Knjiga Mudrosti — Del XVII.

Tvoji sudi, o, Gospone, jesu veliki i tvoja dela nezgovorna, zato takaj jesu bludile nevkrotljive duše.^*
Ar kada bi krivični bili mislili da moreju sveti narod optršuvati, jesi ti nje spel z tmicum i dugum nočjum da oni vu svojeh hižah zaprti od vekivečne previdnosti zapuščeni jesu ležali. 2Moj 10,23.
I kada jesu štimali da moreju vu svojeh otajneh grehih pod temnem pozabljivosti zastorom zakriti ostati, jesu bili po grozovitem strahu splašeni i raspršeni ter od velike osupnjenosti prevzeti.
Ar duplja vu kojeh se jesu zadržavali nesu nje od straha opčuvala pokehdob šumenje koje je odzgor dohađalo je nje prestrašilo i turobne pošasti jesu se njim iskažuvale ter nje vu strah naganjale.^*
I nikakva ognja moč ni bila zadovoljna njim davati svetlost niti jasni zvezd plamni nesu mogli onu strahovitu noč rasvetiti.
Medtemtoga je se njim vendar^* iskazal ogenj, kruto nagel i strahovit, i, po nigdar neviđenoj spodobi splašeni, je se njim včinilo da to kaj vidiju, je vnogo gorše.
I, coprnskoj meštriji povdani, jesu na osmeh postali i oholnost njihove mudrosti je bila z opšanostjum kaštigana.^*2Moj 7, 22.8,7.
Ar oni, koji jesu obetali da moreju strah i zmutnju od slabeh duš odegnati, jesu sami smešnem načinom slabeli od straha kojega jesu bili puni.
Ar akoprem drugač po nikakveh pošastih nesu mogli vu strah nagnani biti, tak vendar od drhtanja mar nesu pogibali kada živine jesu mimo prehađale i bzikanje kač nje je splašilo. Oni več nesu hoteli pogledati vu zrak kojega se nigdo nikakvem načinom ne more ogibati.
Ar pokehdob da je hmanjica bojazljiva, tak se po lastovitem svedočanstvu izdaje za krivu^* i nespokojena vest nadeja se vsigdar velike kaštige.
Ar strah ni nikaj drugoga kak izdajnik da se prez pomoči^* štima^*
i z kem je menje znutra ufanja na pomoč, z tem se bolje povekšava neznani zrok^* zbog kojega se trpi.
Oni pako koji vu onoj nepomočljivoj noči, koja je izišla iz najgljipšega peklenskoga gljibljinjaka, ravno takov nepomočljivi senj jesu spali,
jesu bili sad po strahoviteh pošastih znepokojeni, sad od omiljavice pograbljeni ar nagel i nenadejan strah je nje obišel.
Nadalje, ako je gdo zmed njih na tla opal, je ostal kakti vu kakvoj vuzi prez železja zaprt.^*
Ar ali je bil muž ali pastir ali delavec na polju^*, ako je bil pretečen, tak je trpel silu kojoj se ni bilo moguče ognuti.^*
Ar z jednem tmice lancom jesu bili vsi speti. Gde je onda veter bučal ali ptice med gustemi vejami slatko popevale ali naglo tekuča voda šumela
ali pečine med jakem praskanjem dole rušile se ali igrajuča se živina, koju nesu videli, sim pak tam drkala ali zverine z žestokem glasom ručale ali se iz najvišešeh gorah jeka je čuti pustila, onda je vse od straha pogibalo.
Ves široki svet je se rasvečuval z jasnum svetlostjum i vsaki se je nepreprečeno zabavljal z svojem delom.
Ali zvrhu oneh jedino je ležala optršljiva noč, pelda tmice^* koja je imala zvrhu njih nadojti; oni anda jesu sami sebi bili nepodnesljiveši nego tmica.^*

Objašnjenje

*
Egiptonci koji jesu zametavali božansku velikoču ter štimali da se moreju Bogu suprotstaviti. Drugi tolnačiju: nevučene, nevljudne duše. ↩︎
*
Hmanja vest i nezdravo namišlavanje (r. 8.) je bludnovernem Egiptoncom pred oči donašalo pošasti. ↩︎
*
Vu njihovem nezdravem namišljavanju. ↩︎
*
V. 2Moj 8,15. ↩︎
*
Kajti hudobni ne bi se bojal da ne bi znal da je kaštiguvan biti zaslužil. ↩︎
*
Kajti kriv. ↩︎
*
Drugi to grčko tolnačiju: ar strah izdaje nepomočljivost razuma. ↩︎
*
Nepoznano zlo kojega se gdo boji i potom se vu strahu trapi. Drugi to grčko ovak tolnačiju: gde je pako vu srcu malo batrivnosti, onde neodlučenost čini vekšu pogibel nego je zaisto. Drugi drugač. ↩︎
*
Ar gusta tmica je načinila da nigdo niti iz mesta ni mogel iti. V. 2Moj 10,22. ↩︎
*
Vu puščini. ↩︎
*
Moral je na svojem mestu ostati. ↩︎
*
Pokopališča i pekla. ↩︎
*
Zbog spočitavanja hmanje vesti. ↩︎