Knjiga Mudrosti — Del XVIII.

Ali pri tvojeh sveteh^* je bila kruto velika svetlost i oni jesu zadnjič čuli njihov glas, ali njihove spodobe nesu videli^* i tebe jesu velikodičili da oni to isto nesu trpeli.^*
I koji se predi jesu vražuvali, jesu se zahvaljuvali da se več vezda ne vražuju ter za milošču jesu prosili da bi ova razluka^* jošče nadalje opstajala.^*
Zato jesu oni na neznanem putu za vođu imali goruči ognjeni stup i ti jesi načinil da je njim sunce prez vraženja svetilo pri dobrem navračanju. 2Moj 14,24; Šolt 77,14.104,39.
Oni zadnjič jesu zaslužili svetlosti mentuvani i vu tmice vuzi zaprti biti kajti oni tvoju decu, po kojoj se je začela svetu nevgasljiva Zakona svetlost svetiti, jesu držali vlovljenu.
Oni jesu nakanili skončati decu pravičneh, ali jedno dete je bilo van položeno i na njihovu nesreču oslobođeno; i ti jesi njim veliku vnožinu dece otel i vsu zajedno vu silni vodi pogubil. 2Moj 1,16. 2, 3.14, 28.
Ova noč je bila našem ocom prenazveščena^* da bi istinski znali kakvem prisegam jesu veruvali ter da bi dobre volje bili.^*
Zato je tvoj puk čakal na oslobođenje pravičneh, a na skončanje krivičneh.
Ar ravno po tom, po čem jesi suprotivnike kaštigal, jesi ti nas k sebi pozival i odičuval.^*
Ar dobreh pravična deca jesu tebi na skrovnom alduvala i jednovoljno dokončala Zakon pravičnosti obdržavati.^*
Naproti pako je zvenčalo nesložno neprijatelov kričanje ter se je čulo milo plakanje nad smrtjum dece koju jesu oplakuvali.
Ar gospon i sluga jesu bili z jednakum kaštigum pohođeni i prosti človek je trpel ravno to kaj kralj. 2Moj 12,30.
Anda jesu vsi jednakem načinom imali neizbrojene mrtve^* koji jesu z jednakum smrtjum vumrli i živeh ni bilo zadosti^* za nje vse zakopati pokehdob da je vu jednem hipu plemeniteša stran naroda^* bila skončana.
Oni koji, prvlje po copriji napeljani,^* na vsa neverni jesu ostajali, jesu pri skončanju prvorođeneh spoznali da je to božanski puk.
Ar kada je vse tiho i pokojno bilo i noč bila vu polovici svojega tečaja,
je tvoja vsamoguča reč^* iz Nebes od kraljevske stolice kakti strahoviti boritel doletela vu sredinu zemlje koja je imala skončana biti.
Oštri meč je tvoju nepremenljivu zapoved donesel. On je došel i napunil vsa z mrtvemi, on se je dotikaval nebes i zajedno je stal na zemlji.^*
On isti čas jesu nje naglo prestrašila viđenja zločesteh senj i nenadejano je nadošel zvrhu njih strah.
Jeden je napol mrtev ležal ovde, drugi onde ter je zrok svoje smrti očivesto daval spoznati.^*
Ar viđenja, nad kojemi se jesu bili prestrašili, jesu prenazveščala to da ne bi, vu neznanosti zakaj takva zla trpiju, bili pogubljeni.
Zadnjič pako je takaj onda pravične skušavanje smrti^* stignulo ar je vu puščini med vnožinum nastala punta,^* ali tvoja srditost ni dugo opstala.
Ar je človek^* prez krivice hitro dotekel da prosi za ljudstvo. On je molitvu, ščit svoje službe, naprvo postavil ter je z kadilom skupa svoju prošnju naprvo donašal. Ovak se je on suprotstavil srditosti i sili načinil konec pokehdob je pokazal da je on tvoj službenik. 4Moj 17, 46.
On pako halabuku ni obladal z jakostjum tela niti z močjum oružja, nego z rečjum^* je sebi podložil onoga koj je njega trapil^* pokehdob je njega spomenul iz prisege i zaveza ocov.^*
Ar kada bi oni vse na hrpe bili padali i jeden za drugem bil vumrl, je on zmes stupil i vstavil navalenje ter je njemu presekel put koj je k živem peljal.
Ar na svojoj dugi sviti, koju je imal na sebi, je bil ves svet^* i velikočinstva ocov jesu bila vu četiri vrstih kamenih vdubljena^* i tvoje veličanstvo na koruni njegve glave zrezano.^* 2Moj 28,6.
Ovoga pako je se ognul skončitel i bojal se je pred tem^* ar je vre dosta bilo samo skušavanje smrti.^*

