Poklamkak bi bil Pavel obišel razlučene stranke macedonske i grčke zemlje, nazvešča vu Troadi do pol noči i kad bi mladenec Euklid, opadivši iz tretjega hižoreda, vumrl bil, Pavel obudil je njega i ophodivši razlučna mesta, skup zezvane iz Efeza mašnike opomina da skoznujuči budu vu ravnanju Cirkve prenazveščujuči da ga več ne budu videli.
- Kad se je pako vtišila punta, pozvavši Pavel vučenike i opomenuvši nje, spričal se je i povdal se je na put proti Macedoniji.
- Kad bi bil pako obišel stranke one i opomenul nje z vnogemi rečmi, došel je vu grčku zemlju.
- Gde kad bi bil sprevodil tri meseca, načinjeni bili jesu njemu zasedi od Židovov, hotečemu prebroditi se vu Siriju, i dokončal je vu sebi da bi se nazad povrnul čez Macedoniju.
- Sprevađal je pako njega Sopater, Pirhov sin iz Bereje, zmed Tesalonijancev pako Aristarkus i Sekundus i Gajuž Derbenski i Timotejuš, zmed Azijancev pako Tikikuž i Trofimuž.
- Ovi pokehdob su naprvo prešli, čakali su na nas v Troadi,
- mi pako odbrodili jesmo po vuzmenskeh dnevih iz Filipe i došli smo k njim v Troadu vu peteh dnevih gde se zadržavali jesmo sedem dnevov.
- Vu jednu pako sobotu kad bi se bili skup izišli na kruha lamanje, Pavel pregovarjal se je z njimi hoteči drugi dan oditi i odvlekel je govorenje svoje tja do pol noči.
- Bile su pako vnoge svetnice vu večeralnici gde smo bili skup spravljeni.
- Sedeči pako nekoj mladenec z [imenom] Eutikuž na obloku, kada bi ga gluboki senj ophađal doklam se je dugo pregovarjal Pavel, premahnjen vu snu opal je iz tretjega hižoreda dole i bil je mrtav gore zdignjen.
- K kojemu kada bi bil dole izišel Pavel, vlegel se je čez njega i obimajuči rekel je: „Najte se starati ar duša njegova je vu njem.“
- Iziduči pako gore i lamajuči kruh ter kušajuči i dosta nagovarjal do zorje, tak se je na put povdal.
- Dopeljali su pako dečaka živoga i razveselili su se najmenje.
- Mi pako stupivši vu ladju, odbrodili smo vu Ason gde smo hteli k sebi vzeti Pavla ar on si je bil sam tak naprv zel pokehdob je hotel po suhem iti.
- Kada pako bi se bil izišel z nami vu Asonu, vzemši njega došli smo v Mitelenu.
- I odonud odbrodivši, buduči dan došli smo naproti Kijuzu, a drugi dan pribrodili smo k Samusu i buduči dan došli smo v Milet.
- Ar vzel si je naprvo Pavel mimo Efezuša prebroditi da ga ne bi kaj vu Aziji zadržalo. Ar žuril se je ako mu moguče bi bilo da bi Trojački dan opslužaval v Jeružalemu.
- Od Miletuša pako poslavši vu Efezuš, pozval je starešine Cirkve.
- Koji kad bi bili došli k njemu i skupa bili, rekel je njim: „Vi znate od prvoga dana v kojem došel sem vu Aziju kak sem bil z vami v vsakem vremenu
- služeči Gosponu z vsum poniznostjum i suzami i skušavanji koja se meni zgađala jesu po zasedih židovskeh,
- kak nikaj nesem zamudil hasnoviteh da ne bi nazveščal vam i navučal vas očivesno i po hižah
- svedočeči Židovom i poganinom pokoru k Bogu i veru vu Gospona našega Ježuša Krištuša.
- I, nut, sada zvezan ja vu duhu idem vu Jeruzalem, koja se meni vu njem pripetiju, ne znam,
- nego da Duh Sveti po vseh varaših meni svedoči govoreči da me vezanja i stiske vu Jeruzalemu čakaju.
- Ali se nikaj oveh ne bojim niti ne činim živlenje moje dragše kak mene, lestor da dokončam tečaj moj i službu reči koju prijel jesem od Gospona Ježuša da svedočim Evangelijum milošče Božje.
- I, nut, sada ja znam da več ne budete videli obraza mojega vsi vi med kojemi prehađal jesem nazveščajuči Kraljestvo Božje.
- Zato svedočim vam na dan današnji da sem čist od krvi vseh.
- Ar se nesem vugibal da vam ne bi nazveščal ves tolnač Božji.
- Pazete na vas i na vsu čredu vu kojoj vas Duh Sveti postavil je biškupe da ravnate Cirkvu Božju koju je dobil po krvi svojoj!
- Ja znam da vlezneju po othotku mojem vuki zgrabljivi med vas nemilujuči čredu.
- I zmed vas sameh podigneju se ljudi govoreči spačljiva da otpeljaju vučenike za sobum.
- Zbog česa skoznujte na pameti obdržeči da čez tri leta noč i dan nesem prestal z suzami opominajuči vsakoga zmed vas.
- I sada preporučam vas Bogu i reči milošče njegove koj mogučen je popraviti i dati odvečtvo med vsemi posvečenemi.
- Srebro ali zlato ali opravu nesem od nikoga poželel, kak
- sami znate, pokehdob za ona koja meni potrebna bila jesu i onem koji z menum bili jesu, služile su ruke ove.
- Vsa sem vam pokazal pokehdob tak delajuči potrebno je prijemati betežne i spomenuti se iz reči Gospona Ježuša ar on rekel je: ʻBlaženeše je bolje dati kak vzeti.ʼ“
- I kada bi bil ova zgovoril, poklekši na kolena svoja, molil je z vsemi onemi.
- Vsi se pako začeli jesu kruto plakati i ogrlujuči Pavla, kušuvali su njega
- žalosteči se najbolje nad rečjum koju rekel je da več ne budu lica njegovoga videli. I sprevodili su njega na ladju.
