Pavel vu Lištri prijetoga Timotejuša obrezal je i po razlučneh varašeh hodeči, zapoveda obdržavati apoštolov navuk vere; prepoveda se od Duha Svetoga nazveščati vu Aziji i Bitiniji; poklamkak je pako pozvan bil po viđenju Pavel vu Macedoniju, povdali se jesu na put i prvič Filipijancem nazveščajuči, na stan prijemlju se pri Lidije, nego kada bi bil ishičen po Pavlu duh vedovine, prešibrani postavljaju se vu vuzu gde po včinjenem potresu i rastrganeh njihoveh oklopih stražan vuze obrača se i drugi dan večniki prosiju da bi iz varaša izišel.
- Došel je pako v Derben i Lištru. I, nut, vučenik nekoj bil je onde z imenom Timotejuš, sin verne Židovke žene, oca poganina.
- Ovomu jesu bratja koja su bila vu Lištri i Ikonijumu dobro svedočanstvo davali.
- Ovoga je hotel Pavel z sobum na put vzeti i vzemši obrezal je njega zarad Židovov koji su bili vu oneh mestah. Ar znali su vsi da otec njegov bil je poganin.
- Kad bi pako ophađali varaše, zapovedali su njim čuvati navuke koji su bili naređeni od apoštolov i starešin koji su bili vu Jeruzalemu.
- I cirkve zadnjič potvrđavale su se vu veri i obiluvale vu broju vsaki dan.
- Ophodivši pako Frigiju i Galacije državu, prepovedano je njim od Duha Svetoga govoriti reč Božju vu Aziji.
- Kad bi pako došli bili vu Miziju, skušavali su iti vu Bitiniju i ni pustil nje Duh Sveti.
- Kada bi pako obišli bili Miziju, išli su dole vu Troadu
- i viđenje po noči skazalo se je Pavlu: človek nekoj macedonski stal je pred njim proseči njega i govoreči: „Hodi vu Macedoniju i pomagaj nam.“
- Kak je pako viđenje videl, sproti iskali smo iti vu Macedoniju, stalni buduči da nas je Bog zval njim Evangelijum nazveščati.
- Odbrodeči pako od Troade z ravnem tečajem došli smo v Samotraciju, a buduči dan v Nejapoliš.
- Odonud pako vu Filipis koj je prvi strane macedonske varaš. Bili smo pako vu varašu ovem nekuliko dnevov prebivajuči. Ita Vand. Rus. et Germ. ver.
- Ob sobotnem pako danu izišli smo van zvun vrat k potoku gde su molitvu držali i sedeči govorili jesmo ženam koje se skup izišle jesu.
- I žena nekoja z imenom Lidija, koja škrlat je prodavala z varaša tijatirenskoga, bogaboječa, je poslušala i Bog otprl je srce njejino da bi pazila na ona koja se od Pavla govorila jesu.
- Kad pako bi bila okrščena i hiža njejina, prosila je govoreča: „Ako ste me sudili vernu Gosponovu biti, vleznite vu hižu moju i ostanete“. I primorala je nas.
- Dogodilo se je pako, kada smo išli k molitvi, da nam je dekljič nekoja, imajuča duha vedovine, naproti došla, koja dobička velikoga doprinašala je gospodarom svojem buduča zgađajuč.
- Ova nasledujuča Pavla i nas, kričala je govoreča: „Ovi ljudi jesu službeniki Boga višnjega, koji nazveščaju vam puta zveličenja.“
- To pako je delala vnogo dni. Žalosteči se pako Pavel i obrnuvši se, rekel je duhu: „Zapovedam ti vu imenu Ježuša Krištuša iziti iz nje.“ I izišel je onu istu vuru.
- Videči pako gospodari njejine da je odišlo ufanje dobička njihovoga, pograbivši Pavla i Silaša zapeljali su na trg pred poglavare
- i postavivši nje pred večnike, rekli jesu: „Ovi ljudi burkaju varaš pokehdob su Židovi
- i nazveščaju šegu koju nam ni slobodno prijeti niti včiniti pokehdob smo Rimljani.“
- I skup se je steklo ljudstvo proti njim i večniki rastrgavši oprave njihove zapovedali su nje šibrati.
- I kad bi bili vnogo vudarcov njim naložili, vrgli su je vu vuzu zapovedajuči stražanu da bi nje marljivo stražil.
- Koj, kad bi bil takovu zapoved dobil, vrgel je nje v nuternju vuzu i noge njihove z kladum stisnul.
- Ob pol pako noči Pavel i Silaš moleči hvalili su Boga i poslušali su nje koji su pod stražum bili.
- Nanaglom pako nastal je potres velik natuliko da se temelji vuze genuli jesu. I sproti otprla se jesu vsa vrata i vseh oklopi razvezal[i] .
- Prebudivši se pako stražan vuze ter videči vrata vuze otprta, stegnuvši meča, hotel se je vumoriti štimajuči da su vuzniki pobegnuli.
- Kričal je pako Pavel z velikem glasom govoreči: „Ne včini si nikaj zla ar vsi jesmo ovde.“
- I proseči sveču, vleznul je nuter i prestrašen opal je na noge pred Pavla i Silaša
- i ispeljavši nje van, reče: „Gospoda, kaj mi je včiniti da zveličen postanem?“
- A oni rekli su: „Veruj vu Gospona Ježuša i zveličiš se ti i hiža tvoja.“
- I govorili su njemu reč Gosponovu i vsem koji bili su z njim vu hiži.
- I vzemši je k sebi vu onoj vuri noči, ispral je rane njihove i okrščen je on sam i vsa hiža njegova sproti.
- Kad bi je bil zapeljal vu hižu svoju, prestrl je njim stola i veselil se je z vsum hižum svojum verujuči Bogu.
- Kad bi bil pako dan nastal, poslali su večniki hahare govoreči: „Ispusti ljudi one.“
- Obznanil je pako stražan vuze reči ove Pavlu da „su poslali večniki da se ispustite, sada anda iziduči hote vu miru“.
- Pavel pako rekel je njim: „Preharjene nas očivesto, neopsuđene ljudi rimske vrgli su vu vuzu, a sada nas skrovce van izganjaju? Ne bude tak, nego naj dojdu
- ter oni sami naj nas ispeljaju.“ Nazvestili su pako večnikom hahari reči ove. I bojali su se čuvši da su Rimljani
- i dojduči prosili su je za otproščenje i ispeljavši prosili su da bi iz varaša van išli.
- Iziduči pako iz vuze, vleznuli su k Lidije i videči brate, batriveli su nje i odišli.
