Kad bi bila vu Antiokiji izišla punta zbog Židovov hotejučeh da se poganini k Bogu obrnjeni obrežeju, Pavel i Barnabaš to dugovanje apoštolom povedali jesu, koji po Petrovom i Jakopovem pristajanju z opčinskem dopitanjem pismeno dokončali jesu da poganini obrnjeni ne vežeju se po zakonu Mojžeševem; Pavel, želejuči od Antiokije pohoditi mesta vu kojeh je nazveščal, odružuje se od Barnabaša zato kajti ni hotel Ivana vzeti.
- I nekoji dole dojduči od Judeje vučili su brate da „ako se ne obrežete po navadi Mojžeševi, ne morete se zveličiti“.
- Kad bi onda včinjena bila punta nenajmenša Pavlu i Barnabašu proti njim, dokončali jesu da bi gore išli Pavel i Barnabaš i nekoji drugi zmed njih k apoštolom i k starešinam vu Jeruzalem zaradi pitanja ovoga.
- Oni anda sprevođeni od Cirkve prehađali jesu čez Feniciju i Samariju povedajuči obrnenje poganinov i načinili jesu veliko veselje vsem bratom.
- Kad bi pako došli bili vu Jeruzalem, prijeti jesu od Cirkve i od apoštolov i starešin nazveščajuči kulika Bog bi bil včinil z njimi.
- Podignuli su se pako nekoji zmed krivoverstva farizejuškoga koji su veruvali govoreči da je potrebno obrezavati nje i zapovedati takaj da obdržavaju zakon Mojžešev.
- I skupi zišli jesu apoštoli i stareši da vide od ove reči.
- Kad bi onda veliko zveđanje bivalo, stavši se Peter rekel je njim: „Ljudi bratja, vi znate da od starinskeh dnevih Bog med nami je odebral da po vustah mojeh naj čujeju poganini reč Evangelijuma i veruju.
- I koj pozna srca, Bog je svedočanstvo dal dajuči njim Duha Svetoga kak i nam
- i nikakov razluček ni včinil med nami i njimi z verum očiščujuči srca njihova.
- Sada anda kaj skušavate Boga hoteči naložiti jarem Zakona na šinjak vučenikov kojega niti oci naši niti mi nositi mogli jesmo?
- Nego po milošči Gospona Ježuša Krištuša verujemo da budemo zveličeni kak goder i oni.“
- Mučala je pako vsa vnožina i poslušali su Barnabaša i Pavla povedajuče kuliko Bog bi bil včinil znamenja i čuda med poganini po njih.
- I kad su zamuknuli, odgovoril je Jakop govoreči: „Ljudi bratja, posluhnete mene.
- Šimon je povedal kak je prvič Bog pohodil poganine da bi iz njih vzel puka na ime svoje.
- I z tem se slažeju reči prorokov kak pisano je:
- ʻZatem se povrnem i nazad zeziđem šator Davidov koj opal je i podrtine njegove nazad zeziđem i gore ga podignem
- da iščeju ostali ljudi Gospona i vsi poganini zvrhu kojeh zazvano je ime moje, veli Gospon koj čini ova.
- Znano je odveka Gosponu delo svoje.ʼ
- Zbog česa ja sudim naj se ne pokojiju oni koji se zmed poganinov obračaju k Bogu.
- Nego naj im se piše da se zdržiju od oskrunenja bolvanskoga i praznosti i zadavljenoga i krvi.
- Ar Mojžeš od starinskeh vremen ima po vseh varaših koji ga nazveščaju vu spraviščah gde se ob vsakoj soboti čteje.“
- Onda dopalo se je apoštolom i starešenam z vsum Cirkvum da se izbereju ljudi zmed njih i pošljeju vu Antiokiju z Pavlom i Barnabašem: Judaš, koj se je zval Barzabaš, i Silas, koji su bili prvi med brati,
- pisuči po rukah njihoveh: „Apoštoli i starešine brati, onem koji su v Antiokiji i Siriji i Ciliciji, bratom zmed poganinov, zdravje.
- Pokehdob čuli jesmo da nekoji zmed nas iziduči puntali su vas z rečmi potkapajuči duše vaše, kojem nesmo zapovedali,
- videlo se je nam skup zebranem zajedno izebrati ljudi i poslati k vam z najdragšemi našemi Barnabašem i Pavlom,
- z ljudmi koji su predali duše svoje za ime Gospona našega Ježuša Krištuša.
- Poslali smo anda Judaša i Silaša koji takaj sami vam z rečmi poveju ova ista.
- Ar videlo se je Duhu Svetomu i nam da vam nikakovo breme više ne naložimo, nego ova potrebna.
- Da se zdržavate vi od alduvanah bolvanom i krvi i zadavljenoga i praznosti od kojeh zdržavajuči sebe dobro činite. Zdravi ostanete.“
- Oni anda otpuščeni išli su dole vu Antiokiju i skup spravivši vnožinu, predali su lista.
- Kojega kad bi bili prečteli, veselili su se nad obatrivenjem.
- Judaš pako i Silas, pokehdob su takaj sami proroki bili, z vnogemi rečmi batriveli jesu brate i potvrđavali.
- Sprevodivši pako onde nekoje vreme, otpuščeni jesu vu miru od bratov k onem koji su je poslali.
- Videlo se je pako Silašu da bi tam ostali, Judaš pako sam odišel je vu Jeruzalem.
- Pavel pako i Barnabaš jesu se zadržavali vu Antiokiji vučeči i nazveščajuči z vnogemi drugemi reč Gosponovu.
- Za nekulikemi pako dnevi rekel je Barnabašu Pavel: „Povrnuvši se pohodemo brate po vseh varaših vu kojeh smo nazveščali reč Gosponovu, kak se nahađaju.“
- Barnabaš pako hotel je z sobum vzeti takaj Ivana koj se je zval Marko.
- Pavel pako prosil je njega (da koj bi se bil odružil od njih iz Pamfilije i ne bi bil išel z njimi na deli) da se ne mora nazad prijeti.
- Nastala je pako nesloga tak da se razdružili jesu med sobum i Barnabaš, k sebi vzemši Marka, prepeljal se bi v Ciper.
- Pavel pako odebravši Silaša, na put se je povdal, preporučen milošči Božji od bratov.
- Ophađal je pako Siriju i Ciliciju potvrđavajuči cirkve, zapovedajuči obdržavati zapovedi apoštolov i starešin.
