Apoštoli, poklamkak bi zaprti bili vu vuzi zveđani zbog ozdravlenja plantavoga, pokažuju da vu jedinem Krištušu, koj kamen vugla je, nahađa se zveličenje niti su poglavarom proti zapovedi Božji pokorni da bi prestali od navukov imena Krištuševoga; otpuščeni pako i moleči, prijimlju znamenja dobljenoga Duha Svetoga; nijeden zmed njih nikaj lastovitoga nema, nego prodavši vsa svoja, peneze su vu opčinstvo postavili kak je činil Barnabaš prodavši njivu svoju.
- Kada bi pako oni govorili ljudstvu, nadošli su aldovniki i večniki Cirkveni ter saducejuši
- žalujuči se da bi vučili ljudstvo i nazveščali vu imenu Ježuševem gorestajanje od mrtveh.
- I vrgli jesu na nje ruke i postavili vu vuzu do zutra ar bil je vre večer.
- Vnogi pako zmed oneh koji bili su čuli reč veruvali jesu i včinjen je bil broj ljudih okolo pet jezer.
- Dogodilo se je pako drugi dan da bi se skup spravili poglavari njihovi i starešine i pisci vu Jeruzalemu.
- I Anaš, poglavar aldovnički, i Kajfaš i Ivan i Aleksander i kuliko ih je goder bilo od plemena aldovničkoga.
- I postavivši nje na sredinu, pitali jesu: „Vu kakovoj moči ali vu kakovem imenu jeste vi ova činili?“
- Onda Peter, napunjen z Duhom Svetem, reče njim: „Poglavari ljudstva i starešine, čujte!
- Ako se mi denes sudimo zbog dobročinstva nad onem betežnem človekom, po kojem je on zdrav postal,
- tak znano budi vsem vam i vsemu izraelskomu ljudstvu da vu imenu našega Gospona Ježuša Krištuša Nazarenskoga, kojega ste vi raspeli, kojega je Bog od mrtveh obudil, vu ovoga imenu stoji ov pred vami zdrav.
- Ovo je on kamen koj je bil od vas zidarov zavržen, koj je vugelnem kamenom postal. Šolt 117,22; Iz 28,16; Mat 21,42; Mark 12,10; Luk 20,17; Rim 9,33; 1Pet 2,7.
- I ni v drugem nikem zveličenja. Ar niti nikakvo drugo ime pod nebom ni dano ljudem po kojem se mi moremo zveličiti.“
- Videči pako Petra stalnost i Januša i zveduvši da bi ljudi nevučeni i prosti bili, čudili su se i spoznali nje da su z Ježušem bili.
- Človeka takaj videči stoječega z njimi, koj bil je ozdravljen, nikaj nesu mogli suprot govoriti.
- Zapovedali jesu pako njim van iz spravišča iziti i dogovarjali se jesu med sobum
- govoreči: „Kaj budemo činili ljudem ovem? Ar zadnjič znano je znamenje po njih včinjeno vsem stanovnikom Jeruzalema, očivesto je i ne more se tajiti.
- Nego da se više ne razglašuje med ljudstvom, zagrozemo se njim da nadalje ne govoriju vu imenu ovem ni jednomu človeku.“
- I dozvavši nje zapovedili su njim da zevsema ne bi govorili niti vučili vu imenu Ježuševem.
- Peter pako i Januš odgovorivši rekli jesu njim: „Je li je pravično vu nazočnosti Boga vas bolje poslušati kak Boga, sudete.
- Ar ne moremo koja smo videli i čuli ne govoriti.“
- Ali oni zagrozivši se otpustili su nje nenajduči kak bi nje kaštigali zbog ljudstva ar vsi su dičili Boga zbog onoga kaj bilo je včinjeno. ita omnes versione[s]
- Ar bil je več kak četrdeset let star človek nad kojem včinjeno je bilo znamenje ovo ozdravlenja.
- Otpuščeni pako došli jesu k svojem i nazvestili njim kuliko bi bili njim poglavari aldovnički i starešine govorili.
- Koji kad bi čuli bili, vsi skup složno podignuli su glas k Bogu i rekli: „Gospone, Ti jesi koj si napravil nebo i zemlju, morje i vsa koja vu njih jesu.
- Koj si z Duhom Svetem po vustah oca našega Davida, dečaka tvojega, rekel: ʻZakaj su besnili narodi i puki mislili zaopstujna?
- Izišli se jesu kralji Zemlje i poglavari skup spravili zajedno proti Gosponu i proti Krištušu njegovem.ʼ
- Ar se skup spravili jesu zaistinsko vu varašu ovem proti svetomu detetu tvojemu Ježušu, kojega si namazal, Herodeš i Poncijuš Pilatuš z narodi i puki izraelskemi
- da bi včinili koja ruka tvoja i tolnač tvoj je dokončal da bi se dogodilo.
- I sada, Gospone, oglej se na grožnje njihove i podelji slugam tvojem da z vsum srčenostjum reč tvoju govorili budu.
- Na to stegni ruku tvoju da ozdravlenja i znamenja i čuda bivaju po imenu svetoga sina tvojega Ježuša.“
- I kada bi bili zmolili, genulo se je mesto vu kojem su skup spravljeni bili i napunjeni jesu vsi z Duhom Svetem ter govorili reč Božju z srčenostjum.
- Vnožine pako verujučeh bilo je jedno srce i jedna duša niti nigdo ni rekel da od oneh koja je ladal, kaj njegovoga bi bilo, nego bila su vsa opčinska.
- I z velikum močjum davali jesu apoštoli svedočanstvo od gorestajanja Ježuša Krištuša, Gospona našega, i milošča velika bila je vu njih vseh.
- Ar niti nigdo ni bil potrebujuči česa med njimi. Ar kuliko ih goder ladavcev njiv ali hiž je bilo, prodajuči donašali jesu cenu oneh koja su prodali
- i polagali pred noge apoštolov. Razdeljivalo se je pako vsakomu kak je komu potrebno bilo.
- Jožef pako, koj imenuvan je Barnabaš od apoštolov (kaj je rastolmačeno ‘Sin Obatrivenja’), dvornik od plemena Ciprijanec,
- pokehdob bi imel njivu, prodal je nju i donesel je peneze i položil pred noge apoštolov.
