Jonaš prorok
Jonaš, sin Amatijev, je, kak se štima, on isti od kojega vu 4. Knjigi kraljev 14,25 biva spomenek, iz Get-Ofera vu Zabulonovem pokolenju, stanovnik židovskoga orsaga, i, kak se od njega kakti proroka od samoga sebe razmeva, je bil on jeden zmed oneh koji se prave službe Božje vu Jeruzalemu jesu držali (2,5.8). On je prenazvestil da se stare izraelskoga kraljestva međe od Emata budu ipak tja do Mrtvoga morja pretegnule kaj se pod Jeroboamom II. je bilo zaisto dogodilo (4Kr 14,25). Posledno je Jonaš pred Jeroboamom (823 let pred Krišt. nar.) živel. Vu knjigi koju od njega imamo pripoveda on pripečenje svojega vu Ninive poslanja da bi najmre ovoga velikoga i glasovitoga varaša stanovnikom prodekuval pokoru. Akoprem ova knjiga ne zadržava vu sebi proročanstva vu lastovitem znamenuvanju, tak vre isto proroka pripečenje je prenazvestljivo ar, veli sveti Hijeronimuš, Jonaš okolo skitavajuči se golub (1,1) je bil po svojoj lađoteri preznamenljiva pelda smrti Ježuša Krištuša. Po svojem prodekuvanju Ninivetancom i po njihovem obrnenju je prenazvestil buduče poganinov obrnenje. Ravno tak je on takaj po svojem trojdnevnem opstajanju vu ribe trbuhu kakti vu priliki pelduval Krištuševo tretji dan od mrtveh gorestajanje. Novešeh vremen neverniki jesu sad čudnovitost, sad zadržavanje proroka ob času njegvoga poslanja, sad nezvršenost pripovesti vu ovoj knjigi zadržane za zastor potrebuvali istinitost naprvostavljene pripovesti tajiti i vu njoj nikaj drugoga nečeju nahađati kak samo prispodobu ili priliku kakvu po kojoj je sveti pisec hotel naprvo postaviti ovu ali onu istinu, n. p. da Bog neje samo Bog Židovov, nego i poganinov. Ništarmanje istinitost ove pripovesti potvrđava se po Knjigi Tobijaša 14,6, a navlastito po istem Kristušu Ježušu koj obrnenje Ninivetancov na Jonaševo prodekuvanje včinjena kakti istinski dogođaj spoznaje (Mat 12,39–41). Židovi i krščeniki jesu vre od negda ovu knjižicu k ostalem Svetoga pisma knjigam pribrajali i vre od starine je bil sam Jonaš za pisca ove knjige spoznavan. Od ovoga proroku daljnješeh živlenja okolnostih ne zna se nikaj segurnoga.
