Del XXIV.

1. Zločestem ljudem ne budi nevuščljiv, niti si ne želji z njimi biti, gore 23, 17,
2. ar njihovo srce misli na roblenje i njihove vusnice govoriju vkanljivosti.
3. Po mudrosti bude se zezidala hiža, a po razbornosti potvrdila.
4. Po razumnosti budu komore z vsake fele dragem i lepem blagom napunjene.
5. Muder človek je jak, a človek vučen je močen i moguč.^*Mudrost višeputi nadomešča pomenkanje naravskeh močih. V. gore 21,22; Prod 9,18.
6. Ar boj se vodi z dobrem razređenjem^*Spozanje vuči da srečen konec boja ne visi vsigdar od velikeh šeregov, više puti mala vojska potuče veliku vojsku. Razumen vođa i razumno razređenje je više puti više opravilo nego veliki šeregi. i gde je vnogo tolnačev, onde je sreča.^*Po vnogeh tolnačih razmevaju se mudri tolnači.
7. Mudrost je bedaku previsoka;^*Nezredna poželenja potemnuju razum hudobnomu natuliko da za zresno premišljavanje postaje neprikladen. med vratmi^*Na sudbenem mestu gde se sudi jesu držali. ne bude otprl svoja vusta.
8. Koj misli zlo včiniti, bude se ozval bedakom.^*On spada med najgorše ljudi koj zmir samo na to misli kakvem načinom ali vu kojoj priliki bi mogel komu naškodeti. Ova ljudih fela osebujno lepo opisuje se vu listu Rim 1,30.
9. Misel bedaka je greh,^*On je bedak koj misli zapovedi božanske prekršiti. a ogovorljivec je ljudem gnjusoba.
10. Ako tebi na dan stiske srce klone, bude se pomenjšala tvoja jakost.^*Budeš jošče slabeši i neprikladneši za podnašati nesreče. Srčenost i zaufanost vu Boga pomaže vsa podnašati. Šolt 26,14.
11. Oslobodi one koji se peljaju na smrt i ne prestaj rešiti one koji se vlečeju na pogublenje.^*Ovo je opomenek za suce. Reši vse nedužne koji su vu nesreču prepali. Ove reči moreju se prilagoditi takaj onem koji su duhovnem načinom prepali vu kakvu nesreču, kojem se moramo osebujnem načinom smiluvati da nje oslobodimo od skvarjena. Šolt 81,4.
12. Ako rečeš: „Nemam močih“, to bude spoznal^*Je li tvoje moči zaisto tak slabe jesu da ne bi mogel ovoga ali onoga nesreče rešiti? srca zveđavec i zdržitela tvoje duše nikaj ne vkanjuje, on bude človeku povrnul poleg njegveh delih. ^*Drugi: ako bi ti rekel: „Mi nesmo znali“ (je li se naš bližnji nahađa vu nesreči ali kakvem načinom bi mi mogli njega od nesreče osloboditi), koj srca važe, on naj ne bi razmel (je li ti istinu govoriš), koj tvoju dušu čuva, on naj ne bi spoznal; on naj ne bi človeku poleg njegvoga činenja naplatil?
13. Jeđ, moj sinko, med ar je dober i setje koje je vrlo slatko za tvoje grlo;^*Po ovoj prispodobi hoče Šalomon očituvati radost z kojum se bi morali njegvi navuki prijeti.
14. tak je takaj mudrosti navuk tvojoj duši: ako njega najdeš, budeš k poslednjemu imal ufanje i tvoje ufanje ne bude poginulo.^*Hasen koju doprinaša bude nadladala njegvu vugodnost.
15. Nikoga ne zasedaj i ne išči hudobnosti vu hiži pravičnoga niti ne zmiruj njegov pokoj^*Ne primišljavaj z hudobnem okom čine pravičnoga da vu njem kakvu pogrešku najdeš i ne spačuj njegvu sreču. Zrok toga daje sledeči red.
16. ar pravičen sedemkrat opada, ali se ipak bude podignul, hudobni pako budu vgreznuli vu zlo.^*Ar bluditi je človečanski i pravičen takaj više puti zabludi, ali pravičen ne opstaje vu grehu, nego se iz svojega opadanja hitro podiže i greh koji se k njemu navrača je samo mimoprehađajuči tuđina, a ne stanovnik (Ivan Zlatov., Augušt., Gregur Vel.). Nadalje samo male jesu pregreške kojeh se pravičen čini krivca iz človečanske krhkoče, koje njega ne mentuju živlenja duše, vere i ljubavi i nad njum temeljujučega se opravičenja (Beda). Drugač pako ima se z hudobnem. Ov se prehitava vu zlo i njega se ne oslobađa ar zbog navadnoga grešenja (veli sveti Auguštin) zakapa se pod svojemi lastovitemi razvaljinami.
