Jonaš prorok — Del III.

Jonaš pošilja se ipak k Ninivetancom i njim prodekuje pokoru i oni se obračaju.

I izišla je na Jonaša po drugoč Gosponova reč, koj je rekel:
„Stani se i hodi vu Ninive, velik varaš,^* i vu njem drži prodečtvo koje ja tebi povem.“
I podigne se Jonaš i odide vu Ninive primerom Gosponove reči. Ninive pako je bil kruto veliki varaš, tri dni hoda.
I Jonaš je pričel vu varaš vlezuvati jeden dan hoda dugo i je kričal ter rekel: „Jošče četrdeset danov i Ninive bude se porušil!“^*
I ljudi vu Ninive jesu veruvali vu Boga ter jesu nazvestili post i oblekli se jesu vu žalosne oprave od najvekšega do najmenjšega.^*
Ova reč je takaj pred kralja od Ninive došla^* i stal se je iz svoje stolice kraljevske, othitil iz sebe svoju odeču, oblekel žalosnu opravu i sel se je vu pepel.
I on je dal vu Ninivi razglasiti i povedati kakti kralja i njegveh poglavarov zapoved ove reči: „Ljudi i živina, marha i ovce, naj nikaj ne kušaju niti se naj ne zganjaju van na pašu niti se naj ne napajaju,^*
nego naj oblečeju žalosne oprave ljudi i živina^* i naj z jakostjum kričiju k Gosponu. Vsaki se naj obrne od svojeh hman putov i od zločinstvih koja njegva ruka zvršava.” Jer 18,11; Joel 2,14.
„Gdo zna je li se Bog ne obrne i oprosti i odstupi od svoje ljute srditosti tak da ne poginemo.”
I Bog je videl njihova dela, da se jesu obrnuli od svojeh hmanjeh putov. I Bog se je smiluval niti ni njim včinil ono zlo z kojem se je nagražal da njim bude včinil.

Objašnjenje

*
Vu židovskem: „veliki varaš pred Bogom“, to je kruto veliki varaš. Ar po imenu Božjem očituje se takaj višeputi ono kaj je nenavadno velikega. Primerom starinske dogodovščine piscov je bil varaš Ninive 150 tečajev (4 nemške milje) dug, 90 tečajev (pol tretju milju) širok i vu objetju je imel 480 tečajev (13 milj) koje zadnješe, na dane hodeč poleg navade istočneh narodov do treh ali četiri milj računajuč, znaša tri dni hoda. ↩︎
*
To bi se bilo dogodilo da Ninivetanci ne bi bili pokoru včinili. Ovo proročanstvo je bilo, kak vnoga druga, pod pogodbum. Broj četrdeset stoji više puti vu Svetem pismu namesto žalosti i pokore. V. Ezek 4,6; Mat 4,2. ↩︎
*
Jonaš ni Ninivetance genul samo po svojem govorenju, nego vnogo bolje po pripečenju koje se je z njim dogodilo, po svojem čudnovitem obdržanju vu trbuhu ribe i po svojem iz nje oslobođenju. Zbog toga ne imenuje njega Krištuš prodekatorom, nego znamenjem za Ninivetance (Luk 11,30). Glas od njegvoga čudnovitoga pripečenja je bil, ali po brodarih ali po drugeh putneh ljudih, donešen vu Ninive i ovo je Ninivetance na poslušanje prodečtva od takvoga čudnovitoga človeka prikladne včinilo i na takvu pokoru moglo genuti da su bili vredni od Krištuša pohvaljeni i Židovom pretpostavljeni biti. Mat 12,41. ↩︎
*
Poleg opčinskoga štimanja pred kralja Ful. ↩︎
*
Ručanje i beketanje živine za hranum je moralo opčinsko tuguvanje povekšati i ljudi jošče više na pokoru obuđuvati. ↩︎
*
Iz živine (konjev, gamil, mulcov) naj se vzemeju dragi capraki i pokrivala ter se naj pokriju z žalosnum odečum. ↩︎