Objašnjenje

*
Pri Hebrejcih vu zemlji Gošen. ↩︎
*
Hebrejci jesu zadnjič vu zemlji Gošen čuli narekanje Egiptoncov, nje vendar nesu videli zbog tmice koja je nad celem Egiptušem zvun Gošena ležala. ↩︎
*
Drugi to grčko ovak tolnačiju: i oni (Egiptonci) jesu čuli njihov (Izraelcov) glas (veselja), ali njihove spodobe nesu videli i ob času traplenj jesu nje (Izraelce) za srečne nazveščali. ↩︎
*
Razlučna sreča i rasprostranjeno odruženje. ↩︎
*
Drugi ov red ovak tolnačiju: i oni (Izraelci) jesu se tebi zahvaljuvali da se oni, akoprem zbantuvani, vendar nesu smeli fantiti ter jesu prosili naj bi od njih daleko ostali. ↩︎
*
V. 2Moj 12, 21–28. Prisp. 1Moj 18, 13.14. ↩︎
*
Da oni vu spunjenju prenazveščenoga božansku vernost vu njegveh obečanjih, a vu opčinskom spoznanju vu svojem teškem putuvanju čez puščinu obdrže dobru volju. ↩︎
*
Smrt egiptonskeh prvorođeneh je bil zrok izraelskoga oslobođenja ar onu istu noč kada je nje smrt poražala je farao puščal oditi Izraelce. ↩︎
*
Izraelci jesu pri alduvanju i jeđenju vuzmenoga janjčeca obečali da hočeju vse Gosponove zapovedi potpunoma zvršavati (2Moj 12,27,28) ↩︎
*
Vsi skupa jesu imali neizbrojene (to je: kruto vnoge) mrtvike, kajti je skoro vsaki kojega toga imal. ↩︎
*
Živi jesu se komaj zmagali. ↩︎
*
Prvorođeni, nad kojemi se ufanje naroda je vpiralo. ↩︎
*
V. 2Moj 8,15. ↩︎
*
Tvoja zapoved. ↩︎
*
To je: on je bil strašno velik (pelda strašno velike kaštige). ↩︎
*
Vumirajuči prvorođeni jesu sami govorili da zbog Izraelcov jesu bili zadavljeni ar vu senji (red 19.) je njim zrok njihove smrti bil očituvan. ↩︎
*
Med Izraelci je nastal pomor. ↩︎
*
Punta koju je bil podignul Kore i njegvi nasledniki (4Moj 14,6.14.). Sveti pisec nadalje pokažuje kak je Bog razlučno z bolvanomolci i svojemi vklanjavci baratal. ↩︎
*
Aron. ↩︎
*
Z molitvum. ↩︎
*
Skončitela (red 25.) koj je takaj njega trapil pokehdob je videl njega ražati svoje ljudstvo. ↩︎
*
Kojem je Bog obečal jednočno Palestine ladanje zbog česa oni njemu vernu pokornost jesu obečali. Ovo obečanje ne bi se bilo moglo ispuniti da bi Izraelci vu nepokornosti bili ostali i skončitel ves puk bil pogubil. ↩︎
*
Svite velikoga aldovnika jesu pelduvale svet ar halja je bila iz modroga platna na koje kraju jesu viseli zlati zvončeci med zrnatemi jabukami. Modra boja je pelduvala zrak, platno zemlju, zlato ogenj, škrlatna jabuk boja morje. ↩︎
*
Na prsnem ščitu. V. 2Moj 28,17. sled. ↩︎
*
Na glavnem povijalu ili načelniku iz najčistešega zlata jesu ove reči stale: „Gosponu posvečeno.“ V. 2Moj 28,36. ↩︎
*
Pred velikem aldovnikom ar on je bil pelda onoga koj je vu božanski zmožnosti došel človečanstvo na sebi noseči ter je imal ves svet otkupiti. ↩︎
*
Mala kaštiga. ↩︎