaj delniki postajemo njegve zmožnosti i blaženstva. Naša svetost i spoznanje jesu temelj naše odičenosti i blaženosti. ↩︎
*
Da anda cilj ove zmožnosti stignemo, mora se vsaki posvetiti kak je Ježuš svet. Apoštol sada pokažuje kak se greh z pravicum, z Ježušem pravičnem, z ostajanjem vu njem, z preporođenjem iz Boga zevsema ne slaže. ↩︎
*
Pravičnomu biti, prav vređenomu biti, tak da se naš duh Bogu, naše telo duhu podlaže, je naš cilj (V. Jan d. p. 7). Ov cilj ne stigavamo niti ne zdržavamo ako grešimo ar greh zatira red, pravedni stališ vu nas pokehdob on osavlanje duha proti Bogu, tela suproti duhu zrokuje ter ovak ono samo postaje greh. Anda greh se ne slaže z pravičnostjum koju bi morali imati. Ova se takaj ne slaže z zavezom vu kojem mi z Ježušem stojimo kak sada sledi. ↩︎
*
Ježuš je prezgrešni grehov zatritel vu kojem mi vu opčinstvu stojimo: kak bi anda smeli grešiti? ↩︎
*
Takaj opčinstvo z Ježušem, druženje z njim po veri, ufanju i ljubavi postavlja naprej da ne grešimo. Ar vu njem ostajati i grešiti, to ne more skupa stati. Koj po veri i ljubavi pri njem ostaje, on ne greši i vsaki koj greši, ob času kada je zagrešil, ni bil prav z njim združen, ni imal pravo spoznanje od njega kajti njegvo spoznanje ni nikakov sad pravice doprinesel. Koj bi njegvu nezmernu ljubav vsevdilj pred očmi imel, ne bi mogel grešiti. Zato veli sveti Bazilijuš: „Krščenikov posel je Gospona vsevdilj pred očmi imati.“ ↩︎
*
Ne dajte se od kriveh navučitelov napeljati: samo koj pravo čini je pravičen i spodoben Ježušu, Pravičnomu. ↩︎
*
Koj čini greh, je jednak vragu, je z vragom jednakoga bitja, je istom vražje dete. V. Jan 8,44. Dole 12. ↩︎
*
Ar grešiti je vražji posel, vre od negda, ali pri Sinu Božjem nahađa se ravno suprotivno ar on je došel vražje delo zatrti, koj je anda Krištušev, on ne sme grešiti. ↩︎
*
Vsaki koj se nahađa vu stališu preporođenja, vu stališu milošče, ne čini, nakuliko se on vu ovem stališu nahađa, nakuliko je on preporođenec, nikakov greh kajti vu takvem božansko seme, Božja milošča ostaje, on ne more grešiti kajti je Božje dete, dapače, istom božanski, koj od nemogučnosti grešiti, kak nju Bog ima, delničtvo jemlje. Gornje pako reči ne zgovarjaju to da on koj se nahađa vu stališu preporođenja, vu milošči Božji, več nigdar ne more ov stališ pogubiti niti več ne grešiti ar gore 1,8. veli sam apoštol da bi se vkanjuvali ako li se bi štimali prez greha biti, dapače, one neg to samo znamenuju da se stališ milošče ne more zjediniti z stališem greha, posledno da preporođeni ne sme grešiti. Pazi: ovo ovde rečeno preteže se zadnjič na vse grehe pokehdob se nikakov greh, naj bi jošče tak mal bil, z preporođenjem kakti preporođenjem ne da složiti, ali kak iz skupzveska očivesto biva, apoštol razmeva navlastito velike grehe, takzvane smrtne grehe (dole 5,16), ar vu redu 8.,10. grešnik imenuje se detetom Šatane, anda mora se takov grešnik razmevati vu kojem zlo, hman poželenje, spodobno kak vu Šatanu, je natuliko prek ruke vzelo da je vu njem duše živlenje skončano, milošča posvečujuča zgubila se, ovo pako je neg samo velik grešnik. ↩︎
*
Po tom se moreju Božja deca med sobum razlučiti od vražje dece: ova smrtno greše, a ona ne i vsaki anda koj ni prost od velikeh grehov, koj ni pravičen, neje Božje dete, navlastito on ne koj ne obdržava ljubav bližnjega, koj odrujava svojega brata, njega preganja ali kakvem goder optršljivem načinom ljubav proti njemu vrazuje. Apoštol zvišava ljubav bližnjega kajti je glavna krščenikov zapoved i od nje istom Božja ljubav visi (dole 4,20). ↩︎
*
Koj Šatanu vu grešnem namenenju je bil spodoben i njemu jednak ljudomorec človeka. ↩︎
*
Zakaj je njega vubil? Kajti on je bil krivičen, a ne preporođenec, krivični pako odurjavaju pravične. ↩︎
*
Naša ljubav bližnjega je znamenje da mi jesmo istinito preporođeni, Božja deca. Ov red se ipak prikaplja k 10. redu vu kojem se pravica, a navlastito ljubav kakti preporođenja znamenje naprvo postavlja. Redi 11.–13. rastolnačuju samo ljubavi zapoved i kak se je morala habati odurjavanja i nazloba koj je z svetskem namenenjem združen. ↩︎
*
Ne more preporođenec Božje dete biti. Nut, anda kak ne samo vera, nego vera vu ljubavi poslena, čini pravičnoga. ↩︎
*
Ar on ne samo vmarja samoga sebe duhovnem načinom, nego takaj svojega bližnjega pokehdob nazlobuvanje ovoga je združeno z željum njegvoga skončanja i ova želja je duhovno vmarjanje koje se more takaj na telovno pretegnuti ako li se nazlobu ne postaviju međe i zato se veliki nazlob zove smrtni nazlob. ↩︎
*
Milošču preporođenja, koja je nam za poručanstvo vekivečnoga živlenja, ne more vu sebi obdržati. ↩︎
*
Ljubeči ne samo ne vmarja svojega brata, dapače, on polaže za njega svoje lastovito živlenje ali končemar delji od svoje preobilnosti. V. sl. ↩︎
*
Kak ostaje ovakov vu Božji ljubavi, Božji prijatel? ↩︎
*
Iz ove istinske ljubavi. ↩︎
*
Iz Boga, da mi jesmo Božja deca. ↩︎
*
Ar ako nas istom vre naše srce kudi zbog pomenjkanja ljubavi, kak budemo opstali pred božanskem sudom ar Bog jošče više zna nego naše srce, pokehdob on vsa zna. ↩︎