Kada bi bil včinjen vu Tesaloniki veliki napredek po Pavlovom prodekuvanju, obudi se proti njemu od Židovov punta, ravno tak i vu Bereji; Pavel se v Ateni z Židovi i mudroznanci pregovarja i Dionizijuša, pravičnoga suda tolnačnika, k Krištušu obrača jošče z nekojemi drugemi.
- Kada bi pako obišli bili Amfipoliša i Apoloniju, došli jesu vu Tesaloniku gde bila sinagoga židovska.
- Poleg navade pako zašel je Pavel k njim i čez tri sobote govoril je njim od Pismih
- otpirajuči i naprvo stavljajuči da Krištušu potrebno je bilo trpeti i gore stati se od mrtveh i da „ov je Ježuš Krištuš kojega ja nazveščam vam“.
- I nekoji zmed njih veruvali jesu i pridružili se jesu k Pavlu i Silašu i od klanjajučeh se i poganinov velika vnožina i žen plemeniteh nemalo.
- Nenavideči pako Židovi i vzemši zmed prostoga puka nekoje hmanje ljudi i skup zebravši se, spuntali su varaša i postavivši se pred hižu Jazonovu, iskali su nje ispeljati med ljudstvo.
- I kad ne bi bili našli nje, vlekli su Jazona i nekoje brate k poglavarom varaša kričeči da „ovi koji ves svet puntaju i sada su sim došli,
- koje prijel je Jazon i ovi vsi proti odlučenjam cesarskem baračeju govoreči da je drugi kralj, Ježuš“.
- Spuntali su pako ljudstvo i poglavare varaške čujuče ova.
- I vzemši zadovoljščinu iz Jazona i od ostaleh, otpustili su nje.
- Bratja pako sproti po noči otpravili su Pavla i Silaša vu Bereju. Koji, kad bi bili došli, vu sinagogu židovsku vleznuli jesu.
- Ovi pako bili su plemeniteši od Tesalonijancev, ko[ji] prijeli jesu reč z vsum pohlepnostjum, vsaki dan razmišljavajuči Pisma je li se ova tak imaju.
- I vnogi zadnjič veruvali jesu zmed njih i žen poganinskeh pošteneh i mužev nemalo.
- Kada pako bi bili zezvedali vu Tesaloniki Židovi da takaj vu Bereji nazveščena je od Pavla reč Božja, došli su i tam burkajuči i puntajuči vnožinu.
- I sproti su onda Pavla otpravili brati da bi išel do morja, Silaš pako i Timotejuš jesu ostali tam.
- Koji pako sprevađali jesu Pavla, dopeljali su ga tja do Atene i dobivši zapoved od njega na Silaša i Timotejuša da bi kaj najbržeše došli k njemu, odišli jesu.
- Pavel pako kad bi nje vu Ateni čakal, razljutil se je vu njem duh njegov videči bolvanstvu povdanoga varaša.
- Pregovarjal se je anda vu sinagogi z Židovi i klanjajučemi se i na trgu i vsaki dan z onemi koji su nazoči bili jesu.
- Nekoji pako epikurijanski i stojikanski mudroznanci pregovarjali su se z njim i nekoji rekli jesu: „Kaj hoče ov žlabravec reči?“, drugi pako: „Noveh vragov vidi se nazvestitel biti.“, pokehdob im je Ježuša i gorevstajanje nazveščal.
- I pograbivši njega peljali su v sudbeni dvor govoreči: „Je li moremo znati kakov je to novi koj se od tebe poveda navuk?
- Ar nova nekoja prinašaš k vuham našem, hočemo anda znati kaj ova hočeju biti.“
- (Atenijanci, pako vsi i prihodniki stanovniki v ničem drugem vremena tak trošiju kak kaj novoga povedati ali poslušati).
- Stoječi pako Pavel na sredini sudbenoga dvora, reče: „Ljudi atenijanski, zvrhu vsega kakti krivoverneše vas vidim.
- Ar prehađajuči i videči bolvane vaše našel sem takaj oltar na kojem pisano je bilo: ʻNEZNANOMU BOGUʼ, čemu se anda neznajuči klanjate, to ja nazveščam vam.
- Bog koj stvoril je sveta i vsa koja vu njem jesu, ov, pokehdob Neba i Zemlje je Gospon, ne stanuje vu cirkvah z rukami napravljeneh
- niti se od ruk človečanskeh ne časti kak da bi on kaj potrebuval, pokehdob on dava vsem žitek i dihanje i vsa.
- I načinil je iz jednoga ves narod človečanski da prebiva na svem licu Zemlje dokončavši odlučena vremena i međe prebivanju njihovomu
- da iščeju Boga ako bi ga morebiti doteknuli ali našli akoprem neje daleko od vsakoga zmed nas.
- Ar vu njem živemo i gibljemo se i jesmo kak takaj nekoji zmed vašeh vitiznancev rekli jesu: ʻAr i pleme njegovo jesmo.ʼ
- Pokehdob anda pleme Božje jesmo, ne moremo štimati da božansko zlatu ali srebru ali kamenu z meštrijum zdubljenomu ali misli človečanskoj je spodobno.
- I vremena zadnjič ove neznanosti pregledajuči, Bog vezda nazvešča ljudem da vsi povsud pokoru naj delaju
- zato kajti odlučil je dan vu kojem sudil bude sveta vu pravednosti po človeku vu kojem je odlučil, veru dajuči vsem izbudivši njega od mrtveh.“
- Kad bi pako čuli bili od gorestajanja mrtveh, nekoji su se zadnjič zesmehavali, nekoji pako rekli jesu: „Budemo te od toga opet poslušali.“
- I ovak je izišel Pavel izmed njih.
- Nekoji pako ljudi, pridruživši se k njemu, veruvali jesu, med kojemi je bil Dijonizijuš, pravičnoga suda tolnačnik, i žena z imenom Damaris i drugi z njimi.
