Feštuš ne privoljuje Židovom zasedljivo prosečem da se Pavel v Jeruzalem otpelja, nego vu Cezareji posluša optužitele njegove i Pavlove odgovore, koj od Feštuša opitan je li se zbog oveh vu Jeruzalemu suditi hoče, poziva se na cesara; Feštuš Pavlovu pravdu Agripi kralju nazveščuje koj njega čuti želi i drugi dan na zapoved Feštuševu zapelja se pred Agripu i Bernicu.
- Feštuš anda kada bi bil došel došel vu državu, za tremi dnevi išel je gore vu Jeruzalem od Cezareje.
- Došli su pako k njemu poglavari aldovnički i prveši zmed Židovov proti Pavlu i prosili su njega
- moleči za milošču proti njemu, da bi ga zapovedal peljati vu Jeruzalem zasede namenjujuči da bi ga na putu vmorili.
- Feštuš pako je odgovoril da se naj čuva Pavel vu Cezareji, da on pako naskorom bude tam othađal.
- „Koji anda med vami“, (veli), „premoguči jesu, naj takaj dole ideju i ako kakova je vu človeku krivnja, naj ga tužiju.“
- Zadržavajuči se pako med njimi ne več kak osem ali deset dnevov, išel je dole vu Cezareju i drugi dan držal je suda i zapovedal Pavla dopeljati.
- Koj kad bi bil dopeljan, stali su okolo njega Židovi koji su bili od Jeruzalema dole došli vnoge i teške tužbe naprvo donašajuči koje nesu mogli posvedočiti.
- Zagovarjajučemu sebe Pavlu: „Ar ja niti proti zakonu židovskomu niti proti Cirkvi niti proti cesaru nikaj nesem pregrešil.“
- Feštuš pako hoteči milošču iskazati Židovom, odgovorivši Pavlu rekel je: „Hočeš gore vu Jeruzalem iti ter onde zvrhu oveh suditi se po meni?“
- Rekel je pako Pavel: „Pred sudbenum stolicum cesarskum stojim, onde potrebno je mene suditi, Židovom nesem nikaj naškodil, kak to ti dobro znaš.
- Ar ako sem kriv i kaj smrti vrednoga včinil, ne kratim se vumreti, ako pako nikaj ni takovoga zbog česa ovi tužiju, nigdo me ne more njim predati. Na cesara pozivam.“
- Onda Feštuš z spraviščem dogovarjajuči se, odgovoril je: „Na cesara pozval se jesi? K cesaru pojdeš.“
- I kada bi nekuliko dnevov prešlo bilo, Agripa kralj i Bernice došli su dole vu Cezareju za pozdraviti Feštuša.
- I kad bi se više dnevov tam zadržavali, Feštuš je kralju povedal od Pavla govoreči: „Človek nekakov ostavljen je od Feliksa zvezan.
- Zbog kojega, doklam sem bil v Jeruzalemu, dohađali jesu k meni poglavari aldovnički i starešine židovski, proseči proti njemu opsuđenje.
- Kojem sem odgovoril da neje pri Rimljanih navada opsuditi kojega človeka predi kak on koj se tuži nazoči nema optužitele i mesto zagovarjati se ne dobi za očiščenje od pregreških.
- Pokehdob se anda sim skupa zišli jesu, prez vsakoga odvlačenja buduči dan držeči suda zapovedal sem dopeljati človeka.
- Proti kojemu kada se postavili jesu optužiteli, nikakovu krivnju nesu naprvo donašali, kaj bi bil mogel za zlo držati.
- Nego pitanja nekakova od krivoverstva svojega imeli su proti njemu i od nekakovoga mrtvoga Ježuša od kojega Pavel svedočil je da žive.
- Dvoječi pako ja zvrhu pitanja ovakovoga, rekel sem: ʻJe li ne bi htel iti vu Jeruzalem ter se onde zvrhu oveh suditi.ʼ
- Kada bi se pako Pavel na cesara pozval da se drži na cesarovo spoznanje, zapovedal sem ga držati doklam ga k cesaru pošljem.“
- Agripa pako rekel je Feštušu: „Hotel sem i ja človeka ovoga čuti.“ „Zutra“, veli, „budeš ga čul.“
- Drugi pako dan, kada bi bil došel Agripa i Bernice z velikum bahatnostjum i vleznuli vu sudbenu palaču z jezerniki i ljudi poglavitemi varaša, na zapoved Feštuša dopeljan je Pavel.
- I veli Feštuš: „Agripa kralj i vsi ljudi koji ovde z nami jeste, vidite ovoga kojega vsa vnožina Židovov potrebuvala je od mene vu Jeruzalemu, proseča i kričeča da ne sme on više živeti.
- Ja pako nikaj našel nesem da bi kaj smrti vrednoga on včinil. Pokehdob pako on sam se je pozval na cesara, tak sem sudil da ga pošljem.
- Od kojega kaj stanovitoga pisati gosponu nemam. Zbog česa jesem naprvo dopeljal njega pred vas, a navlastito pred te, Agripa kralj, da po včinjenem ispitanju imam kaj pisati.
- Ar se meni nespametno vidi poslati zvezanoga, pak proti njemu zroke ne obznaniti.“
