Pavel vu Efezušu nekoje vučenike z Ivanovem lestor krstom krščene zapoveda vu imenu Ježuševem krstiti ter po ruknastavljanju Duha Svetoga njim sprosi ter onde prodekujuči vnoga čini znamenja od Židovov koji neverujuči trsili se jesu vu imenu Ježuševem od Pavla nazveščenem zaklinjati duhe nečiste; vnogi grehe spovedajuči, knjige šatrinske požgeju; Demeter srebrnar veliku proti Pavlu puntu obudi koju z teškočum zadnjič vtiši Aleksander.
- Včinjeno je pako, kada bi bil Apolo vu Korintušu, da bi Pavel, poklamkak bi bil obišel gornje stranke, došel vu Efezuš ter našel nekoje vučenike
- i rekel je njim: „Je li jeste Duha Svetoga prijeli verujuči?“ A oni rekli jesu njemu: „Mi niti jošče nismo čuli da je Duh Sveti.“
- On pako reče: „V kem ste vi anda krščeni?“ Koji rekli jesu: „Vu Ivanovem krstu.“
- Rekel je pako Pavel: „Ivan je krstil z krstom pokore ljudstvo govoreči da bi vu njega koj za njim došel bude veruvali, to je vu Ježuša.“
- Poklamkak bi bili ova čuli, krščeni jesu vu imenu Gospona Ježuša.
- I kad bi im bil nastavil ruke Pavel, došel je Duh Sveti zvrhu njih i govorili su z jeziki i prorokuvali.
- Bilo ih je pako vseh skupa okolo dvanajst ljudih.
- Vleznuvši pako vu sinagogu, z srdečnostjum je govoril čez tri meseca pregovarjajuči se i nagovarjajuči od Kraljestva Božjega.
- Pokehdob pako bi se nekoji vtvrdokorili i ne bi veruvali blazneči puta Gosponovoga pred vnožinum, odiduči od njih, odlučil je vučenike vsaki dan pregovarajuči se vu vučilnici nekojega Silovitoga.
- To pako bivalo je čez dva leta tak da vsi koji prebivali jesu vu Aziji bi čuli reč Gosponovu, Židovi i poganini.
- I čuda ne kakve goder činil je Bog po rukah Pavla
- tak da su takaj zvrhu nemočneh nosili od tela njegovoga brisače i opasnice i odstupili su od njih betegi i duhi hudi ishađali.
- Kušali jesu pako nekoji zmed okolo hodečeh Židovov vrage izganjajučeh nazivati zvrhu njih koji imeli jesu duhe zle ime Gospona Ježuš govoreči: „Zaklinjam vas po Ježušu kojega Pavel nazvešča.“
- Bili su pako nekoji Židovi, Scevaša, poglavara aldovničkoga, sedem sini, koji su to delali.
- Odgovorivši pako duh hmanji rekel je njim: „Ježuša poznam i Pavla znam, vi pako gdo jeste?“
- I zaskočivši na nje človek vu kojem bil je duh najgrozoviteši i pod se spravivši zmed njih dva, obladal je nje tak da su goli i ranjeni pobegnuli iz hiže one.
- To pako znano včinjeno je vsem Židovom i poganinom koji su stanuvali vu Efezušu i obišel je nje vse strah i velikodičili jesu ime Gospona Ježuša.
- I vnogi zmed verujučeh došli jesu valujuči i očitujuči čine svoje.
- Vnogi pako zmed oneh koji su šatrinske meštrije tirali znosili jesu knjige i zežgali su je pred vsemi nazoči i kad bi oveh cenu preračunali, znašli su vu penezih denarjov pedeset jezer.
- Tak močno rasla je reč Božja i potvrđavala se.
- Ova pako kada su ispunjena bila, vzel si je naprvo Pavel vu duhu da iduči čez Macedoniju i Akaju, pojde vu Jeruzalem govoreči da: „Poklamkak vre tam budem, potrebno je meni takaj Rima videti“.
- Poslavši pako vu Macedoniju dva zmed služečeh sebi, Timotejuša i Erastuša, sam je ostal za vreme vu Aziji.
- Včinjena je pako ono vreme zmutnja nenajmenša zbog puta Gosponovoga.
- Ar nekoj z imenom Demeter, srebrnar, delajuči srebrne hižice Dijani, daval je rukotvornikom nemaloga dobička,
- koje skup zvavši i one koji su ovakovoga bili rukotvorstva i rekel njim: „Ljudi, znate da mi od ovoga rukotvorstva dobiček imamo,
- sada pako i vidite i čujete da ov Pavel ne lestor vu Efezu, nego skoro po vsoj Aziji nagovarjajuči odvrača veliku vnožinu govoreči da nesu bogi koji su z rukami napravljeni.
- Ne lestor pako ova pogibelnost je z naše strane da se ne zavrže meštrija naša, nego i velike Dijane cirkva bude za nikaj držana ali takaj zatirati se začme odičenost njejina kojoj se cela Azija i ves svet klanja.“
- Ova čuvši postali su srditi ter iskriknuli govoreči: „Velika Dijana Efezijancev!“
- I napunjen je varaš z mutnum i navalili su složno na gledališča mestu pograbivši Gajuša i Aristarkuša, Macedonijance, Pavloveh pajdašev.
- Pavlu pako, hotejučemu vleznuti med ljudstvo, nesu dopuščali vučenike.
- Nekoji pako takaj zmed Azije poglavarov, koji bili su prijateli njegovi, poslali su k njemu proseči da se ne bi dal v gledališča mesto,
- drugi pako drugo kričali jesu ar bilo je spravišče zmuteno i više ih ni znalo zbog kakovoga zroka bi se bili izišli.
- Zmed ljudstva pako potegnuli su naprvo Aleksandra kojega su naprvo tiskali Židovi. Aleksander pako, z rukam mahajuči da bi mučali, hotel se je zagovarjati pred ljudstvom.
- Kojega kak su spoznali da Židov je, jeden glas je včinjen od vseh stran skoro čez dve vure kričečeh: „Velika je Dijana efezinska!“
- I kada bi bil vtišil pisar vnožinu, rekel je: „Ljudi Efezijanci, gdo je zmed ljudih koj ne zna da efezinski varaš služi velikoj Dijani, kčeri Jupitrovi?
- Pokehdob anda ovem se suprot govoriti ne more, potrebno je da se vi vtišite i nikaj naglo ne činite.
- Ar dopeljali jeste ljudi ove, niti svetoskrunitele niti blazneče božicu vašu.
- Ako anda Demeter i koji z njim jesu rukotvorci imaju proti komu tužbu, sudnji zbori se držiju i namesniki večnički jesu, naj se tužiju med sobum.
- Ako pako kaj od drugoga dugovanja iščete, vu porednom zboru bude se moglo dokončati.
- Ar smo i tak vu pogibeli da se optužimo zbog denešnje punte pokehdob nigdo ni krivec (od kojega račun dati bi mogli) skupstekanja ovoga.“ I kada bi bil ova zgovoril, raspustil je spravišče.
