Del II.

Holoferneš oblada vnoge narode.

1. Vu trinajstem letu kralja Nabukodonozora,^*Trinajsto leto Nabukodonozorovo (Ažarhadanovo) slaže se primerom računa onoga katoličanskoga pismozveđavca Derezera z dvadeset i osmem letom kralja Manaseša, najmre z letom od stvorjenoga sveta 3334., a Krištuševoga narođenja 670. dvadeset i drugi dan prvoga meseca, je se vu hiži Nabukodonozora, kralja asirijanskoga, razglasila reč da se on kani fantiti.
2. I on pozove vse starešine i vse vojvode i svoje vojnike i z njimi je svoj skrovni tolnač držal.
3. I on je rekel da njegvo mišlenje tam cilja da vsu zemlju svojoj oblasti podloži.
4. Kad bi se ovo govorenje vsem bilo dopalo, pozove Nabukodonozor kralj Holoferneša, poglavara svoje vojske,
5. i reče njemu: „Izidi suprot vsem kraljestvam proti Sunčenomu zahodu, a navlastito proti onem koji su moje zapovedi zametavali.
6. Tvoje oko naj nijednomu kraljestvu ne oprosti i vsaki vtvrđeni varaš podloži meni.“
7. Onda pozove Holoferneš vođe i pretpostavljene asirijanskoj vojski i odbroji vojnike k boju kak mu je zapovedal kralj: 120 jezer hrabreneh pešcev i dvanajst jezer lukostrelcev na konjih.
8. I pred vsem svojem šeregom je puščal naprej iti gamile vu neizbrojenoj vnožini, skupa z stroškom vu obilnosti za bojni šereg, takaj črede volov i črede ovec kojeh ni bilo broja.
9. On je zapovedal da se ima žitek iz cele Sirije za njegvo prehađanje pripraviti.
10. Zlata pako i srebra je vzel iz kraljevske hiže zevsema vnogo.
11. I pošel je on sam i vsa vojska z vozmi i konjaniki i lukostrelci koji su zemlju kakti kobilice pokrili.
12. Poklamkam bi prek asirijanske pokrajnje bil prešel, došel je do velikeh gor Ange,^*Ange je stranka one velike tauruške gore koja ima razlučna imena. koje leže na levi strani^*Med sunčenem zahodom i severom. Cilicije, i izišel je na vse njihove grade i predobil je vse tvrđave.
13. I on najglasoviteši varaš Meloti^*Varaš Maluš vu Ciliciji. V. 2Mak 4,30. je on razbil i oplenil vse sine Tarziša^*Drugač Taržuš zvan, domorodni varaš svetoga Pavla apoštola. i sine Izmaela^*Oni po arapski puščini okolo skitajuči se izmajelitanski pastiri. koji su proti puščini i proti poldnevu zemlje Celon^*Neznana. prebivali.
14. I prešel je prek Eufrata i došel vu Mezopotamiju^*Vu onu stran koja je prek Eufrateša ležala. i z silum je vzel vse visoke varaše koji su tam bili, od potoka Mambre tja dok se dohađa k morju.
15. I zavjel je njejine međe počemši od Cilicije tja do pokrajnih Jafetaž koje su proti poldnevu.^*Kak dalko se posledniki Jafetovi (1Moj 10,2 i sled.) poleg židovskoga štimanja proti jugu jesu raširili, to se ne zna. Zbog toga takaj ne pozna se ova ovde štimana zemlja.
16. I on je otpeljal vse sine madijanske^*Madijanite bili su okolo skitajuče se i trgujuče pastirsko ljudstvo. (1Moj 37,28). i ves njihov imetek porobil i z oštročum meča pomoril vse koji se njemu jesu suprotstavili.
17. Zatem je prešel dole na polje Damaškuša ob vremenu žetve i požgal je vsu strn i vse drevje i trsja je dal poseči.
18. I vse stanovnike zemlje je pred njim strah obišel.

Objašnjenje

• *
  Trinajsto leto Nabukodonozorovo (Ažarhadanovo) slaže se primerom računa onoga katoličanskoga pismozveđavca Derezera z dvadeset i osmem letom kralja Manaseša, najmre z letom od stvorjenoga sveta 3334., a Krištuševoga narođenja 670. ↩︎
• *
  Ange je stranka one velike tauruške gore koja ima razlučna imena. ↩︎
• *
  Med sunčenem zahodom i severom. ↩︎
• *
  Varaš Maluš vu Ciliciji. V. 2Mak 4,30. ↩︎
• *
  Drugač Taržuš zvan, domorodni varaš svetoga Pavla apoštola. ↩︎
• *
  Oni po arapski puščini okolo skitajuči se izmajelitanski pastiri. ↩︎
• *
  Neznana. ↩︎
• *
  Vu onu stran koja je prek Eufrateša ležala. ↩︎
• *
  Kak dalko se posledniki Jafetovi (1Moj 10,2 i sled.) poleg židovskoga štimanja proti jugu jesu raširili, to se ne zna. Zbog toga takaj ne pozna se ova ovde štimana zemlja. ↩︎
• *
  Madijanite bili su okolo skitajuče se i trgujuče pastirsko ljudstvo. (1Moj 37,28). ↩︎