Knjiga Prirečjah — Del XXVIII.

Hudoben beži akoprem ga nigdo ne preganja, pravičen pako je srčen i neprestrašen kakti oroslan.
Ako orsag greši,^* bude vnogo njegveh poglavarov,^* ako pako ljudi jesu mudri i razmeju to kaj se njim govori,^* bude živlenje poglavara podugšano.
Vbog človek koj vboge optršuje je jednak plohi koja glad donaša.^*
Koji zapuščaju Zakon, hvaliju hudobnoga, koji pako njega obdržavaju, podžižeju se proti njemu.
Hmanji ljudi ne misliju na sud,^* koji pako Gospona iščeju, vsa opažuju.
Boljši je siromak koj vu svojoj priprostoči hodi, nego bogatuš na hudobneh putih. Gore 19,1.
Koj zakon obdržava, je muder sin, koj pako ožeruhe hrani,^* sramoti svojega oca.
Koj po krivičneh dobičkih i najemih bogatstvo skup spravlja, on nje onomu koj protiv vbogem bude darežljiv skup stavlja.^*
Koj svoja vuha odvrača da ne čuje Zakon, njegva molitva je odurna. Gore 15,8.
Koj pravične zapeljava na zločest put, bude sam vu svoje pogublenje opal i priprosti budu ladali njegov imetek.
Bogat človek vidi se sam sebi muder, a razumen siromak bude njemu vu srce videl.
Pravičneh veselje je z velikum dikum, hudobneh kraljuvanje je ljudih pogublenje.^*
Koj svoje pregreške zakriva, ne bude srečen, koj pako nje bude valuval i zapustil, bude milosrdnost zadobil.
Blažen človek koj je vsigdar bojazljiv,^* koj pako je tvrdoga srca,^* bude vu zlo prepal.
Ručeči oroslan i gladen medved je nepobožen ladavec nad siromaškem pukom.
Vođa kojemu menjka razumnosti bude vnoge silovito optršuval, koj pako odurjava skupost, bude dugo živel.^*
Človeku koj za človečanskum krvjum hlepi nigdo mu na pomoč ne dohađa makar i proti kakovi jami beži.^*
Koj nedužno hodi, bude srečen, koj pako po spačljiveh putih hodi, bude jednoč opal.^*
Koj svoju zemlju obdelava, bude z kruhom zasičen, koj se pako lenosti povdaje, bude veliko pomenjkanje imal. Gore 12,11; Cirkv 20,30.
Veren človek bude se vnogo hvalil,^* koj pako hitri bogat postati, ne bude nedužen.^* Gore 13,11; 20,21; dole red 22.
Koj pri sudu gledi na obraz, ne čini prav, takov bude za jeden takaj zalogaj kruha istinu zapustil.^*
Človek koj se pašči bogat postati i drugem je nenaviden ne zna da zvrhu njega dojde siromaštvo. Gore 13,11.
Koj pokara človeka, bude njemu potlam dragši nego on koj njega z priliznem jezikom vkanjuje.
Koj svojemu ocu ali materi kaj vzeme pak veli da to ni greh,^* je tovaruš ljudomorca.^*
Koj se hvali i širi,^* bude svađe zbudil, koj se pako ufa vu Gospona, bude ozdravljen.^*
Koj se zanaša na svoje srce^* je bedak, koj pako mudro hodi, bude opčuvan.^*
Koj siromaku daje, njemu ne bude nikaj menjkalo, koj pako zavrgava onoga koj prosi, bude pomenjkanje trpel.
Kada se hudobni izvišavaju, budu se (dobri) ljudi skrivali, kada pako oni pogineju, budu se pravični povnožavali.

Objašnjenje

*
Primerom Židov: ako se spunta. ↩︎
*
Zamenjaju se poglavari spored. ↩︎
*
Da punta čini ljude nesrečne. Vu Žid. Ako se orsag spunta, vnogo je poglavarov, ako pako ljudi jesu pametni i razumni, onda jeden lada dugo. ↩︎
*
Ako se priprosti izvisi na časti, on optršuje podložnike i spodoben je plohi koja odepira zemlju i njive načinja neplodne. ↩︎
*
Drugi: … i ne misliju na to kaj je prav. Ljudi koji se svojem pohotnostjam povdavaju zadnjič se natuliko pokvariju da več niti to ne znaju kaj njihove dužnosti z sobum donašaju, suprotivno pako oni koji se izmišljavaju iz Gospona i njegve zapovedi zveđaju, oni paziju na njegvu volju i skrbljivo se habaju od prevzetnoga grešenja. ↩︎
*
Z njimi ophađa. ↩︎
*
Kajti Bog tak određuje da se njega ne vživaju, nego drugem koji jesu darežljiveši od njega ostavljaju. ↩︎
*
Gde pravičen ladavec ravna orsaga, onde kreposni podižeju svoje glave, ako pako hudobni ravnaju orsaga, onda se pravični zakrivaju. ↩︎
*
Koj se Boga boji i zlo beži. ↩︎
*
Koj nema strah Božji. ↩︎
*
Ladavec kojemu menjka razumnosti bude vnoge krivično zatiral i potom svoje gospoduvanje prikratil, koj pako je razumen i haba se optršenja, njegvo gospoduvanje bude se podugšalo. ↩︎
*
Ako ljudomorec bežeč proti jami beži i vu nju opade, njemu ne bude nigdo pružil ruku kajti ljudomorec je vsem oduren. Drugi: preganja se od božanske srditosti i hman dušnoga spoznanja, kaj isto čini njega nestalnoga i okolo bežečega, kak imamo peldu vu Kajnu, 1Moj 4,12.14. ↩︎
*
Koj spačljivo (po dvojeh putih) hodi, bude na jednem (zmed dveh) opal. ↩︎
*
Zbog svoje kreposti. ↩︎
*
V. 1Tim 6,9. Koj hitro hoče bogat postati, dopušča si takaj neslobodne i krivične načine. ↩︎
*
Ako sudec z jednum stranum drži, lehko se more dogoditi da on za kakov najmenjši dobiček krivično dopitanje izreče. ↩︎
*
Kajti se za odvetka drži. ↩︎
*
Vnogi si za nikakov greh ne držiju svojem roditelom kaj vkrasti, ali Šalomon drži to za vekši greh nego očivesto razbojničtvo ar veli on: „Koga ne bude vkanil takov koj je vu stališu svojega lastovitoga oca prevariti?“ I da on ovu zloču z tem strahoviteše opiše, takvoga prispodablja on k človeku koj je na vsako zločinstvo pripraven. ↩︎
*
Vu Žid. Koj široku dušu (to je nezasitna poželenja) ima, načinja svađe kajti je nezasiten. Vse skoro pravde nastaju iz nezasitnosti ter vendar jošče nigdo ni postal bogat po pravdah. ↩︎
*
Koj se ufa vu Boga, ne bude nikakvo pomenjkanje imal. Mat 6,24–34. ↩︎
*
Koj se na svoj razum, pametnost zanaša… ↩︎
*
Lastovita ljubav čini človeka slepoga. Človek se vsigdar drži za mudrešega nego je. Koj pako vu samoga sebe postavlja nezaufanost, je opazljiv ter se tak od vnogeh prekršenj opčuva. ↩︎