Jonaš prorok — Del I.

Jonaša proroka zvanje, nepokornost i kaštiga.

I Gosponova reč je izišla na Jonaša,^* Amatijevoga sina, pokehdob je njemu rekel:
„Stani se i hodi vu Ninive, veliki varaš,^* i prodekuj vu njem^* ar njihova hmanjica je pred mene gore stupila.“^*
Jonaš pako podigne se da ispred Gosponovoga lica pobegne vu Taržiš.^* I odide dole vu Jope^* i ovde najde barku koja je bila pošla vu Taržiš, dâ svoju brodovinu i stupi vu nju da bi z njimi (z brodari) ispred Gosponova lica išel vu Taržiš.
Ali Gospon je poslal velik veter na morje i je nastal na morju velik viher i barka je bila vu pogibeli razbiti se.
I brodari jesu se bojali i kričali vsaki k svojemu Bogu. I hitali jesu posudu koja je bila v barki vu morje da bi potom lehkša postala. Jonaš pako je izišel na dno barke i je čvrsto spal.^*
Na to pristupi k njemu kormanik i reče njemu: „Kak moreš tak čvrsto spati? Stani se, zazivaj svojega Boga, morebiti da se ov Bog iz nas spomene i da ne poginemo.“
I vsaki reče svojemu tovarušu: „Hote, hitajmo kocke da zeznamo zakaj je to zlo zvrhu nas nadošlo.“ I oni jesu hitali kocke i kocka je opala na Jonaša.^*
I oni rečeju njemu: „Poveđ nam iz kakvoga zroka je nas ova nesreča stignula? Kakov je tvoj opravek? Iz koje zemlje jesi ti i kam ideš? Iz kojega naroda jesi ti?“
I on reče njim: „Ja jesem Hebrejec i ja se bojim^* Gospona Boga Nebes koj je morje i zemlju stvoril.“
Na to se jesu ljudi kruto prestrašili ter njemu rekli: „Zakaj jesi to včinil?“ (Ljudi najmre jesu zeznali da je on ispred Gosponovoga lica hotel pobegnuti ar je on njim to bil povedal.^*)
I oni rečeju njemu: „Kaj imamo z tobum včiniti da se nam vtiši morje?“^* Ar se je morje burkalo ter zdigalo.
I on reče njim: „Primite mene i hitite vu morje i morje bude se vam potišilo ar ja znam da je zbog mene ov veliki viher zvrhu vas nadošel.“^*
I ljudi jesu veslali da bi se na suho povrnuli^* i nesu mogli ar je morje divljalo i zvrhu njih slape hitalo.
Na to jesu kričali k Gosponu i rekli: „Prosimo tebe, Gospone, ne daj nam poginuti zbog živlenja ovoga človeka, niti ne pripišuj nam nedužnu krv ar ti, Gospone, činiš kak hočeš.“^*
I oni primeju Jonaša ter njega vu morje hitiju – i morje je prestalo divljati.
Ali ovi ljudi jesu se kruto bojali Gospona^* i jesu Gosponu aldove klali i zagovore načinjali.

Objašnjenje

*
Vu židovskem Jona, to je ʻgolubʼ. V. vu predgovoru. ↩︎
*
Ninive varaš je ležal vuz Tigris i je bil stolni varaš asirijanskoga kraljestva. Prisp 3,3. On je bil zezidan od Nimroda (1Moj 10,10.11), od Ninuša rasprostranjen. Od njegvoga porušenja pišeju Nahum 3,8.10; Žofonijaš 2,13; Tob 14,6. ↩︎
*
Jonaš pošilja se k poganinom na osramočenje i opsuđenje Izraelcov ar oni činiju pokoru, a ovi opstaju vu svojoj hmanjici. (Hijeron.) ↩︎
*
„Ar njihovi grehi jesu se vre natuliko povekšali i oni nje tak nesramno i razvuzdano zvršavaju da ja nje njim več nadalje ne morem pregledati.“ (Hijer. Aug.) ↩︎
*
Taratešuš vu španjurski zemlji. Zakaj je on pobegnul, poveda on sam vu d. 4, r. 2. On se je bojal da bi se Bog smiluval poganinom i zahitil Izraela. Ovo obodvoje je se primerom 5Moj 32,21 za nerazdružljivo držalo. On je vu ov dalečni orsag hotel pobegnuti kajti je štimal da Bog vu ovem od Asirijancev tak jako odalečenem orsagu ne bude svoju zapoved ponovil. Jonaš je po ovoj svojoj nepokornosti zagrešil. Zato vendar ova pripovest vu istinitost zevsema nikaj ne zgubiva pokehdob si Bog višeputi služi z slabem orudeljem na ispelavanje svojeh božanskeh namenenj da se pred njim nikaj ne diči. ↩︎
*
Sada Jafa vu Palestini vuz poldnevno morje z brodiščem. ↩︎
*
Jonaš je se jošče prvlje na dno lađe bil povdal neg bi se bil veter podignul i je od velike tuge i žalosti čvrsto bil zaspal. (Hijer. Aug.) Iz ovoga istoga zroka je apoštole na vrtu Getsemani senj obladal. (Mat 26,40). ↩︎
*
Viher je bil nenavaden. Zato jesu počeli kocke hitati, kocka je opala na Jonaša, ne kak da bi ona vu sebi zadržavala kakvu moč, nego kajti je nju nemočnu božanska volja na njega ravnala. ↩︎
*
„Vklanjam se Gosponu itd.“ ↩︎
*
Kad bi brodari bili čuli da je Jonaš pred svojem Bogom hotel pobeči ter kad bi strahoviti viher bili videli, jesu se morali, poklamkam je na njega bila opala kocka, kruto bojati ar se oni sami nesu ovomu Bogu vklanjali ter vendar jesu spoznali da on one koji njega zametavaju takvem strahovitem načinom pohađa. ↩︎
*
Brodari jesu se pri istem Jonašu za tolnač opitali kajti oni jesu sumljili da on kakti takov, koj se pravomu Bogu vklanja, bude takaj znal kaj bi na njegvo vtaženje bilo potrebno včiniti. ↩︎
*
Jonaš je iz božanskoga nadehnenja znal da zrok ovoga vihra je njegva nepokornost i da on bude prestal ako li se zbesnenem slapom bude predal. Zaisto velikosrčna ljubav i čuda vredna pokora Jonaševa koj, da Bogu zadovolji, ne mara vumreti na oslobođenje nedužneh. (Hijer.) Narava i človek stoje med sobum vu zmenljivem skupzdruženju: kak je ona dobrem dobra (Mudr 19,6), ravno tak se osavlja suprot človečanski tvrdokornosti (Mudr 5,18). Zdivljena (1Moj 3,17; 3Moj 26,43) othitava njega od sebe (4Moj 4,14) ali njega požira (4Moj 16,31. sl.) kakti fančenja orudelje zbantuvanoga Boga. ↩︎
*
Da moreju Jonaša od Boga pregnanoga na suho postaviti. ↩︎
*
Brodari moliju se Bogu da ne bi njim pripisal smrt Jonaša koj nje ni zbantuval pokehdob se vidi kak da bi sam Bog njegvu smrt hotel, on koj more včiniti kaj hoče. ↩︎
*
Spoznali jesu z vsum poniznostjum njegvu vsamogučnost i vu kaštiguvanju pravičnost. ↩︎