Knjiga Prirečjah — Del XXV.

Takaj ovo jesu Šalomonova prirečja koja jesu skup zebrali ljudi Ezekijaša, židovskoga kralja.^*
Božja dika je reč zakrivati,^* a dika kralja je zveđati govorenje.^*
Kak nepresežna je višina nebes i glibljina zemlje, ravno tak nepresežno je srce kralja.^*
Vzemi proč od srebra izvarke i bude izišla najčisteša posuda.^*
Vzemi hudobne proč spred obličaja kralja i njegova kraljevska stolica bude po pravičnosti potvrđena.^*
Ne izvišavaj se pred kraljem i ne postavlaj se na mesto velikašev.^*
Ar bolje je da se tebi reče: „Pomekni se sim gore“, nego da bi pred poglavarom ponižen bil.^*
Vu svađi nigdar hitro ne izvusti ona koja tvoje oči jesu videle da morebiti potlam ne bi mogel popraviti ako tvojega prijatela osramotiš.^*
Raspravi svoju pravdu z tvojem bližnjem i ne razodevaj skrovnost stranjskomu^*
da se iz tebe, kada bude čul, ne osmehava i tebe kuditi ne prestane.^*Milošča i prijateljstvo oslobađaju; obdrži si nje da se nad tobum nikaj spočitavanja vrednoga ne znajde.^*

Ob svojem času izgovorjena reč je kakti zlate jabuke vu srebrneh posudah.
Kakti zlata navušnica i svetli đunđ, tak je on koj pokaruje mudroga, koj njega posluhne.
Kaj je hlad snega ob času žetve,^* to je veren poslenik onomu koj je njega poslal, on bude njegvu dušu vpokojil. Dole 26,6.
Bahat človek koj obečanje ne drži je kakti oblaki i veter koji ne donašaju dežđa.
Po trpljivnosti vtišuje se poglavar i krotek jezik razbija kaj je tvrdo. Gore 15,1.
Jesi našel med, jeđ ga kuliko je tebi dosta da morebiti presit njega ne zbluješ.^*
Stegni tvoju nogu od hiže tvojega bližnjega^* da kada se tebe zasiti, ne oduri tebe.
Človek koj proti svojemu bližnjemu govori krivo svedočanstvo je kakti kopje, meč i oštra strelica.
Koj se na dan stiske ufa vu nevernoga, je kakti gnjil zub i trudna noga
i kakti on koj zimsko vreme zgubi kepenjek.^*Koj rastuženomu srcu pesme popeva je kakti ocet na solnitru.^*Kak mol opravi i črv drvu, ravno tak človeka žalost škodi srcu.

Ako je tvoj neprijatel gladen, nahrani njega, ako je žeđen, daj mu vode piti, Rim 12,20,
ar ovak budeš živo vuglenje na njegvu glavu skup zgrnul^* i Gospon bude tebi naplatil.
Veter sever rastirava dežđ i turoben obraz ogovorljivi jezik.^*
Bolje je vu kutu hižnoga krova sedeti nego z svadljivum ženum vu opčinski hiži. Gore 21,9.
Kaj je hladna voda žeđnoj duši, to je dober glas iz dalečnoga orsaga.
Kada pravičen opadne pred hudobnem, je kakti z nogum skaljen zdenec i kakti pokvarjen zviranjek.^*
Kak goder onomu koj meda preveč jé neje dobro, ravno tak on koj veličanstvo preseči hoče bude od dike potlačen.^* Cirkv 3,22.
Človek koj vu govorenju ne more stegnuti svojega duha je kakti otprt varaš prez okružneh zidov.^*