17. Kada opadne tvoj neprijatel, ne veseli se i nad njegvem pogublenjem ne raduj se
18. da morebiti ne vidi Gospon i njemu se ne dopadne i od njega svoju srditost odvrne.^*I na te prenese.
19. Ne pregovarjaj se z hudobnemi niti ne budi grešnikom nevuščljiv.^*Zbog njihove skazljive sreče.
20. Ar hmanji nemaju ufanja naposletku^*Sreča hudobneh ne bude stalna. Oni budu čisto drugi konec vzeli, nego se jesu ufali. i svetnica grešnikov bude vgasnula.^*Svetlost i tmica jesu prilika ili prispodoba sreče i nesreče. Svetlost hudobneh vgasne i prepadneju vu nesreču, suprotivno pako svetlost pravičnoga zmir se raširjava i njegva sreča bude zmir vekša i stalneša.
21. Moj sinko, boj se Gospona i kralja i ne pridružuj se k ogovorljivcem.^*Poštuj Boga i kralja, kojemu ti kakti Božjemu namesniku jesi dužen zaradi dušne vesti pokoren biti (Rim 13,5), i ogibaj se društva oneh koji od njega zlo govoriju. Vu Žid. … kralja i ne druži se z puntari.
22. Ar njihovo pogublenje nadojde naglo i gdo zna obodvojeh^*Oneh koji se niti Boga niti kralja ne bojiju. nesreču?
23. I to naj bude mudrem rečeno: „Na sudu neje dobro na osobu^*Na njegvu mogučnost, bogatstvo, plemenščinu. paziti.“ 3Moj 10,1.15; 5Moj 1,17,16,19; Cirkv 42,1.
24. Koji hudobnomu veliju: „Ti jesi pravičen!“, ovakvi se budu preklinjali od narodov i odurjavali od pokolenj.
25. Koji pako njega strahuju, budu hvaljeni i zvrhu njih nadojde blagoslov.
26. Pravi odgovor je kušec na vusnice.^*Pravi odgovor je okrepljiv i vugoden kakti kušec na vusnice. Po odgovoru more se takaj sudbena odluka razmeti.
27. Vredi svoje posle vani i obdelavaj marljivo svoje polje da onda budeš mogel tvoju hižu zidati.^*Olepotiti. Skrbi se najprvič za hranu, onda stoprv za priličnost i lepotu.
28. Ne budi prez potreboče svedok suprot svojemu bližnjemu, niti nikoga ne napeljavaj z svojemi vusnicami.
29. Ne reci: „Kak je on meni včinil, tak i ja hoču njemu včiniti, vsakomu hoču poleg njegvoga dela povrnuti.“ Gore 20,22.
30. Ja sem čes polje lenoga človeka i prek vinograda bedastoga človeka prehađal,
31. i nut, vse je bilo puno kopriv i trnje je pokrivalo zemlju i kamenita ograda je se podrla.
32. Kaj kad bi bil videl, vzel sem si k srcu i ovu peldu vzel si jesem za navuk^*Živlenje lenoga, veli sveti Gregur, je puno kopriv, trnja, zemeljskeh poželenj i zloč koja dušu prebadaju. Zid dobroga v redu držanja, koj okolo njega je bil podignjen, je se zevsema porušil. Ako mudri vidi ov nevoljni stališ, tak se on iz vseh svojeh močih trsi poboljšati.
33. i jesem rekel: „Jedno malo budeš spal, nekuliko dremal, jedno malo ruke na križ položil, da bi počival
34. i nadojde zvrhu tebe siromaštvo kakti putnik^*Z lehkemi, nespazljivemi koraki. i pomenjkanje kakti oboružen človek.“^*Kakti oboružen človek kojemu se neje moči suprotstaviti.

