Vu pregonu rasprše se vsi zvan apoštolov kada je zatiral Šavel Cirkvu; Filip kruto vnoge vu Samarije obrne i med ovemi Šimuna coprnjaka okrsti; poslani od apoštolov Peter i Januš po molitvi i ruknastavljanju isprosiju verujučem Samaritancem Duha Svetoga; Šimun pako, hoteči Duha Svetoga doblenje z penezi kupiti, oštro od Petra kara se; Filip od angela pošilja se k skopljeniku kojega kad bi bil verujučega okrstil, od Duha otet donese se vu Azotuš.
- Nastalo je pako vu dnevu onem preganjanje veliko vu Cirkvi koja je bila vu Jeruzalemu i vsi su raspršeni po orsagih Judeje i Samarije zvan apoštolov.
- Spravili su pako Štefana ljudi bogaboječi i jako se nad njim plakali jesu.
- Šavel pako opustuval je Cirkvu po hižah hodeči i vlekuči muže i žene predaval je vu vuzu.
- Koji se anda raspršali jesu, okolo hodili su nazveščajuči Evangelijum.
- Filip pako, dojduči vu varaš Samarije, nazveščal je njim Krištuša.
- Pazile jesu pako vnožine na ona koja se njim od Filipa povedala jesu, složno poslušajuči i videči znamenja koja je činil.
- Ar vnogi zmed njih, koji imeli su duhe nečiste, kričeči z glasom velikem ishađali jesu.
- Vnogi pako z gutum vudreni i šantavi ozdravljeni jesu. Nastalo je anda veliko veselje vu varašu onem.
- Človek pako nekoj z imenom Šimun, koj prvlje bil je vu varašu coprnjak napeljajuči narod samaritanski govoreči da on je nekoj veliki,
- kojega vsi poslušali jesu od najmenjšega do najvekšega govoreči: „Ov je krepost Božja koja se veli Velika.“
- Pazili jesu pako na njega pokehdob ih je vnogo vremena z coprijami svojemi zaslepljuval.
- Kad bi pako veruvali bili Filipu nazveščajučemu Evangelijum od Kraljestva Božjega, vu imenu Ježuša Krištuša bili su krščeni muži i žene.
- Onda isti takaj Šimun je veruval i kad bi bil okrščen, držal se je Filipa. Videči pako znamenja i kreposti velike bivati, osupnjen čudil se je.
- Kad bi pako bili čuli apoštoli, koji bili su vu Jeruzalemu, da je Samarija prijela reč Božju, poslali su k njim Petra i Januša.
- Koji kad bi bili došli, molili su za nje da bi prijeli Svetoga Duha.
- Ar on jošče zvrhu nijednoga zmed njih ni bil došel, nego su samo bili okrščeni vu ime Gospona Ježuša.
- Onda su položili ruke zvrhu njih i prijeli su Svetoga Duha.
- Kad bi pako videl bil Šimun da po nastavljanju ruk apoštolskeh bi prijemali Duha Svetoga, ponudil je njim penez
- govoreči: „Dajte i meni oblast ovu da komu goder nastavim ruke, prime Duha Svetoga.“ Peter pako rekel je njemu:
- „Penezi tvoji z tobum naj budeju na pogublenje pokehdob štimal jesi da se dar Božji za peneze lada.
- Nemaš ti stranke niti dela vu reči ovoj. Ar srce tvoje ni pravedno pred Bogom.
- Pokoru anda čini zbog ove hmanjice tvoje ter prosi Boga da se morebiti otpusti tebi ovo srca tvojega mišlenje.
- Ar vu žuču žuhkoče i vu vezilu krivičnosti vidim da ti jesi.“
- Odgovorivši pako Šimun rekel je: „Prosete vi za me Gospona da nikaj ne dojde zvrhu mene zmed oneh koja rekli jeste.“
- I oni zadnjič svedočivši i govorivši reč Gosponovu, povračali se jesu vu Jeruzalem i vnogem državam samaritanskem nazveščali jesu Evangelijum.
- Angel pako Gosponov rekel je Filipu govoreči: „Stani se i hodi proti poldnevu na put koj od Jeruzalema pelja dolje vu Gazu: ov je pust.“
- I zdigši se odišel je. I, nut, človek Harap, skopljenik, mogučen Kandaces kraljice harapske, koj bil je zvrhu vseh kinčov njejineh, došel je klanjati se vu Jeruzalem
- i povračal se je sedeči na kolah svojeh ter čtejuči Izajijaša proroka.
- Rekel je pako Duh Filipu: „Pristupi i pridruži se k kolam ovem.“
- Pritekuči pako Filip čul je njega čtejučega Izajijaša proroka i rekel je: „Kaj štimaš, je li razmeš kaj čteš?“
- Koj reče: „A kak morem ako mi gdo ne pokaže?“ I prosil je Filipa da bi gore išel i sel se k njemu.
- Mesto pako Pisma koje je čtel bilo je ovo: „Kakti ovca peljan je na zaklanje i kakti janjec pred strižučem sebe neglasni, tak ni otprl vusta svoja.
- Vu poniznosti je sud njegov izvišen. Pokolenje njegovo gdo bude izrekel ar se vzeme od zemlje živlenje njegovo?“
- Odgovorivši pako skopljenik Filipu rekel je: „Prosim te, od kojega proroka veli to? Od sebe ali od drugoga kojega?“
- Otprvši pako Filip vusta svoja i počemši od Pisma ovoga, nazveščal je njemu Ježuša.
- Kad bi pako išli po putu, došli su k nekoji vodi i reče skopljenik: „Ovo voda, kaj preči da se ne okrstim?“
- Rekel je pako Filip: „Ako veruješ iz celoga srca, more biti.“ I odgovorivši reče: „Verujem da Sin Božji je Ježuš Krištuš.“
- I zapovedal je postati kolam i izišli su dole obadva vu vodu, Filip i skopljenik, i okrstil je njega.
- Kad bi pako izišli bili iz vode, Duh Gosponov otel je Filipa i ni ga više videl skopljenik. Išel je pako po putu svojem veseleči se.
- Filip pako najđen je vu Azotu i ophađajuči nazveščal je Evangelijum vsem varašem doklam bi došel vu Cezareju.
