Ananijaš i tovarušica njegova Zafira prodavši njivu, stran cene sebi zadržiju, kaj vendar pred Petrom pitajučem tajiju da su včinili zbog česa na reč Petrovu žena za mužom z naglum smrtjum kaštiguje se. Vnoga po apoštolih, a najviše po Petru, bivaju znamenja i oni vu vuzi zaprti od angela ispeljaju se i opet pograbljeni ne privoljuju da bi od nazveščenja imena Ježuševoga prestali. Na svetuvanje Gamalijelovo bičuvani otpuščaju se veseleči se da za ime Krištuševo vredni bili su bičuvati se, kojega vsevdilj nazveščuju.
- Človek pako nekoj z imenom Ananijaš z Zafirum, ženum svojum, prodal je njivu.
- I zatajil je od cene njive z znanjem žene svoje i donesuči stran nekoju položil je k nogam apoštolov.
- Rekel je pako Peter: „Ananija, zakaj je spačil Šatan srce tvoje da bi lagal Duhu Svetomu i zatajil od cene njive?
- Ne li obdržajuč ju, tebi je ostajala, a prodana je li ni bila vu tvojoj oblasti? Zakaj si jesi naprvo vzel vu srcu tvojem dugovanje ovo? Nesi se zlagal ljudem, nego Bogu.“
- Čujuči pako Ananijaš reči ove, opal je i spustil dušu. I včinjen je veliki strah nad vsemi koji su čuli.
- Zdignuvši se pako mladenci vugnuli su njega i iznesujuči zakopali.
- Dogodilo se je pako čez čas okolo treh vur i žena njegova, neznajuča kaj se je bilo pripetilo, došla je nuter.
- Rekel je pako njoj Peter: „Poveđ mi, žena, je li ste za tuliko njivu prodali?“ A ona je rekla: „Ravno za tuliko.“
- Peter pako reče njoj: „Zakaj ste se skup složili Duha Gosponovoga skušavati? Nut, noge oneh koji zakopali jesu muža tvojega pred vratah i izneseju tebe.“
- Sproti opala je pred noge njegove i dušu spustila. Vleznuvši pako mladenci našli su nju mrtvu i znesli su nju i pokopali poleg muža njejinega.
- I nastal je veliki strah med vsem spraviščem i med vsemi koji su čuli ova.
- Po rukah pako apoštolov včinjena jesu znamenja i čuda vnoga med ljudstvom. I bili su vsi skupa zajedno pod pristroškom Žalomonovem.
- Zmed ostaleh pako nigdo se ni podstupil pridružiti se k njim, nego velikodičilo je nje ljudstvo.
- Bolje pako rasla je verujučeh vu Gosponu vnožina mužev i žen
- tak da na vulicu bi iznašali betežnike i postavljali na posteljah i nosilnicah da dojdučega Petra lestor tenja njegova bi opsenčila vsakoga zmed njih i oslobodili se od betegov svojeh.
- Skup stekla se je pako takaj vnožina iz bližnjeh varašev vu Jeruzalem donašajuči betežne i trapljene od duhov nečisteh koji su se vsi ozdravljali.
- Stavši se pako poglavar aldovnikov i vsi koji su z njim bili (kaj je od krivoverstva saducejanskoga), napunili su se z jalom
- i vrgli su ruke na apoštole i postavili vu vuzu opčinsku.
- Angel pako Gosponov po noči otprvši vrata vuze i ispeljavši nje, rekel je:
- „Hote i stoječi govorete vu Cirkvi ljudstvu vse žitka ovoga.“
- Koji, kad bi čuli bili, vleznuli su zaran vu Cirkvu ter navučali. Dojduči pako poglavar aldovnički i koji z njim bili jesu, skup zezvali su spravišče i vse starešine sinov izraelskeh i poslali su vu vuzu da bi se dopeljali.
- Kada pako bi došli bili dvorjaniki i otprvši vuzu, ne bi bili nje našli, povrnuvši se nazvestili jesu
- govoreči: „Temnicu zadnjič našli jesmo zaprtu z vsum marljivostjum i stražane stoječe pred vratmi. Otprvši pako nikoga nesmo vnutri našli.“
- Kak pako čuli jesu reči ove večniki cirkveni i poglavari aldovnički, dvojili su od njih kaj bude z toga.
- Dojduči pako nekoj, nazvestil je njim: „Nut ovo, ljudi koje ste postavili vu vuzu jesu vu Cirkvi stoječi i vučeči ljudstvo.“
- Onda odišli jesu večniki z službeniki i dopeljali su nje prez sile ar bojali su se ljudstva da je ne bi kamenuvalo.
- I kada bi bili nje dopeljali, postavili su je vu spravišče i pital je nje poglavar aldovnički
- govoreči: „Oštro prepovedali smo vam da ne bi vučili vu imenu ovem ter, nut, napunili jeste Jeruzalema z navukom vašem i hočete napeljati na nas krv človeka ovoga.“
- Odgovorivši pako Peter i apoštoli rekli jesu: „Morati je pokornomu biti Bogu več kak ljudem.
- Bog ocev našeh obudil je Ježuša kojega ste vumorili obesivši ga na drevo.
- Ovoga poglavara i zveličitela Bog izvisil je z desnicum svojum da da pokoru Izraelu i otpuščenje grehov.
- I mi jesmo svedoki rečih oveh i Duh Sveti kojega je dal Bog vsem pokornem sebi.“
- Ova kada bi bili čuli, razljutili se jesu i mislili nje skončati.
- Stavši se pako nekoj farizeuš vu spravišču, z imenom Gamalijel, pravdoznanec poštuvan od vsega ljudstva, zapovedal je da bi jedno malo van izišli ljudi.
- I rekel je njim: „Ljudi Izraelci, pazete se zarad ljudih oveh kaj činili budete.
- Ar pred ovemi dnevi bil je Teodas govoreči da on je nekoj, kojemu pristal je broj ljudih okolo četiri stotin, koj skončan je i vsi koji su vu njega veruvali, rastepeni jesu i na nikaj spravljeni.
- Za ovem bil je Judaš Galilejanec vu dnevih popisavanja i obrnul je ljudstvo za sobum i on je poginul i vsi kuliko ih goder pristalo je k njemu, raspršeni jesu.
- I sada anda velim vam, odstupete od ljudih oveh i pustete je ar ako je iz ljudih tolnač ov ali delo, rastepe se,
- ako pako iz Boga je, nemrete nje rastepsti da se morebiti kakti proti Bogu vojujuči ne najdete.“ Pristali su pako k njemu.
- I skup zezvavši apoštole, zbičuvanem zapovedali jesu da ne bi zevsema govorili vu imenu Ježuševem i otpustili su nje.
- A oni išli su veseleči se spred spravišča pokehdob vredni znajđeni bili jesu za ime Ježuševo opšanost trpeti.
- Vsaki pako dan nesu prestajali vu Cirkvi i po hižah vučiti i nazveščati Krištuša Ježuša.
