Herodeš, vmorivši Jakopa, Petra postavlja vu vuzu želejuči po Vuzmu njega predati ljudstvu na skončanje, ali pokehdob je molila za njega prez prestanka Cirkva, po angeloskoj ispeljan pomoči bratom veliko veselje je doprinesel; poklamkak bi bilo včinjeno proti vuze stražanom izveđanje, Herodeš otputuval je vu Cezareju i kada božansko poštenje od ljudstva sebi iskano ne bi se bil kratil prijeti, vudren od angela i od črvov rastočen vumrl je.
- Okol onoga istoga pako vremena položil je Herodeš kralj ruke da bi nekoje od Cirkve mučil.
- Vmoril je pako Jakopa, brata Januševoga, z mečom.
- Kad bi pako bil videl da se to dopada Židovom, dokončal je da bi vlovil i Petra. Bili su pako Dnevi nekvasneh kruhov.
- Kojega kada bi bil vlovil, vrgel ga je vu vuzu i predal ga je četverovrsnoj četvorici vojnikov da bi ga čuvali ar ga je hotel po Vuzmu ljudstvu naprvo postaviti.
- Ovak je bil zadnjič Peter držan vu vuzi, ali Cirkva je molila prez prestanka za njega k Bogu.
- Kada bi ga pako bil kanil Herodeš ispeljati, vu onoj istoj noči je spal Peter med dvemi vojniki z dvemi lanci zvezan i stražani su pred vrati temnice stražili.
- I, nut, angel Gosponov je poleg stal i svetlost zasvetila se je vu stanu i sunul je Petra v rebra i zbudil njega govoreči: „Stani se brzo!“ I otpali su lanci z ruk njegoveh.
- Angel pako reče njemu: „Prepaši se i obuj tvoje pačmage!“ I on je tak včinil. On pako reče njemu: „Zaogrni se vu tvoj plašč i nasleduj mene!“
- I izišel je van i njega nasleduval i ne znal da je istinsko kaj je po angelu bivalo, nego je štimal da viđenje vidi.
- Prešli su pako čes prvu i drugu stražu i došli su do železneh vrat koja peljaju vu varaš. Ova se njim sama od sebe jesu otprla. I izišli su van i prešli čez jednu vuljicu i najenkrat je zniknul angel spred njega.
- Onda je Peter k sebi došel i rekel: „Vezda znam istinito da je Gospon poslal svojega angela ter me je otel iz ruk Herodešoveh i od vsega čakanja puka židovskoga.“
- I premišljavajuči došel je pred hižu Marije, matere Ivanove, koj se zove Marko, gde ih je bilo vnogo skup spravljeneh i molečeh.
- Kada bi pako on kučil na vratah dvora, došla je dekljič z imeno[m] Rode poslušat.
- I kak je spoznala glas Petrov, od veselja ni otprla vrat, nego vnuter bežeča, nazvestila je da Peter stoji pred vratmi.
- A oni rekli jesu njoj: „Noriš!“ Ona pako je potvrđavala da tak je. Oni pako rekli jesu: „Angel njegov je.“
- Peter pako opstal je kučeči. Kad bi pako otprli bili, videli su njega i osupnuli se.
- Namegnuvši pako njim z rukum da bi mučali, povedal je kak bi Gospon ispeljal bil njega iz vuze ter rekel je: „Nazvestete Jakopu i bratom ova.“ I iziduči odišel je na drugo mesto.
- Kad je pako dan nastal, bilo je nemalo burkanje med vojniki kaj se z Petrom dogodilo.
- Herodeš pako kada bi ga bil iskal i ne našel, poklamkak je zveđanje med stražani načinil, zapovedal je nje na smrt otpeljati i dole iduči od Judeje vu Cezareju, tam se je zadržaval.
- Bil je pako srdit na Tirijance i Sidonijance. Ali oni jednovoljni došli su k njemu i vputivši Blaštuša, koj je bil nad spalnicum kralja, prosili su mir zato kajti se bi hranile države njihove od njega.
- Odlučeni pako dan Herodeš, oblečen vu kraljevskeh svitah, sedel je na sudbenoj stolici ter govoril njim.
- Puk pako kričal je: „To su Božje, a ne človečanske reči!“
- Sproti pako vudril je njega angel Gosponov zato pokehdob ni bil dal poštenje Bogu i rastočen od črvov spustil je dušu.
- Reč pako Gosponova rasla je i povekšavala se.
- Barnabaš pako i Šavel povrnili se jesu iz Jeruzalema dopunivši službu vzemši Ivana koj se zval je Marko.
