Kada bi bil Pavel za spričavanje svoje povedal obrnenja svojega pripečenje, kriče Židovi da se naj iz sveta pogubi zato kajti go[vo]ri da od Boga je poslan za nazveščati poganinom, na zapoved pako jezernika šibran i mučen, oslobođen je povedajuč da je varaščan rimski.
- „Ljudi bratja i oci, posluhnete kakov vam sada dajem izgovor.“
- Kad pako bi bili čuli da njim vu židovskom jeziku govori, jošče su bolje tiho bili.
- I reče: „Ja sem človek Židov, rođen vu Taržušu Cilicije, otkojen pako vu varašu ovem, pri nogah Gamalijela, podvučen po istini vu ocev vašeh Zakonu, zažgani naslednik Zakona kak ste vi vsi denešnji dan,
- koj sem puta ovoga preganjal tja do smrti vezuči i izdajuči vu vuze muže i žene,
- kak poglavar aldovnički meni svedočanstvo daje i vsi starešine od kojeh liste dobivši, išel sem k bratom vu Damašk da bi dopeljal odonud zvezane vu Jeruzalem da bi se kaštigali.
- Včinjeno je pako, kada sem išel i približaval se Damašku ob poldana, nanaglom je mene iz neba opsijala velika svetlost
- i opadivši na tla, čul sem glasa govorečega meni: ʻŠavel, Šavel, kaj me preganjaš?ʼ
- Ja pako odgovoril jesem: ʻGdo si Gospone?ʼ I rekel je meni: ʻJa sem Ježuš Nazarenski kojega ti preganjaš.ʼ
- I koji z menum bili jesu, svetlost zadnjič videli jesu, glasa pako čuli nesu onoga koj govoril je z menum.
- I rekel sem: ʻKaj mi je činiti, Gospone?ʼ Gospon pako rekel je meni: ʻStavši se hodi vu Damaškuš i tam se tebi poveju vsa koja su potrebna tebi činiti.ʼ
- I pokehdob ne bi videl zbog jasnosti svetlosti one, za ruku vođen od tovarušev došel sem vu Damaškuš.
- Nekoj pako Ananijaš, človek poleg Zakona svedočanstvo imajuč od vseh tam stanujučeh Židovov,
- dojduči k meni i postoječi pred menum, rekel je meni: ʻŠavel, brate, preglej!ʼ I ja sem onu istu vuru v njega pogledal.
- A on rekel je: ʻBog ocev našeh je te preodebral da bi spoznal volju njegovu i videl Pravičnoga ter čul glasa z vust njegoveh
- ar budeš svedok njegov pred vsemi ljudmi od oneh koja videl i čul jesi.ʼ
- I sada kaj odvlačiš? Stani gore, okrsti se i otperi grehe tvoje zazavujuči ime njegovo.
- Včinjeno je pako, kada se jesem povrnul vu Jeruzalem i molil vu Cirkvi, postal sem osupnjen
- i videl sem njega govorečega meni: ʻŽuri se i izidi brzo iz Jeruzalema ar ne primeju svedočanstvo tvoje od mene.ʼ
- I ja rekel sem: ʻGospone, oni znaju da sem ja vu vuzu zapiral i bičuval vu spraviščah one koji su vu te veruvali
- i kada bi se prelevala krv Štefana, svedoka tvojega, ja sem poleg stal i privoljil ter čuval opravu oneh koji su ga vmarjali.ʼ
- I rekel je meni: ʻHodi, ar ja tebe med poganine dalko pošljem.ʼ“
- Poslušali su ga pako tja do reči ove i zdignuli glasa svojega govoreči: „Pogubi iz zemlje takovoga ar neje vredno da žive.“
- Kada su pako oni kričali i oprave svoje othitavali ter prah v zrak hitali,
- zapovedal je jezernik zapeljati ga vu šatore vojničke i bičuvati i mučiti da bi zezvedel zbog kakovoga zroka bi tak kričali na njega.
- Kad bi ga pako zvezal bil z remenjem, rekel je poleg njega stoječemu stotniku Pavel: „Je li je vam slobodno človeka rimskoga i neopsuđenoga bičuvati?“
- Kaj čuvši stotnik pristupil je k jezerniku i obznanil njemu govoreči: „Kaj budeš činil? Ar človek ov je varaščan rimski.“
- Pristupivši pako jezernik rekel je njemu: „Poveđ mi, je li si ti Rimljan?“ A on rekel je: „Jesem.“
- I odgovoril je jezernik: „Ja sem si za vnoge peneze varaščanstvo ovo preskrbel“. A Pavel reče: „Ja pako i rođen jesem vu njem“
- Sproti anda odstupili su od njega koji su ga mučiti imeli. Jezernik takaj bojal se je poklamkak je zeznal da bi bil varaščan rimski ter da ga je bil zvezati dal.
- Drugi pako dan hotejuči zeznati zvršeneše zbog kakovoga zroka bi se tužil od Židovov, razvezal ga je i zapovedal aldovnikom skupa dojti i celomu spravišču i naprvo dopeljavši Pavla postavil ga je pred nje.