Objašnjenje

*
Pod Ezekijašem je više mudreh i vučeneh ljudih živelo (4Kralj 16,26). Ovi prez dvojmbe jesu daljneši izbor Šalomonoveh prirečjah iz orsačkeh letnicah naprvo vzeli i nje k prvešem izborom pridali. ↩︎
*
To je: Bog se navlastito vu tom iskažuje velikoga, pokehdob on vu ravnanju sveta sam ob sebi poleg svojeh skrovneh i nepresežneh tolnačov posluje. ↩︎
*
Kralj pako iskažuje se vu tom velikoga ako on z svojemi tolnačniki zveđa vsa koja vu njegvem orsagu bivaju. ↩︎
*
Kralji jesu namestniki Božji na Zemlji. Kak goder božanski tolnači jesu nezvedljivi, ravno tak je kralj vu tom pelda božanska da on svoja mudra nakanenja skrovno obdrži. ↩︎
*
Salomon prispodablja zločince k izvarkom ili smetju srebra, kajti oni jesu smet ljudih. ↩︎
*
Dobra, sreče i stalne pravice ima se narod i orsag jedino onda od kralja nadejati ako se on od zdušneh i verneh tolnačnikov opstira. ↩︎
*
Pred kraljem naj vnogo iz sebe načinjati i ne išči visokeh častih kajti bi drugač z tem bolje ponižen mogel biti. Časti jesu trh ter jesu z velikemi pogibeljami skopčene. ↩︎
*
V. Luk 14,10. Čeden bude izvišen, prevzeten pako i nepriličen, on se poleg zasluženja zapostavlja. ↩︎
*
Prenaglo ne započimaj pravde i svojem lastovitem očjam ne veruj ar načinjenu škodu je teško ipak nadomestiti. ↩︎
*
Prilagodi k ovomu Mat 5,25;18,15; Luk 12,58. Ne daj se od svađe raspaljen napeljati da bi očituval skrovnosti koje tebi je zaufal tvoj bližnji. Ne očituj svađu koju vi med sobum najleglje bi mogli raspraviti ar ovakvo razglašenje bi moglo obodvem naškodeti. ↩︎
*
Vsaki se haba človeka koj tuđe skrovnosti razglašuje. ↩︎
*
Koj ima prijatele i branitele, on se z pregledanjem sudi. ↩︎
*
Snegom pokrite gore Libanona opskrbljuju okolice z snegom da ob letnoj žegi stanovniki oneh orsagov moreju svoje pilo z snegom rashladiti. ↩︎
*
Vsako veselje mora se razumno i mertučljivo vživati. ↩︎
*
Ne pohađaj svojega bližnjega, svojega prijatela preveč gusto, da mu ne dodijaš. ↩︎
*
Ravno tak nepovoljno. ↩︎
*
Ako se na solniter vleje ocet, počne kipeti i od sebe daje jako nepovoljnu duhu. Turobnomu vesele pesme popevati ravno tak pristoji se kak vu solniter vlevati ocet. ↩︎
*
Njega počrlenil, požaril i njega na ljubav podžgal (Auguštin), Rim 12,20. ↩︎
*
Da se ogovorljivci ne bi z veseljem poslušali, oni bi mučali. Vu Žid. sever donaša dežđa, a ogovorljivi jezik turobno lice. ↩︎
*
Kak skaljen zviranjem ima turoben izgled, ravno tak zmutljiv je pogled pravičnoga koj vu nazočnosti hudobnoga prepada vu kakvu nesreču. Najvekša nesreča je greh. ↩︎
*
Med je dober, vendar koj njega preveč jé, naškodi mu. Dobro je za spoznanjem božanskeh stvarih trsiti se, ništarmanje puščati se vu daljneše razmišljavanje, nego naš stešnjeni razum more preseči; iz prazne zvedljivosti puščati se vu daljneše zveđanje božanskoga veličanstva je škodljivo kajti po tom prepadamo vu najvekše i prevzetne bludnosti. ↩︎
*
Vu Žid. Koj svoje pohotnosti ne more zavuzdati, takov je vnogovrsnem pogibeljam izvržen i pušča se po vablenju zločih lehko napeljati. ↩︎