Knjiga Prirečjah — Del IV.

Poslušajte, deca, podvučanje vašega oca i pazete da se navčite razumnost.
Ja vam budem podeljil dober dar,^* ne zapustete moj Zakon!
Ar takaj ja jesem bil sin mojega oca, srčeno ljubljeni i kakti jedinorođeni^* moje matere.^*
I on (otec) je mene vučil i rekel: „Tvoje srce naj prime moje reči, čuvaj moje zapovedi i budeš živel!^*
Pribavi si vu oblast mudrost, pribavi si razumnost,^* ne spozabi se niti se ne odvračaj od rečih mojeh vust.
Ne zapusti nju^* i ona bude tebe čuvala, ljubi nju i ona bude tebe opčuvala.^*
Početek mudrosti je (to): pribavi si mudrost i za ves tvoj imetek pribavi si razumnost!^*
Poprimi nju i ona bude tebe izvisila^* i ako nju budeš objel, ona bude odičila tebe.^*
Ona bude tvojoj glavi dala dragotu i bude tebe pokrila z dičnum korunum.“^*
Poslušaj, moj sinko, i primi moje reči da se ljeta tvojega živlenja povnožiju.
Ja budem tebi pokazal put mudrosti i tebe po stezah pravednosti vodil.
Na koje, kada stupiš, ne budu se vuzili tvoji koraki, niti se ne budeš popikaval kada po njih budeš bežal.^*
Drži se podvučanja, ne zapusti nje, čuvaj nje ar ovo je tvoje živlenje.
Ne nasladuj se nad stezami nepobožneh, niti se tebi naj dopadne put zleh.
Beži od njega, niti ne hodi po njem, odvrni se i zapusti njega!^*
Ar oni ne zaspiju doklam ne včine zlo i i senj nje ostavlja doklam koga ne potkopaju.^*
Oni jeju kruh nezdušnosti^* i piju vino krivičnosti.^*
Put pako pravičneh je kakti svetla luč, ide dalje i raste do punoga dana.
Put nezdušneh je tmičen: oni ne znaju gdje opadneju.^*
Moj sinko, poslušaj moje govorenje i tvoje vuho nakloni k mojem rečjam.
One naj nigdar ne odstupljuju spred tvojeh očih, shrani nje vu sredini tvojega srca.
Ar one jesu živlenje onem koji nje najdeju i zdravje za celoga čoveka.^*
Opčuvaj svoje srce zevsem trsenjem ar iz njega ishađa živlenje.
Odvrni od sebe hudobna vusta i ogovorljive vusnice naj budu daleko od tebe.
Tvoje oči naj zraven glediju i trepavice tvojeh očih naj ideju pred tvojemi koraki.^*
Steze tvojeh nog naj budu ravne, ovak budu segurni vsi tvoji puti.
Ne zvračaj se niti na desno niti na levo, odvrni tvoju nogu od zla^* ar puti koji jesu iz desna jesu znani Gosponu, puti pako iz leva jesu hmanji. On sam pako bude tvoja tekališča vravnal i tvoje pute mirne včinil.

Objašnjenje

*
Dober navuk. ↩︎
*
Jedinorođeni, to je osebujno obljubljeni ar Šalomon je imal primerom 1Paral 3,5 jošče tri brate. ↩︎
*
Poslušajte mene ar ja jesem bil ljubljeni sin mojeh roditelov i zato jesem od njih kruto lepe navuke prijel. ↩︎
*
Budeš pravo živlenje imal i skupa budeš dugo i srečno živel. ↩︎
*
Najplemeniteši, vrleši dobiček je mudrost. ↩︎
*
Mudrost. ↩︎
*
Od grehov i njihoveh turobneh posleđah. ↩︎
*
Početek mudrosti je iskati mudrost. Mudrost je on dragi đunđ kojega da kupi, trgovec vsa svoja prodaje. Mat 13,46. ↩︎
*
Ako se njoj budeš zevsema povdal, ona bude tebi pravo izvišenje dala, ali ako ti nju budeš izvišaval, takaj ona bude tebe izvišavala. ↩︎
*
Pred Bogom i ljudmi. Ruke z kojemi se mudrost objimlje jesu razmišljavanje i činenje. ↩︎
*
Ona bude tvoj kinč. ↩︎
*
Ako ti hodiš po putu mudrosti, tak nikakve pogibeli niti prečke ne budu mogle tebe od cilja tvojega putuvanja zdržati. Ti budeš hitro tvojemu cilju naproti šetuval, niti se ničesa ne budeš imal bojati. ↩︎
*
I prejdi mimo. ↩︎
*
Beži od hmanjeh ar oni jesu nesrečni. Njihova bedastoča ne da njim počinka niti sna doklam goder oni svojem poželenjam ne moreju zadovoljiti. ↩︎
*
Krivičnem i nepravednem načinom dobljeni kruh. ↩︎
*
To je: oni jeju hmanjice kakti kruh i piju krivičnosti kakti vino. Oni jesu grehom natuliko povdani da njim oni takrekuč za hranu služiju kak drugem ljudem jelo i pilo. Job 15,16; 34,7. ↩︎
*
Hudobni jesu prez znanja, slepi i zato kada najmenje sumljiju, prepadaju vu nesreču. ↩︎
*
Za telo i dušu hasnovite. ↩︎
*
Tvoje oči ravnaj pred tvojemi koraki i ne hitaj nje zvedljivo nadesno ali nalevo ar razvuzdana sloboščina otpira neprijatelom vrata srca. ↩︎
*
Od krivoga i zapeljivoga puta. ↩︎