Knjiga Judite — Del XVI.

Juditina hvale pesma. Njejina doba i smrt.

Onda je Judit popevala Gosponu ovu pesmu govoreča:
„Započmite Gosponu vu bubnjih, popevajte Gosponu vuz cimbalih, pojte njemu novu pesmu, izvisete i zazovite njegvo ime!
Gospon zatira šerege, Gospon je njegvo ime.
Koj svoja taborišča postavlja vu sredinu svojega ljudstva da nas izbavi iz ruk vseh našeh neprijatelov.
Asur je došel iz gor od severa z vnožinum svoje jakosti. Njegva vnožina je potoke začepila^* i njegvi konji jesu pokrili doline.
On se je nagražal moje međe^* popaliti, moje mladence z mečom poražati, moju decu za rob, moje divojke vu sužanstvo dati,
ali Gospon vsamoguči je njemu naškodel i njega predal vu ruke žene koja ga je prebola.
Ar njihov mogučni ni opal po mladencih, niti ga nesu Titanovi sini^* skončali niti se njemu visoki velikani nesu suprotstavili, nego Judit, Mezarijeva kči, je njega z lepotum svojega lica oslabila.
Ar ona je slekla vdovičku opravu i oblekla se je vu veselja opravu na radost sinov izraelskeh.
Ona je svoje lice namazala z mastjum^* i svoje lasi je pod kapu skup zvila i vzela je novu opravu da njega vkani.
Njejine papuče jesu zaslepile njegve oči. Njejina lepota je njegvo srce vlovila. Z mečom je presekla njegov zatilnjak.
Perzijanci jesu se začudili nad njejinum srčenostjum i Medijanci nad njejinum segurnostjum.^*
Onda je tulilo asirijansko taborišče kad su se pokazali moji poniženi koj su od žeđe sehnuli.
Sini dekljičev jesu nje preboli i kakti bežeču decu jesu nje poražali. Oni su pred licem Gospona, mojega Boga, vu harcu poginuli.
Pojmo Gosponu hvalenja pesmu, novu hvale pesmu pojmo našemu Bogu.
Adonaj,^* Gospone, ti si velik i odičen vu tvojoj moči, niti te nigdo ne more nadladati.
Tebi naj služi vse stvorjenje ar ti si rekel i ono je bilo včinjeno. Ti si poslal tvojega duha i ono je bilo stvorjeno, niti nikoga ni koj bi se Tvojoj reči suprotstavil.
Gore budu se do dna gibale skupa z vodami. Pečine budu se pred Tvojem licom kakti vojsk rastalile.
Koji se pako bojiju Tebe, budu vu vsem pri Tebi veliki.
Jaj narodu koj se podigne proti mojemu puku ar vsamoguči Gospon bude se nad njim fantil, na Dan Suda bude nje pohodil.
On bude njihovo mesto predal ognju i črvom da goriju i čutiju naveke.“^*
Za tem je včinjeno da po obladanju je ves puk došel vu Jeruzalem vklanjat se Bogu i vsi kak prvič su bili očiščeni,^* alduvali su ognjoaldove, dragovoljne dare i vse kaj su obečali.
Judit pako je kakti na vekivečni spomenek proti pozablenju alduvala vsu vojnu Holoferneša posudu koju je njoj ljudstvo dalo i zastor kojega je ona sama iz njegve spalnice vzela.
I ljudstvo je bilo veselo po navadi svetečjum i tri mesece je se veselje ovoga obladanja z Juditum opslužavalo.
Za onemi pako dnevi je se vsaki vu svoj dom nazad povrnul i Judit je vu Betuliji velika postala, ali jošče glasoviteša po vsoj izraelski zemlji.
Ar z srčenostjum je združila čistoču tak da ona nikakvoga muža ni spoznala vse dneve svojega živlenja od kada Manaseš, njejin muž, je bil vumrl.
Ali svetečne dane je ona z velikum dikum ishađala.^*
Ostala je pako vu hiži svojega muža sto i pet let i svoju deklu je otpustila slobodnu i preminula je i je bila zakopana vu Betuliji, vuz svojega muža.
I vse ljudstvo je za njum sedem danov tuguvalo.
I celo vreme njejinega živlenja i vnoga leta po njejini smrti ni nikoga bilo koj bi Izraela bil znemiril.
Dan svetečni pako ovoga obladanja je bil od Hebrejcov vu broj sveteh danov postavljen i opslužava se od Židovov od onoga časa počemši tja do današnjega dneva.^*

Objašnjenje

*
Potoki vu jarkih več nesu mogli teči kad je njegva vojska vu nje zašla. ↩︎
*
Moju domovinu. ↩︎
*
Titani zoveju se vu navuku od poganinskeh bogov sini Neba i Zemlje koji su kanili Nebesa z silum zavjeti i iz njh Jupitera izegnati. Onde njihovo ime stoji mesto Rafajima ali Enakima, z kojemi imeni vu Svetem pismu navadno ozivaju se velikani, to je ʻveliki ljudi’. Vu ostalem opažuje sveti Hijeronimuš da ako li Svetoga pisma pisci gde koju reč jesu vzeli iz poganinskoga bogov navuka, tak to nesu hoteli včiniti kak da bi oni takvem človečanskoga razuma zmišlenjam hoteli kakvu važnost dodati, nego da se po tom razumljiveše činiju. ↩︎
*
Ona se je namazala z dobrodišučem oljem. ↩︎
*
Perzijanci i Medijanci jesu za onda pod asirijanskum oblastjum bili. ↩︎
*
Je ime Božje koje vu židovskem tuliko znamenuje kakti ʻVišnji Gosponʼ. ↩︎
*
Judit razmeva on ogenj koj nigdar ne pogasne i črva koj nigdar ne odmre (Izai 66,24; Mark 9,45), vekivečne muke peklenske koje budu tvrdokorne neprijatele svete opčine i kraljestva božanskoga na duši i telu stignule. ↩︎
*
Po prelevanju krvi, dotikavanju mrtveh tel i poganinskeh jestvin bivali su Izraleci primerom Zakona ognjušeni. V. 4Moj 19,1 –20.31.19. ↩︎
*
Iz samoče vu kojoj se je sada kak i predi zadržavala. ↩︎
*
Do onoga časa kad je sveti pisec ovu knjigu popisal. Kesneša vremena, po babilonskem sužanstvu več ni bil ov svetek opslužavan, prez dvojmbe zato kajti opslužavanje ovoga svetka bi se od Perzijancev, židovskeh ladavcov, bilo moglo kakti tvrdokornost tolnačiti. Ovak je došel vu pozabljivost, niti ga današnji Židovi ne opslužavaju. Zbog toga je bil ov zadnji red ove knjige vu novešeh prenašanjih grčkeh, sirijanskeh i starešeh dijačkeh čisto van spuščen. ↩︎