Objašnjenje

• *
  Mudrost višeputi nadomešča pomenkanje naravskeh močih. V. gore 21,22; Prod 9,18. ↩︎
• *
  Spozanje vuči da srečen konec boja ne visi vsigdar od velikeh šeregov, više puti mala vojska potuče veliku vojsku. Razumen vođa i razumno razređenje je više puti više opravilo nego veliki šeregi. ↩︎
• *
  Po vnogeh tolnačih razmevaju se mudri tolnači. ↩︎
• *
  Nezredna poželenja potemnuju razum hudobnomu natuliko da za zresno premišljavanje postaje neprikladen. ↩︎
• *
  Na sudbenem mestu gde se sudi jesu držali. ↩︎
• *
  On spada med najgorše ljudi koj zmir samo na to misli kakvem načinom ali vu kojoj priliki bi mogel komu naškodeti. Ova ljudih fela osebujno lepo opisuje se vu listu Rim 1,30. ↩︎
• *
  On je bedak koj misli zapovedi božanske prekršiti. ↩︎
• *
  Budeš jošče slabeši i neprikladneši za podnašati nesreče. Srčenost i zaufanost vu Boga pomaže vsa podnašati. Šolt 26,14. ↩︎
• *
  Ovo je opomenek za suce. Reši vse nedužne koji su vu nesreču prepali. Ove reči moreju se prilagoditi takaj onem koji su duhovnem načinom prepali vu kakvu nesreču, kojem se moramo osebujnem načinom smiluvati da nje oslobodimo od skvarjena. ↩︎
• *
  Je li tvoje moči zaisto tak slabe jesu da ne bi mogel ovoga ali onoga nesreče rešiti? ↩︎
• *
  Drugi: ako bi ti rekel: „Mi nesmo znali“ (je li se naš bližnji nahađa vu nesreči ali kakvem načinom bi mi mogli njega od nesreče osloboditi), koj srca važe, on naj ne bi razmel (je li ti istinu govoriš), koj tvoju dušu čuva, on naj ne bi spoznal; on naj ne bi človeku poleg njegvoga činenja naplatil? ↩︎
• *
  Po ovoj prispodobi hoče Šalomon očituvati radost z kojum se bi morali njegvi navuki prijeti. ↩︎
• *
  Hasen koju doprinaša bude nadladala njegvu vugodnost. ↩︎
• *
  Ne primišljavaj z hudobnem okom čine pravičnoga da vu njem kakvu pogrešku najdeš i ne spačuj njegvu sreču. Zrok toga daje sledeči red. ↩︎
• *
  Ar bluditi je človečanski i pravičen takaj više puti zabludi, ali pravičen ne opstaje vu grehu, nego se iz svojega opadanja hitro podiže i greh koji se k njemu navrača je samo mimoprehađajuči tuđina, a ne stanovnik (Ivan Zlatov., Augušt., Gregur Vel.). Nadalje samo male jesu pregreške kojeh se pravičen čini krivca iz človečanske krhkoče, koje njega ne mentuju živlenja duše, vere i ljubavi i nad njum temeljujučega se opravičenja (Beda). Drugač pako ima se z hudobnem. Ov se prehitava vu zlo i njega se ne oslobađa ar zbog navadnoga grešenja (veli sveti Auguštin) zakapa se pod svojemi lastovitemi razvaljinami. ↩︎
• *
  I na te prenese. ↩︎
• *
  Zbog njihove skazljive sreče. ↩︎
• *
  Sreča hudobneh ne bude stalna. Oni budu čisto drugi konec vzeli, nego se jesu ufali. ↩︎
• *
  Svetlost i tmica jesu prilika ili prispodoba sreče i nesreče. Svetlost hudobneh vgasne i prepadneju vu nesreču, suprotivno pako svetlost pravičnoga zmir se raširjava i njegva sreča bude zmir vekša i stalneša. ↩︎
• *
  Poštuj Boga i kralja, kojemu ti kakti Božjemu namesniku jesi dužen zaradi dušne vesti pokoren biti (Rim 13,5), i ogibaj se društva oneh koji od njega zlo govoriju. Vu Žid. … kralja i ne druži se z puntari. ↩︎
• *
  Oneh koji se niti Boga niti kralja ne bojiju. ↩︎
• *
  Na njegvu mogučnost, bogatstvo, plemenščinu. ↩︎
• *
  Pravi odgovor je okrepljiv i vugoden kakti kušec na vusnice. Po odgovoru more se takaj sudbena odluka razmeti. ↩︎
• *
  Olepotiti. Skrbi se najprvič za hranu, onda stoprv za priličnost i lepotu. ↩︎
• *
  Živlenje lenoga, veli sveti Gregur, je puno kopriv, trnja, zemeljskeh poželenj i zloč koja dušu prebadaju. Zid dobroga v redu držanja, koj okolo njega je bil podignjen, je se zevsema porušil. Ako mudri vidi ov nevoljni stališ, tak se on iz vseh svojeh močih trsi poboljšati. ↩︎
• *
  Z lehkemi, nespazljivemi koraki. ↩︎
• *
  Kakti oboružen človek kojemu se neje moči suprotstaviti. ↩︎