Knjiga Prirečjah — Del XXVII.

Ne hvali se zbog zutrašnjega dana ar ne znaš kaj dojduči dan z sobum donese. Jak 4,10 i sled.
Drugi naj hvali tebe, a ne tvoja vusta, stranski, a ne tvoje vusnice.
Težek je kamen i težek je pesek, ali srditost^* bedaka je od obodvojeh težeša. Cirkv 22,28.
Srditost^* i isrnuča ljutost je prez milosrdnosti i silu razdraženoga gdo bude mogel podnesti?^*
Boljše je očivesto pokaranje nego skrita ljubav.^*
Rane od onoga koj ljubi jesu boljše nego lažljivi kušci onoga koj odurjava.^*
Sita duša bude tlačila setje,^* a gladna duša takaj žuhko jemlje za slatko.^* Job 6,7.
Kak ptica koja iz svojega gnjezda odleti, tak je človek koj othađa iz svojega mesta.^*
Mazila i vsakojačke dobre duhe nasladuju srce i dobri prijatela tolnači jesu duši slatki.
Tvojega prijatela i prijatela tvojega oca ne zapuščaj i na dan nevolje ne hodi vu hižu tvojega brata.^*Boljši je sused^* blizu nego brat daleko.

Moj sinko, trsi se za mudrostjum i razveseli moje srce da budeš mogel odgovoriti reč onomu koj tebi spočitava.^*
Pameten vidi zlo i skrije se, nespametni ideju mimo i trpiju škodu. Gore 22,3.
Vzemi opravu onomu koj je za stranjskoga poruk postal i od njega vzemi zalog za tuđe. Gore 20,16.
Koj se v noči staje i svojega bližnjega z velikem glasom blagoslavlja, je spodoben onomu koj njega kune.^*
Krov čes kojega obdan zime precurjeva i svadljiva žena jesu si med sobum jednak[i]. Gore 20,16.
Koj nju drži, je spodoben onomu koj hoče vetra zdržati i olje vu svojoj desnici obdržati.^*
Železo oštri se z železom, a človek oboštruje pogled svojega prijatela.^*
Koj smokveno drevo redi, bude od njega jel sad i koj pazi na svojega Gospona,^* bude se odičil.
Kak se vu vodi obraz nazad sveti oneh koji nuter gledaju, tak jesu človečanska srca očita razumnem.^*
Pekel i glibljinjak ne bude se nigdar ispunil, ravno tak jesu človečanske oči nezasitne. Cirkv 14,9.
Kak se srebro vu zlevarki i zlato vu peči zveđa, tak bude skušavan človek po vustah onoga koj njega hvali.^*Hudobno srce išče zlo, pravedno pako iziskava mudrost.

Ako bedaka budeš vu stupi rastukel kak se kaša vu stupi dela, od njega ne bude se njegva bedastoča vzela.
Marljivo prigledaj kak zgleda tvoja marha i ogledaj svoje črede
ar ti ne budeš imal vsevdilj oblast, nego koruna bude dana od pokolenja do pokolenja.^*
Senokoše jesu otprte,^* trava se je pokazala i seno spravlja se iz planin.
Janjci jesu tebi za opravu, a kozli cena za njivu.^* 1Tim 6,8.
Kozje mleko naj bude tebi dosta za tvoje jelo, za potreboču tvoje hiže i za hranu tvojem službenicam.^*

Objašnjenje

*
Bedak od srditosti raspaljen je nepodnesljiveši kajti je nevtažljiv. ↩︎
*
Takvoga bedaka. ↩︎
*
Ljubomornost (drugi: jal) je jošče krvoločneša nego srditost. ↩︎
*
Koja pomenjke prijatela pregledava i ne očituje se. ↩︎
*
Vu Žid. Rane prijatela jesu iz dobre namene, ali skazljivost jesu kušci mrzitela. ↩︎
*
Setje ili divji med, koj vu Palestini iz drevja dole pada, zaisto se z nogami tlači – sitomu takaj najboljša jestvina nejde v tek. ↩︎
*
Otud je moči spoznati nepriličnost preobilnosti i hasen siromaštva. ↩︎
*
Koj nepremišljeno, iz nestalnosti ostavlja svoju domovinu, svoj stališ ili meštriju, je kakti ptica, daleko od svojega gnjezda okolo bludeča, vnogem pogibeljam podvržen. ↩︎
*
Ufaj se vu tvojega i tvojega oca prijatela več nego vu svojega brata i vu sili hodi predi k njemu nego k svojemu bratu. ↩︎
*
Prijatel. ↩︎
*
Ako mene, oca, omrazuje, ar muder sin je najboljše svedočanstvo dobroga i poštenoga oca. ↩︎
*
Koj tebe prekoredno hvali i dobro želji, je skazljivec – njega drži za takvoga koj tebi zla poveda, koj tebe preveč hvali, on tebe kudi. ↩︎
*
Koj bi hotel svadljivu ženu na mučanje pripraviti, ovakvoga trud i trsenje je ravno tak zahman kak onoga koj bi hotel vetra vstaviti i olje vu svojoj ruki obdržati: ovo njemu zmed prstov curi ter se jošče bolje zamaže. Drugi: … olje bude za svoju desnicu potrebuval (najmre, on se bude z svojum ženum tukel, sebe ranil i mazila za svoje zvračenje potrebuval). ↩︎
*
Za znanosti i krepost. ↩︎
*
To je: koj njemu verno služi. Dobromu Gosponu je ravno tak naravski vernoga slugu naplatiti, kak naravski je da smokveno drevo koje se dobro redi dober sad doprinaša. ↩︎
*
Kak človek vidi svoj obraz vu vodi, ravno tak vidi razumen svoj kip vu zrcalu svojega srca, spoznaje se iz svojeh mišlenj, poželenj, nagnenj i željah. Vu Žid. Kak goder je vu vodi obraz proti obrazu obrnjen, tak jednoga človeka srce proti drugomu. To je: kak se gdo proti komu iskažuje, ravno takvoga bude se on proti njemu iskažuval. Kak gdo pozdravlja, tak se njemu odzdravlja ili zahvaljuje. ↩︎
*
Po hvali koja se človeku daje očituje se je li on muder ali bedak: ako on ostaje ponizen, je muder, ako njega hvalenje napuhava i načinja gizdavoga, je bedast. ↩︎
*
Bogatstvo ne trpi naveke i koruna ne prehađa vsigdar na poslednike. Takaj kraljevski kinči moreju se po nesrečneh dogođajih pogubiti, ali očinsko polje, koje se pri Izraelcih nigdar ni moglo otuđiti ali prodati, ostaje njegvem namesnikom. Od toga imamo očivestu peldu vu Šauloveh namesnikih koji po zgubljenoj kraljevski stolici svoja očinska polja nazad jesu dobili (2Kralj 9,10.11), takaj Šalomonovi nasledniki jesu morali po povračku iz babilonskoga sužanstva tja do Jeruzalemskoga porušenja iz svojega očinskoga polja živeti. ↩︎
*
Ti imaš vsa koja za rediti marhu jesu potrebna, mladu travu na protuletje, seno za krmu vu zimi. ↩︎
*
Za kozle moreš sebi njivu kupiti. ↩︎
*
Koze budu tebe i tvoju celu hižu zdržavale. ↩︎