Štefan, dobivši sloboščinu, odgovoriti vnoga povedal je od zaveza Božjega z Abrahamom i z posledniki njegovemi, od Mojžeša i ishađanja sinov izraelskeh iz Egiptuša, od šatora svedočanstva i od Cirkve po Šalomonu zezidane, Židove karajuči da se oni i oci njihovi Duhu Svetomu naveke suprotstavljaju; kada bi pako rekel da on Ježuša na desnici Boga vidi, kamenuje se poklamkak bi bili svedoki oprave k nogam Šavla položili i moli za kamenujuče.
- Rekel je pako poglavar aldovnički: „Je li se ova tak imaju?“
- Koj reče: „Ljudi, bratja i oci, posluhnete! Bog dike skazal se je ocu našemu Abrahamu kada bi bil vu Mezopotamiji, predi nego bi vumrl vu Karani,
- i rekel je njemu: ʻIzidi iz zemlje tvoje i od rodbinstva tvojega ter hodi vu zemlju koju ti pokažem.ʼ
- Onda izišel je iz zemlje kaldejanske i stanuval je vu Karani. I odonud, poklamkak bi bil vumrl otec njegov, prenesel ga je vu zemlju ovu vu kojoj vi sada stanujete.
- I ni mu dal odvečine vu njoj niti za koračaj noge, nego obečal je da ju njemu dal bude na ladanje i semenu njegovem za njim kada jošče sina ni imel.
- Govoril je pako njemu Bog da bude seme njegovo prihodnik vu zemlji tuđi i da je v sužanstvo pothitili budeju i zlo baratali z njimi četiristo let.
- ʻI narod kojemu služili budeju sudil budem jaʼ, rekel je Gospon, ʻa zatem izideju ter služili budu meni na mestu ovem.ʼ
- I dal mu je Zakon obrezavanja i ovak rodil je Izaka i obrezal ga je osmi dan, a Izak Jakopa, a Jakop dvanajst patrijarkov.
- A patrijarke nenavideči Jožefa prodali jesu vu Egiptuš i bil je Bog z njim
- i oslobodil je njega iz vseh nevolj njegoveh i dal mu je milošču i mudrost vu nazočnosti faraona, kralja egiptonskoga, i postavil je njega poglavara zvrhu Egiptuša i zvrhu cele hiže svoje.
- Došel je pako veliki glad zvrhu celoga Egiptuša i kananejanske zemlje i nevolja velika i nesu našli hranu oci naši.
- Kada pako bi bil čul Jakop da je žitka vu Egiptušu, poslal je oce naše prvič,
- a ob drugem prepoznan je Jožef od bratov svojeh i očituvan je faraonu kralju narod njegov.
- Poslavši pako Jožef pozval je oca svojega Jakopa i vsu rodbinu svoju, pedeset i pet duš,
- i došel je dole Jakop vu Egiptuš i vumrl je on i oci naši.
- I prenešeni jesu vu Sikem i položeni jesu vu pokopališča koje kupil je Abraham z cenum srebra od sinov Hemoroveh, sina Sikemovoga.
- Kad bi se pako približavalo vreme obečanja ko[je] prisegel je bil Bog Abrahamu, raslo je ljudstvo i povnožalo se vu Egiptušu
- doklam nastupil [je] drugi kralj vu Egiptušu, koj ni poznal Jožefa.
- Ov prekanivši narod naš, trapil je oce naše da bi ispostavljali decu svoju da ne bi živeli.
- Ovo isto vreme narodil se je Mojžeš i bil je povoljen Bogu, koj kojen je tri mesece vu hiži oca svojega.
- Poklamkak bi bil on ispostavljen, vzela ga je kči faraonova i otkojila si je njega za sina.
- I podvučen je Mojžeš vu vsoj mudrosti egiptonski i bil je mogučen vu rečih i vu delih svojeh.
- Kad bi pako ispunilo se njemu četrdeset let vremena, došlo mu je v srcu da bi pohodil brate svoje, sine izraelske.
- I kada bi bil videl nekojega krivicu trpečega, branil je njega ter se je fantil zbog onoga koj krivicu je trpel vubivši Egiptonca.
- Štimal je pako da razmeju brati njegovi da njim Bog oslobođenje dâ po ruki njegovi, oni pako nesu razmeli.
- Buduči pako dan skazal se je kad bi se med sobum svadili, spravljal je nje na mir govoreči: ʻLjudi, bratja jeste, zakaj jeden drugomu škodite?ʼ
- Koj pako krivicu činil je bližnjemu, odegnal je njega govoreči: ʻGdo te je postavil poglavara i suca zvrhu nas?
- Je li skončati me ti hočeš kak si skončal včera Egiptonca?ʼ
- Pobegnul je anda Mojžeš na reč ovu i postal je prihodnik vu madijanskoj zemlji gde rodil je sine dva.
