Ježuš iskažuje se svojem vučenikom pri Tiberijanskem morju. Čudnovita ribarija. Ježuš predaje Petru najvekšu pastirsku čast i njemu prenazvešča križnu smrt. Peter spitava zbog Ježuševe smrti zbog česa se pokaruje. Konec.
- Zatem se je Ježuš ipak očituval vučenikom pri Tiberijanskem morju. Očituval se je pako ovak:
- Bili su skupa Šimun Peter, Tomaš, koj se zove Dvojek, Natanael iz Kane Galilejanske, sini Zebedejuševi i dva drugi zmed njegveh vučenikov.
- Onda reče njim Šimun Peter: „Ja idem ribe lovit.“ Oni rečeju njemu: „Idemo mi takaj z tobum.“ Izideju anda van i stupiju vu ladju i onu noč nesu nikaj vlovili.
- Kad bi pako jutro bilo nastalo, stal je Ježuš na obrežju, ništarmanje vučeniki nesu spoznali da je Ježuš.
- Reče njim anda Ježuš: „Dečaki, je li imate kaj za jesti? “ Oni odgovoriju njemu: „Nemamo.“
- On pako reče njim: „Hitete mrežu na desnu stran ladje i najdete.“ Hitiju anda i več ju nesu mogli pred vnožinum rib vleči.
- Onda on vučenik kojega je ljubil Ježuš reče Petru: „Gospon je!“ Kad bi pako Šimun Peter bil čul da je Gospon, prepaše se z haljum (ar je bil gol) i spusti se vu morje.
- Drugi pako vučeniki jesu došli na ladji ar nesu bili daleko od zemlje nego okolo dvesto laktov i oni su mrežu z ribami vlekli.
- Kad bi anda oni na suho bili izišli, videli su pripravljenu žerjavku, ribu gore postavljenu i kruha poleg.
- Reče njim Ježuš: „Donesite od rib koje ste sada vlovili!“
- Šimun Peter stupi nuter i povleče mrežu na suho z sto pedeset i tremi velikemi ribami napunjenu i akoprem bi ih tuliko bilo, vendar se ni mreža rastrgala.
- Reče njim Ježuš: „Hote i obedvajte!“ I nigdo zmed oneh koji su se poseli, ne se ufal njega pitati: „Gdo si ti?“ Ar oni su znali da je Gospon.
- I dojde Ježuš, vzeme kruh i da ga njim i ravno tak ribu.
- Ovo je vre tretji put bilo kaj se je Ježuš svojem vučenikom očituval poklamkam bi se bil od mrtveh gore stal.
- Kad bi se pako bili naobedvali, reče Ježuš Šimunu Petru: „Šimun, sin Jonašev, je li ti mene več ljubiš nego ovi?“ On veli njemu: „Tak je, Gospone, ti znaš da te ja ljubim.“ On reče njemu: „Pasi moje janjce!“
- On ipak reče njemu: „Šimun, sin Jonašev, je li ti mene ljubiš?“ On veli njemu: „Tak je Gospone, ti znaš da te ja ljubim.“ On reče njemu: „Pasi moje janjce!“
- On reče njemu tretjič: „Šimun, sin Jonašev, je li ti mene ljubiš?“ Na to se ražalosti Peter da mu je tretjič rekel: „Je li ti mene ljubiš?“ I veli njemu: „Gospone, ti vsa znaš, ti znaš da te ja ljubim.“ On reče njemu: „Pasi moje ovce!
- Stanovito, stanovito velim tebi: dok si mlajši bil, jesi se sam pasal ter si išel kam si hotel, kada pako ostarneš, budeš tvoje ruke pretezal i drugi te bude pasal i vodil kam ti nečeš.“ 2Pet 1,14.
- To pako je on rekel znamenujuči z kakvum on smrtjum bude odičil Boga. I kad bi to bil izvustil, reče njemu: „Nasleduj mene!“
- Peter se pako obrne i zagleda onoga vučenika kojega je ljubil Ježuš sledujučega, koj se je takaj nagnul na njegva prsa i reče: „Gospone, gdo je koj te bude izdal?“ Gore 13,23.
- Kad bi anda Peter ovoga bil zagledal, reče Ježušu: „Kaj bu pako ov?“
- Ježuš reče njemu: „Ja hoču da on tak ostane dok ja dojdem. Kaj to na te spada? Ti nasleduj mene!“
- Otud je anda izišel ov spomenek med bratjum da on vučenik ne vumre. A Ježuš ni rekel njemu: „On ne bude vumrl“, nego: „Ja hoču da on tak ostane dok ja dojdem, kaj to na te spada?“
- Ovo je on vučenik koj od toga daje svedočanstvo i ova je popisal i mi znamo da je njegvo svedočanstvo istinito.
- Jesu pako takaj jošče vnoga druga koja je činil Ježuš koja da bi se vsaka poseb popisala, tak kak štimam, niti isti svet ne bi mogel zavjeti oneh knjig koje bi se morale popisati.
