Knjiga Prirečjah — Del V.

Moj sinko, pazi na moju mudrost i k mojoj razumnosti nakloni svoje vuho
da budeš vu svojeh mislih skozen i da tvoje vusnice zadrže navuk. Ne pazi na himbenost žene
ar vusnice kurve jesu kakti setje iz kojega se cedi med i njejine grlo je glajše od olja,
njejina poslednja jesu žuhka kakti pelin i oštra kakti meč obodve strani nabrušen.^*
Njejine noge idu vu smrt i njejini koračaji peljaju vu pekel.^*
Oni ne hodiju po stezah živlenja, njejini koraki jesu nesegurni i neprevidljivi.
Nut anda, moj sinko, poslušaj mene i ne odstupi od rečih mojeh vust.
Tvoj put drži dalko od nje, niti se ne približavaj k vratam njejine hiže,
ne daj tuđem^* tvoje poštenje^* niti tvoja ljeta nemilostivnomu^*
da tuđi morebiti ne budeju napunjeni z tvojum močjum^* i da tvoji trudi ne dojdeju vu tuđu hižu,^* dole 24,33,
da ne budeš k poslednjemu milo zdihaval kada tvoje meso i tvoj život oslabiš^* i rečeš:
„Zakaj ja jesem odurjaval podvučanje i moje srce ni prijelo pokaranje,
zakaj takaj nesem poslušal glas oneh koji mene jesu vučili i navučitelom nesem naklonil moje vuho?
Oposred skupščine i spravišča jesem skoro pri vsakem zlu bil.“^*
Pij vodu iz tvoje kapnice i istoke iz tvojega zdenca.^*
Tvoj zdenec naj se van steče i delji tvoje vode na vulicah.^*
Imaj nje^* ti sam i tuđi naj ne budeju tvoji delniki.^*
Tvoja žila^* naj bude blagoslovljena i veseli se z ženum koju si vu svojoj mladosti vzel.^*
Ona naj bude tebi kakti najljubljeneša košuta i kakti najmileši jelenček, njejina ljubav naj tebe vsaki čas napoji i njejina ljubav naj bude vsigdar tvoje veselje.
Moj sinko, zakaj bi se dal od tuđe napeljati i vu naručaju kakve druge hotel počivati?^*
Gospon gleda na pute človeka i on pazi na vse njegve korake.^* Job 14,16.
Nepobožnjak se sam vu svoje hmanjice vlovi i bude z vužinci svojeh grehov zvezan.^*
On bude vumrl kajti se rednoga držanja ni držal i vu obilnosti svoje bedastoče bude vkanjen.

Objašnjenje

*
Od strahoviteh posljedah. Vre nekoji poganinski mudroznanec je rekel: „Kaj je kurva? Je lađotera človeka, zatiranje plemenah, mentuvanje sloboščine živlenja, napadajuča oroslanica, nakinčeno jezerišče, zgrabljiva zver.“ ↩︎
*
Vu pogublenje. Nasladnost pospešuje smrt tela i dušu prehitava vu vekivečno skvarjenje, zbog česa veli sveti Ciprijan: „Nečistu ljubav sprevađa više nego jedna smrt.“ ↩︎
*
Kurvam. ↩︎
*
Ne ognjusuj svoje poštenje predavajuč se kurvi. ↩︎
*
Niti tvoje živlenje smrti, nečistomu duhu. ↩︎
*
Da se od tvojega imetka ne zasičuju tuđi. ↩︎
*
Sveti Ivan Zlatovusti imenuje kurve gljubljinjake koji požiraju očinsku odvetčinu. V. Luk 15,17. ↩︎
*
Kada tvoj život v posled tvojeh razvuzdanostih oslabi. Kulike nesreče, kulika zla, veli sveti Auguštin, vre na ovem svetu sprevađaju nečistu ljubav. Od pekla neču nikaj govoriti. Čuvaj se da vre vu živlenju ne budeš sam sebi pekel. ↩︎
*
Pred vsem pukom. ↩︎
*
Zadovolji se z ženum z kojum se ti vu čistoj ljubavi po hižnem zakonu jesi združil. Vu drugem znamenuvanju: „Zadovolji se z živum vodum mudrosti.“ ↩︎
*
Iz čudnoga i svetoga zaveza z tvojum ženum naj izide vnogobrojno pokolenje koje na hasen i diku varaša, a na tvoje i tvoje tovarušice veselje i preštimanje bude. ↩︎
*
Zdenec, ženu. ↩︎
*
Z svojum ženum živi tak da se od nje nikakve nevernosti ne budeš imal bojati, čuvaj nju i brani kakti glava ter sam muder, kreposten i čist, vuči nju mudroj, kreposnoj i čistoj biti i zakonsku čistoču ljubiti. ↩︎
*
Zdenec, žena. ↩︎
*
Koju si vu mladosti dobil. ↩︎
*
Mudri preporuča tovaruštvo kakti način na opčuvanje čistoče; istem načinom govori sveti Pavel vu 1. listu Korintijancom, pisanem vu delu 7, od hižnoga zakona i njega preporuča onem koji nesu od Boga pozvani na zvršeni stališ. ↩︎
*
Akoprem bi ti lotrovanje ili zakonske vernosti oskrunenje zakrival, tak vendar tebe Bog opažaje, ar… ↩︎
*
Grešnik je suženj svojeh poželenj i duha nečistoga. ↩︎