Knjiga Prirečjah — Del XXI.

Kraljevo srce je vu Gosponovi ruki kakti vod napelavanje: on bude nje kamgoder bude hotel nagnul.^*
Človeku vidi se vsaki put pravi, Gospon pako vaga srca. Gore 16,2; 20,24.
Milosrdnost i pravicu činiti dopada se Gosponu bolje nego aldovi.
Napuhnjeno srce čini prevzetne oči; svetnica nepobožneh je greh.
Misli pridnoga doprinašaju vsigdar obilnost, vsaki pako leni je vsigdar vu siromaštvu.
Koj skup spravlja bogatstvo z lažljivem jezikom^* je čalaren i nezdušen^* i bude vu smrtne zanjke naletel.
Hudobneh roblenja budu nje dole zvlekla^* pokehdob nesu hoteli včiniti kaj je prav.
Spačeni človeka put je tuđi, koj pako je čist, njegvo delo je pravo.^*
Bolje je sedeti vu kutu na krovu^* nego z svadljivum ženum i vu opčinski hiži. Dole red 19; dole 25,24.
Duša hudobnoga poželjuje zlo,^* ona se ne bude smiluvala svojemu bližnjemu.
Kada osmehavec bude bijen, nerazumen bude mudreši postal i ako bude za mudrem hodil, bude znanje zadobil. Gore 19,25.
Pravičen skrbi se za hižu hudobnoga kak bi hudobne od zla odvrnul.^*
Koj na krič vbogoga zatišče svoje vuho, bude takaj sam kričal i ne bude posluhnjen.
Skroven dar vtišuje srditost i prikaz vu naručaj^* najvekšu ljutost.
Pravičnomu je veselje včiniti to kaj je prav, strah pako onem koji krivicu činiju.
Človek koj je od puta navuka zabludil bude vu skupčini golijatov prebival.^*
Koj ljubi goščenja, bude vu pomenjkanju, koj ljubi vino i tusta,^* ne bude obogatel.
Mesto pravičnoga bude dan nepobožen, a krivičen mesto pravednoga.^*
Bolje je prebivati vu pustoj zemlji nego z svadljivum i srditum ženum. Gore red 9; dole 25,24; Cirkv 25,23.
Poželenja vreden kinč i olje je vu stanu pravičnoga, a nespameten človek bude nje rasprudil.^*
Koj sledi pravicu i milosrdnost, bude našel živlenje, pravicu i diku.
Muder je zavjel varaš jakeh i zatrl moč vu koju se je zanašal.^*
Koj čuva svoja vusta i svoj jezik, opčuva svoju dušu od stiske.^*
Oholen i prevzeten imenuje se bedakom^* koj vu srditosti zvršava svoju oholnost.^*
Želje vmarjaju lenoga ar njegve ruke nesu nikaj hotele delati.^*
Cel dan želji i poželjuje koj pako je pravičen, daje i ne bude prestal.^*
Aldovi nepobožneh jesu gnjusni kajti se iz grehote alduju.^* Gore 15,8; Cirkv 34,21.
Lažljiv svedok bude poginul, človek koj je pokoren bude od obladanja govoril.^*
Hudoben človek z nesramnem obrazom potvrđava to svoje, koj pako je praveden, poboljšava svoj put.^*
Proti Gosponu ni mudrosti ni razumnosti niti tolnača.^*
Konj pripravlja se za dan boja, Gospon pako podeljuje obladanje.^*

Objašnjenje

*
Vodotoki ili vodotečine pri Židovih jesu bile od velike hasni. Ova prilika, kak najmre Bog svoju višnju oblast zvrhu ladavcev ovoga sveta zvršava, je zevsema primerna. Kak se najmre vode po skopaneh jarkih, potokih, jezerih i zviranjkih je mogla napeljati kam gdo je hotel, ravno tak nagiblje Bog srca poglavarov na hasen podložnikov, kam on hoče. ↩︎
*
Po prevari. ↩︎
*
Kajti si prazno ufanje načinja, pokehdob ovakvo blago i bogatstvo nema blagoslova. ↩︎
*
Iz njihove sreče i vu nesreču prehitila. ↩︎
*
Koj opake, spačene misli goji, čini krivo, koj je čistoga srca, on takaj čini dobro. Vu Žid. Opaki je put (baratanja, način človeka) koj je z grehom optršen, nedužen pako je praveden vu svojem činenju. ↩︎
*
Na Istoku jesu krovi ravni i na oveh krovih jesu više puti vu kutih hižurke naređene. ↩︎
*
Bližnjemu naškodeti. ↩︎
*
Pravičen, od ljubavi genjen, premišljava kak bi mogel hižu hudobnoga na pravi put dopeljati. Vu Žid. Pravičen premišljava hižu hudobnoga (jemlje si nju za opominajuču peldu) kak se hudobni sami prehitavaju vu nesreču. Drugi drugač. ↩︎
*
Prikaz koj se rasrđenomu skrovce vu naručaj vtiče, vtišuje… ↩︎
*
Vu zboru peklenskeh strašil. ↩︎
*
Zborne jestvine. Drugi: masti ali mazila ar na Istoku pri goščenjih jesu se potrebuvala mazila koja su drage cene bila zato ovoga reda znamenuvanje je: „Koj goščenja drži, bude obožal.“ ↩︎
*
Pravičen bude rešen od suprotivščin i mesto njega mora nje podnašati nepobožnjak koj nje po svojeh zločinstvih je zaslužil. Ovak obrača previdnost božanska više puti: pobožen kojega hočeju pogubiti ogne se, a hudobni opadne vu jamu koju pod drugem je kopal. ↩︎
*
Muder čuva i ima pripravu vina i olja vu svojem stanju, a bedak rasipava. ↩︎
*
Mudrost je jakša nego telovne moči zato vu boju opraviju dobri tolnači više nego oboružene čete šeregi. ↩︎
*
Ar koj svoje govorenje ima vu svojoj oblasti, ogne se vnogem svađam, neprijatelstvu i nenavidnosti. ↩︎
*
Vu Žid. osmehavcom. ↩︎
*
Vu Žid. koj od srditosti prevzet barače. ↩︎
*
Leni zmir želji imati, ali k ničemu ne more dojti kajti samo pri želji opstaje, a ne trsi se dobiti ono kaj želji. ↩︎
*
Leni ne more si zadosta željeti, a pravičen ne more zadosta darežljiv biti, ov bude poleg vse darežljivosti dosta imal, on pako bude bu siromaštvu ostal. Skupi ne more si zadosta željeti, darežljivi ne more zadosta davati. ↩︎
*
To je: kajti se iz otetoga, krivičnem načinom dobijenoga imetka načinjaju. ↩︎
*
Človek koj se podlaže zapoveđam bude istinu govoril, njegvo govorenje bude obladalo, nedužnomu na korist, zločincu na kaštiganje. Drugi: bude vekom govoril. ↩︎
*
Hudoben je nesramen i ostaje vu zlu, pravičen pako ako fali, prijemlje podvučenje i poboljša se. ↩︎
*
Da bi se određenjam božanskem suprotivno moglo činiti. Drugi: vu prispodablanju k Gosponu. ↩︎
*
Po konju razmeva se vsake fele oružje. Ali dober ishodek boja ne visi samo od dobroga oboruženja, nego navlastito od pomoči Božje. ↩︎