Del III.

Vsi se njemu podlažeju. Holoferneš hoče da se Nabukodonozor kakti bog poštuje.

1. Onda su kralji i poglavari vseh varašev i držav, najmre od mezopotamske Sirije, Sirije Žobal^*Od zemlje koje stolni varaš Soba Nizibiž je bil. i Libije,^*Libija leži vu Afriki, morebiti bi moralo Licija stati koja je blizu Sirije ležala. v Cilicije poslali poslenike koji dojduči k Holofernušu rekli su:
2. „Prestani se zvrhu nas ljutiti. Bolje je da velikomu kralju Nabukodonozoru živi služimo i tebi se podložimo, kak da vumremo i z našem pogublenjem škodu našega sužanstva trpimo.^*Kak da zajedno vumremo i služimo, to je da jedna stran vumre, a druga služi.
3. Vsi naši varaši i vsa ladanja, vse gore i doline i polja i črede volov i črede ovec i koz i konjev i gamil i ves naš imetek i naša družina jesu vu tvojoj oblasti.
4. Vsa naša naj budu na tvoju zapoved,
5. mi i naša deca jesmo tvoji službeniki.
6. Dojdi k nam kakti mirni gospon i potrebuj nas za službu kak se bude tebi dopalo.“
7. Onda je izišel iz gor z konjaniki vu velikoj moči i podložil je vse varaše i vse stanovnike zemlje svojoj oblasti.
8. Iz vseh pako varašev je za pomočnike vzel ljudi jake i izebrane za boj.
9. I one države je takov strah obišel da stanovniki vseh varašev, knezi i časni skupa z prostem ljudstvom jesu njemu naproti izišli kad je on dohađal
10. i njega z venci i svetnicami prijemali plesajuč kolo vuz bubnje i piščale.
11. I akoprem su oni vse to včinili, vendar nesu mogli ljutost njegvoga srca vtišiti^*Ovi narodi jesu se hoteli rajši podložiti, nego vumreti. Njim su vnogi krščeniki spodobni koji se rajši podlažeju Šatanu, nego da bi vu sebi svoja telovna poželenja skončali. Ako se oni jesu vkanili vu Holofernešu, tak se takaj oni krščeniki vkanjuju vu poglavaru ovoga sveta, vu Šatanu. Ar, kak veli sveti Bernard, Šatan je vnogo krvoločneši proti onem koji se njemu podlažeju, nego proti onem koji ga zametavaju.
12. ar je on njihove varaše razrušil i njihove luge posekel.^*Koje su oni na poštuvanje svojeh malekov zasadili.
13. Ar je njemu Nabukodonozor kralj zapovedal da ima vse boge zemlje skončati zato najmre da bi on sam za boga bil imenuvan od oneh narodov koji se po Holoferneševi mogučnosti bi mogli podložiti.^*Vu ovakvu bedastoču je mogla človečanska oholnost napeljati.
14. On pako kada bi bil prešel čez Siriju Žobal i celu Apameju^*Državu Sirije. i celu Mezopotamiju, došel je k Idumejancom vu zemlju Gaba.^*To je vu brežnu zemlju. Namesto Idumejancov bi morebiti morali Judejanci ili Židovi stati.
15. Njihove varaše je zavjel^*Severnu Judeju ili Galileju. i ovde je ostal trideset dni^*Dok bi skup zebral ves svoj šereg da ovak zjedinjenum močjum navalil vu Judeju ter se zbog Senakeribovoga potučenja fanti. vu kojeh dnevih je zapovedal vsu moč svojega vojnoga šerega skup spraviti.

Objašnjenje

• *
  Od zemlje koje stolni varaš Soba Nizibiž je bil. ↩︎
• *
  Libija leži vu Afriki, morebiti bi moralo Licija stati koja je blizu Sirije ležala. ↩︎
• *
  Kak da zajedno vumremo i služimo, to je da jedna stran vumre, a druga služi. ↩︎
• *
  Ovi narodi jesu se hoteli rajši podložiti, nego vumreti. Njim su vnogi krščeniki spodobni koji se rajši podlažeju Šatanu, nego da bi vu sebi svoja telovna poželenja skončali. Ako se oni jesu vkanili vu Holofernešu, tak se takaj oni krščeniki vkanjuju vu poglavaru ovoga sveta, vu Šatanu. Ar, kak veli sveti Bernard, Šatan je vnogo krvoločneši proti onem koji se njemu podlažeju, nego proti onem koji ga zametavaju. ↩︎
• *
  Koje su oni na poštuvanje svojeh malekov zasadili. ↩︎
• *
  Vu ovakvu bedastoču je mogla človečanska oholnost napeljati. ↩︎
• *
  Državu Sirije. ↩︎
• *
  To je vu brežnu zemlju. Namesto Idumejancov bi morebiti morali Judejanci ili Židovi stati. ↩︎
• *
  Severnu Judeju ili Galileju. ↩︎
• *
  Dok bi skup zebral ves svoj šereg da ovak zjedinjenum močjum navalil vu Judeju ter se zbog Senakeribovoga potučenja fanti. ↩︎