- I po spunjeneh letih četrdeset skazal se je njemu vu puščini Gore sinajske angel vu šipka ognjenem plamnu.
- Mojžeš pako videči čudil se je nad viđenjem, kad bi pako on bliže pristupil da bi pogledal, včinjen je glas Gosponov k njemu govoreči:
- ʻJa sem Bog otec tvojeh, Bog Abrahama, Bog Izaka i Bog Jakopa.ʼ Prestrašen pako Mojžeš ni smel pogledati.
- Rekel je pako njemu Gospon: ʻOdveži obutelj nog tvojeh ar mesto na kojem stojiš zemlja sveta je.
- Videči videl sem traplenje puka mojega koj je vu Egiptušu i zdihavanje njihovo čul jesem i stupil sem dole da je oslobodim. I sada došel sem i pošljem tebe vu Egiptuš.ʼ
- Ovoga Mojžeša kojega tajili jesu govoreči: ʻGdo te je postavil poglavara i suca?ʼ, ovoga je Bog poglavara i otkupitela poslal z rukum.
- Ov ispeljal je nje čineči čuda i znamenja vu zemlji egiptonski i vu Črlenem morju i vu puščini četrdeset let.
- Ov je Mojžeš koj rekel je sinom izraelskem: ʻProroka obudi vam Bog zmed bratov vašeh kak mene: njega posluhnete.ʼ
- Ov je koj bil je vu spravišču vu puščini, z angelom koj govoril je njemu na gori Sinaj i z oci našemi, koj prijel je reči živlenja da bi je nam dal.
- Kojem nesu hoteli pokorni biti oci naši, nego su ga zavrgli i obrnuli se z srcem svojem vu Egiptuš
- govoreči Aronu: ʻNačini nam boge koji budu pred nami hodili ar Mojžešu ovomu, koj nas ispeljal je iz zemlje egiptonske, ne znamo kaj se je njemu dogodilo.ʼ
- I načinili su tele vu dnevih oneh i donesli su aldova bolvanu i raduvali se vu delih ruk svojeh.
- Obrnul se je pako Bog i predal je nje da bi služili vojski nebeski kak je pisano vu knjigi prorokov: ʻJe li mi jeste krvoločne i druge aldove doprinašali četrdeset let vu puščini, hiža izraelska?
- I prijeli jeste šator Molokov i zvezdu boga vašega Remfama, spodobe koje jeste napravili da bi se njim klanjali. I preselim vas prek Babilona.ʼ
- Šator svedočanstva bil je pri ocih našeh vu puščini, kak odredil je njim Bog gov[or]eči Mojžešu da bi ga napravil poleg spodobe koju bil je videl.
- Kojega su takaj vpeljali prijemši oci naši z Ježušem vu ladanje narodov koje je izegnal Bog od lica ocev našeh tja do dnevov Davidoveh,
- koj našel je pred Bogom milošču i prosil da bi našel šator Bogu Jakopovomu.
- Šalamon pako zezidal mu je hižu,
- ali Višnji ne stanuje vu hižah z rukami napravljenemi, kak prorok veli:
- ʻ’Nebo je meni stolica, Zemlja pako klupčica nog mojeh. Kakovu hižu budete zezidali meni’, veli Gospon: ‘ali koje mesto je počinka mojega?
- Ne li vsa ova načinila je ruka moja?’ʼ
- Tvrdoga šinjaka i neobrezanoga srca i vuh, vi se vsevdilj Duhu Svetomu suprotstavljate, kak oci vaši, tak i vi.
- Kojega zmed prorokov nesu preganjali oci vaši? I vmorili su one koji su prenazveščali od došestka Pravičnoga kojega vi sada izdajniki i ljudomorci jeste.
- Koji prijeli jeste Zakon po određenju angelov i neste ga obdržavali.“
- Čujuči pako ova, razjadili su se vu srcah svojeh i škripali z zubmi nad njim.
- Kad bi pako Štefan bil pun Duha Svetoga, vuprvši oči svoje vu nebo, videl je diku Božju i Ježuša stoječega na desnice Boga. I reče: ʻNut, vidim nebesa otprta i Sina Človečjega stoječega na desnice Boga.ʼ
- Skriknuvši pako z velikem glasom, zatisnuli su vuha svoja i navalili složno na njega.
- I ishitivši njega zvan varaša kamenuvali jesu, a svedoki položili jesu oprave svoje poleg nog mladenca koj zval se je Šavel.
- I kamenuvali su Štefana nazivajučega i govorečega: „Gospone Ježuš, primi dušu moju!“
- Poklekši pako kričal je z glasom velikem govoreči: „Gospone, ne primi njim ovo za greh.“ I kad bi to zrekel, zaspal je vu Gosponu. Šavel pako privoljil je k smrti njegovi.
