[2. …] dan pred vrata cirkvena, koja se zoveju Lepa, da bi prosil almuštvo od vlezujučeh vu Cirkvu.
- Ov, kad bi videl bil Petra i Januša počemše vlezuvati vu Cirkvu, prosil je da bi almuštvo dobil.
- Na njega pako pogledavši Peter z Janušem, rekel je: „Poglej na nas!“
- A on gledal je vu nje ufajuči se da bude kaj dobil od njih.
- Peter pako rekel je: „Srebra i zlata nemam, kaj pako imam, to ti dam: vu imenu Ježuša Krištuša Nazarenskoga, stani se i hodi!“
- I prijemši ga za desnu ruku njegovu, podignul je njega i sproti vtvrdili se jesu njegovi poplati i gležnji.
- I gore skočivši, stal je i hodil i vleznul je z njimi vu Cirkvu hodeči i skakajuči i hvaleči Boga.
- I videlo ga je vse ljudstvo hodečega i hvalečega Boga.
- Poznali su pako njega da je on koj zbog almuštva sedel je pri Lepeh vratah Cirkve i napunjeni su z osupnenjem i zavzetjem nad onem kaj se je njemu zgodilo bilo.
- Kada bi pako držal Petra i Januša, zdrčalo se je vse ljudstvo k njim pod pristrošek, koj se zove Šalomonov, osupnjeno.
- Videči pako Peter odgovoril je ljudstvu: „Ljudi Izraelci, kaj se čudite nad tem ali kaj na nas gledate kak da bi bili z našum močjum ali oblastjum včinili da ov hodi?
- Bog Abrama i Bog Izaka i Bog Jakopa, Bog ocev našeh odičil je Sina svojega Ježuša kojega vi zadnjič izdali i zatajili jeste pred Pilatuševem licem, koj sudil je da se ispusti.
- Vi pako svetoga i pravičnoga zatajili jeste i prosili da se vam človek ljudomorec daruje.
- Početnika pako živlenja jeste vumorili kojega Bog obudil je od mrtveh, kojega mi svedoki jesmo.
- I po veri imena njegovoga, ovoga, kojega videli jeste i poznali, potvrdilo je ime njegovo i vera, koja po njem je, dala je njemu celo zdravje ovo vu nazočnosti vseh vas.
- I sada, bratja, znam da po neznanosti činili jeste kak i poglavari vaši.
- Bog pako koja je prenazvestil po vustah vseh prorokov da Krištuš njegov trpeti ima, tak je spunil.
- Pokorete se anda i obrnete da se izbrišeju grehi vaši.
- Da kada dojdu vremena rashlađenja od nazočnosti Gosponove i pošlje onoga koj nazveščan je vam, Ježuša Krištuša,
- kojemu potrebno je zadnjič Nebo prijeti tja do vremen povrnjenja vseh koja je Bog govoril po vustah vseh sveteh prorokov odveka.
- Mojžeš zadnjič rekel je da proroka obudi vam Gospodin Bog vaš zmed bratov vašeh, kak mene njega poslušajte vu vsem koja goder vam govoril bude.
- Bude pako da vsaka duša koja ne bude poslušala proroka onoga zvrže se iz ljudstva.
- I vsi proroki, od Samuela i potlam koji govorili jesu, nazvestili jesu dneve ove.
- Vi ste sini prorokov i Zakona kojega odlučil je Bog ocem našem govoreči Abrahamu: ʻI vu semenu tvojem blagosloviju se vsi narodi Zemlje.ʼ
- Vam prvič Bog, obudivši sina svojega, poslal ga je da bi vas blagoslovil, da se vsaki od hmanjice svoje obrne.“
