Pavel i ostali tovaruši njegovi človečno prijemlju se od divjeh ljudih na međimorju Melita na kojem vgrižnjen od kače Pavel nikaj zla ne trpi i oca Publijuša, poglavara međimorja, zdravje povrača i vnoge druge zvrači i od ovoga mesta odbrodeči, teda v Rim dojdu gde Pavel skup zezvavši prveše Židovov zroka poveda zakaj se na cesara je pozval i na dan od njih odlučeni nazvešča od Krištuša kojega rečjam vnogi ne veruju, kaj da od Izajijaša bi bilo prenazveščeno, pokažuje Pavel i čez dva leta od vere vu Krištuša prodekuje vsem k njemu dohađajučem.
- I kada bi se bili srečno izbavili, onda smo spoznali da se Melita međimorje zove. Divji pako ljudi iskazali su nam malu vljudnost.
- Ar vužgavši grmaču, prijeli su vse nas zbog dežđa koj je nastajal i zbog zime.
- Kad bi bil pako skup zebral Pavel suheh šib dosta vnogo i na ogenj del, kača od topline kada bi bila izišla, zgrabila je ruku njegovu.
- Kak pako videli jesu divji ljudi viseču zver z ruke njegove, rekli su med sobum: „Človek ov zaisto je ljudomorec koj, poklamkak se je izbavil iz morja, Fančenje ne pusti ga živeti.“
- A on zadnjič stepivši dole zver vu ogenj, nikaj mu se zla ni dogodilo.
- Oni pako štmali jesu da bude on otekel i sproti dole opal i vumrl. Kada bi pako oni dugo čakali ter videli da se njemu nikaj zla ne godi, premenili su se v misli i rekli da je Bog.
- Okolo oneh pako mest bile su pristave poglavara međimorskoga z imenom Publijuša koj nas prijemši tri dni dobrotivno je držal.
- Dogodilo se je pako da bi otec Publijušev zimljicu i grižu imajuči ležal, k kojemu Pavel vnuter je zašel i kada bi bil molil i nastavil njemu ruke, ozdravil je njega.
- Kaj kada se bi bilo dogodilo, vsi koji su na međimorju betežnike imeli, dohađali su k njemu i ozdraveli,
- koji su nas takaj z vnogem poštenjem poštuvali i odbrodečem naložili koja su nam potrebna bila.
- Za tremi pako meseci odbrodili smo na ladji aleksandrinskoj koja prezimela vu međimorju, koje cimer je bil Dvojčiči.
- I kada bi bili došli vu Sirakus, ostali smo tam tri dni.
- Otkud okolo brodeči došli smo vu Regijum i za jednem danom, pokehdob je jug puhal, drugi dan došli smo vu Puteole
- gde najdivši brate oprošeni jesmo da bi ostali pri njih sedem dnevov i tak smo došli vu Rim.
- I odonud, kada bi bili čuli od nas brati, došli su nam naproti tja do Apijuševoga trga i Treh krčmah. Koje kada bi bil videl Pavel, hvalu dajuči Bogu, postal je srčen.
- Kada pako bi bili došli v Rim, dopuščeno je Pavlu ostati za se z vojnikom koj ga je stražil.
- Za tretjem pako dnevom skup zezval je prve zmed Židovov. I kad bi se bili skup zišli, rekel je njim: „Ja, ljudi bratja, nikaj proti ljudstvu nečineči ali navadom očinskem, vendar sem kakti vuznik od Jeruzalema vu Rimljanov ruke izdan.
- Koji, kada su me ispitavali, hoteli su me ispustiti zato kajti nikakovoga smrti vrednoga zroka vu meni ni bilo.
- Ali, kajti su protigovorili Židovi, prisiljen bil sem pozvati se na cesara, ne kak da bi kaj imel zakaj bi narod moj tužil.
- Zbog toga anda zroka prosil sem vas videti i z vami govoriti. Ar zaradi ufanja izraelskoga jesem z ovem lancom obdan.“
- A oni rekli jesu njemu: „Mi niti smo liste dobili od tebe iz Judeje niti dojduči gdo zmed bratov kaj nazvestil ali povedal od tebe zla.
- Prosimo pako da bi od tebe čuli koja misliš ar nam je od krivoverstva ovoga znano da se njemu povsud protigovori.“
- Kada bi pako odlučili bili njemu dana, došli su k njemu na stan kruto vnogi kojem je razlagal svedočeči Kraljestvo Božje i svetujuči njim od Ježuša iz zakona Mojžeševoga i prorokih od jutra tja do večera.
- I nekoji su veruvali onem koja se povedala jesu, nekoji pako nesu veruvali.
- I pokehdob se med sobum nesu mogli zjediniti, rashađali su se poklamkak je bil Pavel jednu reč rekel da je dobro Duh Sveti govoril po Izajijašu proroku, ocu našem,
- govoreči: „Hodi k ljudstvu ovomu ter im poveđ: ʻPoslušajuči poslušali budete i ne budete razmeli i videči budete gledali i ne budete videli.ʼ
- Ar odebelilo je srce puka ovoga i z vuhmi teško čuju i oči svoje jesu zatisnuli da morebiti ne vidiju z očmi i z vuhi čuju i z srcem razmeju i preobrneju se ter zvračim nje.
- Znano anda naj bude vam da je poganinom poslano zveličanstvo Božje ovo i oni budu poslušali.“
- I kada bi bil ova zgovoril, odišli su od njega Židovi vnogo imajuči med sobum pitanje.
- Ostal je pako Pavel cela dva leta v svojem najetem stanu i prijemal vse koji su nuter k njemu hodili
- nazveščajuči Kraljestvo Božje i vučeči koja su od Gospona Ježuša Krištuša z vsum srčenostjum, prez prepovedanja.
