Pavlu, idučemu vu Jeruzalem po razlučneh brodenjih, prenazvešča Agabus prorok traplenja koja pretrpel bude vu Jeruzalemu, né se vendar po suzah prijatelov odvrnuti mogel da ne bi vu Jeruzalem gore išel pripraven za Krištuša takaj smrt podnesti i kad bi bil vu Jeruzalem došel, svetuval mu je Jakop da bi se z petemi ljudmi zagovor imajučemi posvetil, kaj kad bi včinil, pograbi se od Židovov, ali iz ruk njihoveh istrgne se od jezernika od kojega z lanci zvezan vodi se vu šatore vojničke, isprosi vendar dopuščenje govoriti ljudstvu.
- Kada bi se bilo pako dogodilo da bi brodili odruženi od njih, ravnem tečajem došli smo vu Kous, a buduči dan vu Roduš i odonud vu Pataru.
- I kada bi bili našli ladju prek brodeču vu Feniciju, vu nju stupivši, odbrodili smo.
- Kada smo pako Cipruša zagledali, ostavivši njega na levoj strani, brodili smo vu Siriju ter došli vu Tiruš ar onde imela je ladja trh svoj istovoriti.
- Kada pako bi bili našli vučenike, ostali smo onde sedem dnevov, koji su Pavlu govorili po Duhu da ne bi gore išel vu Jeruzalem.
- Ali poklamkak se dnevi ispunili jesu, povdavši se na put, odišli jesmo i sprevađali su nas vsi z ženami i decum tja zvun varaša i poklekši na kolena pri obrežju, molili jesmo.
- I kada se jesmo spričali med sobum, stupili smo vu ladju, oni se pako povrnuli jesu vu svoja.
- Mi pako dokončavši brodenje, od Tiruša išli smo dole vu Ptolomajis i pozdravivši brate, ostali smo jeden dan pri njih.
- Drugi pako dan otputujuči, došli smo vu Cezareju i vleznuvši vu hižu Filipa evangelište, koj bil je jeden zmed sedmeh, ostali smo pri njem.
- Ov pako imel je četiri kčere, divojke prorokujuče.
- I kad bi se nekuliko dnevov onde zadržavali, nadošel je nekoj iz Judeje prorok z imenom Agabuž.
- Ov kada bi bil došel k nam, vzeme pojas Pavlov i zvezavši sebi ruke i noge, rekel je: „Ova veli Duh Sveti: ʻČloveka kojega je pojas ov ovak vezali budu vu Jeruzalemu Židovi ter izdaju vu ruke poganinom.ʼ“
- Kaj kad bi bili čuli, prosili smo mi i koji su vu onem mestu bili da ne bi išel gore vu Jeruzalem.
- Onda odgovoril je Pavel i rekel: „Kaj delate plačuči se i trapeči srce moje? Ar ja ne lestor zvezati se dati, nego i vumreti vu Jeruzalemu pripraven jesem zbog imena Gospona Ježuša.“
- I pokehdob ga odgovoriti ne bi mogli, vpokojili smo se govoreči: „Naj bu volja Gosponova.“
- Za dnevi pako ovemi pripravljeni išli smo gore vu Jeruzalem.
- Išli su pako i zmed vučenikom od Cezareje z nami dopeljavši z sobum pri kojem bi stanuvali Mnazona, nekojega Ciprijanca, starinskoga vučenika.
- I kad bi bili došli vu Jeruzalem, radi su nas prijeli brati.
- Buduči pako dan išel je Pavel z nami k Jakopu i vsi starešine skup se zebrali jesu.
- Koje kad bi bil pozdravil, pripovedal je njim jedno za drugem kaj je Bog včinil med poganini po službi njegovoj.
- A oni kad bi bili čuli, velikodičili jesu Boga i rekli su njemu: „Vidiš, brate, kuliko jezer je Židovov koji veruvali jesu i vsi su zažgani nasledniki Zakona.
- Čuli su pako od tebe da odstuplenje vučiš od Mojžeša vse one Židove koji su med poganini govoreči da ne moraju obrezavati sine svoje niti po Mojžeševoj navadi hoditi.
- Kaj je anda činiti? Potrebno je zaisto vsoj vnožini skupa se iziti ar začuju da si nadošel.
- To anda včini kaj ti rečemo: imamo četiri ljudi imajuče zagovor na sebi.
- Ove vzemši k sebi, posveti se z njimi i troši na nje da si obriju glave i zezveju vsi da koja su od tebe čuli, lažljiva jesu, nego hodiš takaj sam obdržavajuči Zakona.
- Od oneh pako koji veruvali jesu zmed poganinov, mi pisali jesmo dokončavši da se zdržiju od bolvanov, od njim zaklanoga i krvi i zadavljenoga i praznosti.“
- Onda Pavel, vzemši k sebi ljudi, drugi dan očiščen z njimi vleznul je vu Cirkvu nazveščajuči ispunenje dnevov očiščavanja njihovoga doklam bi se za vsakoga zmed njih aldov donesel.
- Kada bi se pako sedem dnevi ispunili, jesu oni Židovi koji su iz Azije bili, kada bi ga bili videli vu Cirkvi, spuntali ves puk i ruke na njega položili kričeči:
- „Ljudi Izraelci, pomorete, ov je človek koj proti puku i Zakonu i mestu ovomu vse vsigdi vučeči, zvun toga i poganine vpeljal je vu Cirkvu i oskrunil sveto mesto ovo.“
- Ar videli su Trofimuša Efezijanca vu varašu z njim, kojega su preštimavali da ga je Pavel vu Cirkvu nuter zapeljal.
- I zburkal se je ves varaš i skup steklo se je ljudstvo. I pograbivši Pavla, vlekli su ga van z Cirkve i sproti su zaprta vrata.
- Iščuči pako njega vmoriti, obznanjeno je jezerniku vojske da se ves Jeruzalem je zmutil.
- Koj sproti vzemši z sobum vojnike i stotnike, tekel je dole k njim. Koji kad bi bili videli jezernika i vojnike, prestali su biti Pavla.
- Onda pristupivši jezernik pograbil je njega i zapovedal njega zvezati z dvemi lanci i spitaval ga je gdo bi bil i kaj bi bil včinil.
- Jedni pako med ljudstvom jesu jedno, a drugi kaj drugoga kričali. I pokehdob ne bi mogel nikaj stanovitoga zezvedeti pred halabukum, zapovedal ga je vu šatore vojničke otpeljati.
- I kada bi bili došli k stupajom, dogodilo se je da bi se nosil od vojnikov zbog sile ljudstva.
- Ar je za njim išla vnožina ljudstva kričeča: „Pogubi ga!“
- I kada bi se bil imel peljati vu šatore vojničke, Pavel rekel je jezerniku: „Je li mi je slobodno kaj govoriti tebi? “ Koj rekel je: „Znaš grčki?
- Ne li ti si Egiptonec koj si pred ovemi nekulikemi dnevi puntu podignul i ispeljal si van vu puščinu četiri jezer ljud najemneh ljudomorcev?“
- I rekel je njemu Pavel: „Ja sem zadnjič človek Židov tarzijanski, jednoga neposlednjega varaša Cilicije varaščan. Prosim pako tebe, dopusti mi govoriti puku.“
- I kada bi mu bil dopustil, Pavel stoječi na stupajih, mahal je z rukum ljudstvu i kada bi bila velika tihoča nastala, pregovoril je k njim vu židovskem jeziku govoreči:
