Odebranje sedem dvornikov poklamkak se broj verujučeh dan na dan povekšaval je; Štefana zažganost z namenji i čudami proti kojemu se vnogi Židovi ozdravljaju i kada ga ne moreju predobiti, z krivemi svedoki trsiju se obladati.
- Vu oneh pako dnevih, poklamkak se je broj vučenikov povekšal, nastalo je morguvanje grkov proti Židovom zato da bi se zametavale vu dvorenju vsakdašnjem vdovice njihove.
- Skup zezvavši pako dvanajst vnožinu vučenikov, rekli jesu: „Neje pravedno da mi zapustimo reč Božju ter dvorimo stolom.
- Gledajte anda, bratja, ljudi zmed vas dobroga svedočanstva, pune Duha Svetoga i mudrosti koje postavimo zvrhu posla ovoga.
- Mi pako vu molitvi i vu službi reči opstojimo.“
- I dopalo se je govorenje pred vsum vnožinum ter zebrali jesu Štefana, človeka punoga vere i Duha Svetoga, i Filipa i Prokora i Nikanora i Timona i Parmena i Mikulu, prihodnika iz Antiokije.
- Ove su postavili pred apoštole i moleči položili jesu na nje ruke svoje.
- I reč Boga rasla je i povekšaval se je broj vučenikov vu Jeruzalemu jako. Velika takaj vnožina aldovnikov podlagala se je veri.
- Štefan pako, pun milošče i jakosti, činil je čuda i znamenja velika med ljudstvom.
- Podignuli su se pako nekoji iz spravišča koje se zove Slobodnjakov i Cirenejancev i Aleksandrincev i oneh koji su bili iz Cilicije i Azije pregovarjajuči se z Štefanom
- i nesu mogli suprot stati mudrosti i Duhu koj govoril je.
- Onda podusili jesu ljudi koji bi rekli da su čuli njega govorečega reči blazne proti Mojžešu i Bogu.
- Zburkali jesu anda puka i starešine i pisce i skup stekuči se pograbili su njega i dopeljali vu spravišče
- i postavili su krive svedoke koji bi rekli: „Človek ov ne prestaje govoriti reči suprot mestu svetomu i Zakonu.“
- Ar čuli smo njega govorečega da Ježuš Nazarenski zatere mesto ovo i premeni šege koje predal je nam Mojžeš.
- I gledajuči vu njega, vsi koji sedeli jesu vu spravišču, videli jesu lice njegovo kakti lice angela.
