Del I.

Nabukodonozor oblada Arfaksada kralja medijanskoga, njegva oholost i fantljivost.

1. Arfaksad^*Arfaksad, Aphra-Xad, to je Fra-Ortež, to je Afra, veliki kralj medijanski kak ga imenuje Herodot, sin Dejioceža. Ksad je pridavek i znamenuje ʻDobrotivenʼ. anda^*Veznik anda pokažuje da ova dogodovščina je iz stareh židovskeh letnic zvađena. medijanski kralj je vnoge narode svojoj oblasti podložil i on je zezidal^*Zidati vu svetopismenem govorenju znamenuje višeputi takaj vtvrditi (Jož 6,6). Fra-Ortež je olepotil i vtvrdil od svojega oca Dejioceža zezidani varaš Ekbatana. kruto močni varaš kojega je on^*Tak kak vre njegov otec. Ekbataniž imenuval
2. iz četverovuglastoga i rezanoga kamenja: njegov zid je naredil sedemdeset laktov širok, a trideset laktov visok, njegve pako kule je vu višinu na sto laktov postavil
3. četverovuglaste i vsaka stran kul je vu širinu merila dvadeset cepelišev i varaška vrata je tak visoka naredil kak kule,
4. i on se je dičil z svojem mogučem vojnem šeregom i zaradi velikoga broja svojeh vozov.
5. Vu dvanajstem anda letu^*Vu letu po stvorjenem svetu 3333., a pred Krištuševem narođenjem 671. svojega kraljuvanja je vojuval Nabukodonozor, kralj asirijanski^*Ažarhadon koj se ovde imenuje Nabukodonozor kajti je takaj zvrhu Babilona kraljuval gde je navadno kraljevsko ime bilo Nabukodonožor, kak vu Egiptušu Farao, vu filistejanskem držanju Abimelek itd. Dvanajsto leto broji se od onda kak je bil on Babilona zavjel. koj je vu velikem varašu Ninive kraljuval, proti Arfaksadu i njega je obladal
6. na velikoj ravnici koja se zove Ragau, med potoki Eufrat, Tigris i Jadažon,^*Vu grčkem prenešanju čteje se potok „Hydaspes“. na ravnici Erioha kralja Elikov.^*Struke naroda elamitanskoga (perzijanskoga).
7. Onda je bilo Nabukodonozorovo kraljestvo izvišeno i njegvo srce je se prevzelo. I poslal je k vsem koji su prebivali vu Ciliciji i Damaškusu i na Libanu
8. i k narodom koji su bili na Karmelu i Cedaru^*Kedar, pastirski narod vu pusti Arabiji, od Libana proti sunčenomu ishodu, ishađajuči od Izmaela. V. 1Moj 25, 13. i k stanovnikom Galileje na velikoj ravnici Ezdrelon
9. i k vsem koji su bili vu Samariji i prek potoka Jordana tja do Jeruzalema i po vsoj zemlji Jese^*Zemlja Jese je zemlja Gožen, ali Gošen vu grčkem prenašanju, stanoviti kotar doljnega Egiptuša. dok se dojde k međam Etiopije,
10. k ovem vsem je poslal Nabukodonozor, kralj asirijanski, poslenike,^*Z zapovedjum da se podložiju.
11. ali vsi ovi jesu se jednovoljno suprotstavili i nje su prazne nazad poslali i prez poštenja otpravili.
12. Na to se je Nabukodonozor kralj razljutil proti vsoj ovoj zemlji i zaprisegel se je na svoju stolicu i svoje kraljestvo da se hoče nad vsemi ovemi državami fantiti.

Objašnjenje

• *
  Arfaksad, Aphra-Xad, to je Fra-Ortež, to je Afra, veliki kralj medijanski kak ga imenuje Herodot, sin Dejioceža. Ksad je pridavek i znamenuje ʻDobrotivenʼ. ↩︎
• *
  Veznik anda pokažuje da ova dogodovščina je iz stareh židovskeh letnic zvađena. ↩︎
• *
  Zidati vu svetopismenem govorenju znamenuje višeputi takaj vtvrditi (Jož 6,6). Fra-Ortež je olepotil i vtvrdil od svojega oca Dejioceža zezidani varaš Ekbatana. ↩︎
• *
  Tak kak vre njegov otec. ↩︎
• *
  Vu letu po stvorjenem svetu 3333., a pred Krištuševem narođenjem 671. ↩︎
• *
  Ažarhadon koj se ovde imenuje Nabukodonozor kajti je takaj zvrhu Babilona kraljuval gde je navadno kraljevsko ime bilo Nabukodonožor, kak vu Egiptušu Farao, vu filistejanskem držanju Abimelek itd. Dvanajsto leto broji se od onda kak je bil on Babilona zavjel. ↩︎
• *
  Vu grčkem prenešanju čteje se potok „Hydaspes“. ↩︎
• *
  Struke naroda elamitanskoga (perzijanskoga). ↩︎
• *
  Kedar, pastirski narod vu pusti Arabiji, od Libana proti sunčenomu ishodu, ishađajuči od Izmaela. V. 1Moj 25, 13. ↩︎
• *
  Zemlja Jese je zemlja Gožen, ali Gošen vu grčkem prenašanju, stanoviti kotar doljnega Egiptuša. ↩︎
• *
  Z zapovedjum da se podložiju. ↩︎