Pavel, preporučivši čast svoju Evangelijumsku, iz velike vu nazveščanju Evangelijuma zažganosti želi Rimljane pohoditi pokažuči da se poganini, koji, iz stvorjenj Boga spoznajuči, klanjanje njegvo od sebe othitavaju, klanjajuč se kipom stvorenj, pravedno od Boga ostavljaju i da za kaštigu ovoga vu odurne, koje se ovde ispisavaju, prepali jesu pregreške.
- Pavel, sluga Ježuša Krištuša, pozvani za apoštola, odlučen v Evangelijum Božji,
- kojega je predi po svojeh prorokih vu Sveteh pismih obečal,
- od svojega sina koj mu je rođen iz Davidovoga pokolenja primerom tela,
- koj je predodređen bil za Sina Božjega, vu kreposti Duhu posvečenja po gorestajanju našega Gospona Ježuša Krištuša od mrtveh
- po kojem smo mi zadobili milošču i apoštolstvo da vse narode za ime njegovo pod pokorščinu vere spravimo.
- Med kojemi jeste takaj vi pozvani od Ježuša Krištuša,
- vsem koji su vu Rimu, ljubljenem Božjem, pozvanem svetem: milošča vam i mir od Boga, Oca našega, i Gospona Ježuša Krištuša.
- Najprvič pako zahvaljujem Bogu mojemu po Ježušu Krištušu za vse vas pokehdob se vera vaša nazvešča po celem svetu.
- Ar mi je svedok Bog, kojemu služim v duhu mojem po Evangelijumu Sina njegovoga, da se prez prestanka iz vas spominam
- vsigdar vu molitvah mojeh proseči da bi ja vendar jedenkrat srečen put imel po volji božanski da bi k vam dojti mogel.
- Ar vas želim videti da bi vam kaj od duhovnoga dara podeljil na potvrđenje vaše,
- to je da bi z vami skupa obatriven bil po onoj koja med vami je: veri vašoj i mojoj.
- Neču pako da ne bi znali, bratja, da sem si vnogikrat naprvo vzel dojti k vam (i bil sem zadržan tja do sada) da i med vami imam kakov sad kak i med ostalemi poganini.
- I grkom i divjem ljudem, mudrem i nespametnem jesem dužnik.
- Tak da, kaj se mene dostoja, jesem pripraven i vam, koji ste vu Rimu, nazveščati Evangelijum.
- Ar se ne sramujem Evangelijuma. Ar moč Božja je na zveličenje vsakomu verujučemu, Židovu prvič i grku.
- Ar se pravica Božja vu njem obznanuje iz vere vu veri, kak je pisano: „Pravičen pako iz vere žive.“
- Ar se očituje srditost božanska z Neba proti vsakoj nepobožnosti i krivičnosti ljudih oneh koji istinu v krivici zadržavaju.
- Ar kaj znano je Božjega, očivestno je vu njih. Ar njim je Bog nazvestil.
- Ar neviđena njegova od stvorjenja sveta po oneh koja načinjena jesu, razmena vidiju se, vekivečna takaj krepost njegova i Božanstvo, tak da nimaju oni izgovora.
- Ar kada bi bili Boga spoznali, nisu ga kakti Boga dičili ali zahvalili, nego su se zgubili v mislih svojeh i potemnelo je nespametno srce njihovo.
- Ar kada se za mudre jesu izdavali, postali su bedaki.
- I premenili su diku nesprhljivoga Boga v spodobu kipa sprhljivoga človeka i ptic i četveronogateh i plazečeh zverin.
- Zbog toga predal je nje Bog vu poželenja srca njihovoga, na nečistoču da ognjusiju tela svoja sami vu sebi.
- Koji su premenili istinu Božju na laž i klanjali se jesu i služili stvorjenju rajši kak Stvoritelu koj je blagoslovljen naveke. Amen.
- Zbog toga predal je nje Bog nesramnem željam. Ar žene njihove premenile jesu naravsko vživanje na ono vživanje koje je suprot naravi.
- Spodobno pako i muži, napustivši naravsko vživanje žen, vužgali su se vu želji svojoj jeden proti drugomu, muži z mužmi odurnost zbavljajuči i plaču, kakove su vredni bili, bludnosti svoje sami na sebi prijemši.
- I kak nesu marali da bi Boga imeli vu spoznanju, predal je nje Bog spačnomu razumu da čine ona koja se ne pristojiju,
- napunjene z vsum krivičnostjum, zločestočum, praznostjum, skupostjum, hmanjočum, pune nenavidnosti, ljudomorstva, svađenja, vkanljivosti, hudobnosti, i vuhobajavci,
- ogovorljivci, Bogu odurni, opšanljivci, gizdavci, oholni, zmišljavci zlih, roditelom nepokorni,
- nespametni, razvuzdani, prez ljubavi, neverni, nemilosrdni.
- Koji, kada bi bili spoznali pravicu božansku, nesu razmeli da su smrti vredni, koji takova delaju i ne lestor koji takova činiju, nego takaj koji privoljuju činečem.
