Knjiga Prirečjah — Del XI.

Vkanljiva vaga je gnjusoba pred Gosponom, a pravična vaga je po njegvi volji.
Gde goder bude gizdost, onde bude sramota,^* gdje pako je poniznost, onde je takaj mudrost.^*
Priprostoča pravičneh bude nje ravnala, a potkapanja hudobneh bude nje pogubilo.^*
Na dan fantenja^* bogatstvo ne bude nikaj pomagalo, pravica pako bude od smrti oslobodila.^* Gore 10,2.
Priprostoča pravičnoga bude njegov put ravnala,^* a nepobožnjak bude vu svojoj nepobožnosti poginul.
Pravica^* pravedneh bude nje oslobodila, a nepobožnjaki budu se vu svojeh zasedih vlovili.^*
Kada nepobožen človek vumre, več nikakvoga drugoga ufanja neje^* i čakanje skrbljiveh^* bude poginulo.^*
Pravičen bude iz stiske oslobođen i namesto njega bude nepobožnjak predan.^*
Skazljivec vkanjuje z vustmi svojega prijatela, pravične pako bude oslobodila mudrost.^*
Zvrhu sreče pravičneh bude se raduval varaš, a nad pogublenjem nepobožnjakov bude hvala.
Po blagoslovu pravičneh^* bude se izvišaval varaš, a po vustah nepobožnjakov^* bude opustel.
Koj svojega prijatela^* zametava^* je nepametnoga srca, razumen pako človek bude mučal.^*
Koj vkanljivo hodi,^* otkriva skrovnosti, koj pako je vernoga srca, zakriva kaj njemu prijatel je zaufal.
Gde ni ravnitela, prepada puk, gde pako je vnogo tolnačov, onde je spasenje.
Koj za stranjskoga^* postaje poruk, njemu se bude zlo godilo, koj se pako zanjkam^* ogiblje, bude opčuvan.
Milostiva^* žena bude našla diku, a^* jaki budu imali bogatstvo.
Milostiven človek čini svojoj duši dobro,^* koj pako je nemilostiven, on istu svoju rodbinu odmeče.^*
Kaj nepobožnjak čini, nema opstanka,^* koj pako seje pravicu, njemu plača ne zaostane.
Milosrdnost^* doprinaša živlenje, a nasleduvanje zla smrt.
Spačeno srce je pred Gosponom gnjusoba, a nad onemi koji vu priprostoči hodiju, ima on svoju dopadnost.
Ruka vu ruku,^* hmanji ne bude ostal prez kaštige,^* pravičneh pako rod bude se oslobodil.
Lepa pak bedasta^* žena je kakti zlata vitica vu nosnici prasice.^*
Pravični željiju vse kaj je dobro, nepobožnjake čaka srditost.^*
Jedni deljiju lastovita ter bivaju bogateši, drugi, kaj njihovo neje, otimlju^* i zmir su vu potreboči.
Duša koja blagoslavlja^* bude se debelila, a koj opija, bude takaj sam napojen.^*
Koj žitek skriva,^* bude se od ljudstva preklinjal, zvrhu oneh pako koji prodavaju, dohađa blagoslov.
Koj se za dobrem trsi, dobro se staje o svenutju,^* koj pako iziskava zlo, bude od njega potlačen.
Koj se zanaša na svoje bogatstvo, bude opal, pravični^* pako budu se zelenili kakti zeleni list.
Koj svoju hižu smučuje,^* bude vetre za del imal^* i koj je bedak, bude mudroga suženj.^*
Pravičnoga sad je življenja drevo^* i koj se za duše vzimlje,^* je muder.
Ako pravičen na zemlji trpi, kuliko bolje nepobožnjak i grešnik.^*

Objašnjenje

*
Ar se gizdavec zametava. ↩︎
*
Ar mudrost je istinitost: vre pako ponizni je jedino istinit pokehdob on svoju nevolju spoznaje i valuje. ↩︎
*
Nesumljivi i nedužni hodiju pravim putom, a zasedljivi, dvojega srca, budu poginuli ar Bog prepušča da se vu svoje lastovite zanjke vloviju. ↩︎
*
Na Sudnji dan. ↩︎
*
Od vekivečne smrti. ↩︎
*
Bude vravnala njegve pute i vse prečke živlenja iz puta vmeknula. ↩︎
*
Dobrota, pravednost, priprostoča. ↩︎
*
Vu svojeh poželenjah. ↩︎
*
Več se ničesa nema ufati. ↩︎
*
Drugi tolnačiju: hudobneh. ↩︎
*
I vsa ufanja, naprvovzetja skrbljiveh nepobožnjakov po smrti nestaneju kakti dim. ↩︎
*
To se višeputi vre vu ovem živlenju obistinuje. Ovak je bil Aman predan na smrt koju on je bil pripravljal Mardokejušu, ovak jesu bili optužiteli Danijela predani oroslanom. Vnogo bolje pako bude se ova mudrosti izreka ispunila vu budučem živlenju. Onde bude prijel pravičen, koj se ovde po ognju suprotivščin očiščuje, vekivečna veselja, a suprotivno nepobožnjak, koj se ovde kratkem, prehađajučem veseljam predaje, vekivečne muke. „Moj sinko“, je rekel Abraham bogatušu vu evangelijumu, „spomeni se da si ti tvoja dobra prijel vu živlenju, a Lazar suprotivno zla, sada se pako on batrive, a ti se mučiš.“ Vid. dole 21,28. ↩︎
*
Skazljiv zločinec išče pod izlikum prijatelstva vkaniti svojega bližnjega, ako pako je on muder, tak vzeme v pamet njegvo hman nakanenje i bude od pogibeli oslobođen. Ali oni koji se po skazljiveh zločincih bi mogli napeljati, po mudreh se odgovarjaju i oslobađaju. ↩︎
*
Po njihoveh dobreh tolnačih, opomenkih, peldah i molitvah. ↩︎
*
Po tom kaj oni iz svojega hman srca govoriju i činiju, po proklestvu njihoveh rečih i činenjih. ↩︎
*
To je: svojega bližnjega, vsakoga človeka. ↩︎
*
Po psovanju. ↩︎
*
On spoznaje svoju lastovitu nevolju. ↩︎
*
Koj proti svojemu prijatelu (bližnjemu) neje istinit, je dvojvrsnoga srca. ↩︎
*
Kojega dobro ne pozna. Vid. gore 6,1 i d. ↩︎
*
Navlastito nepremišljenomu, prenaglomu poručanstvu. ↩︎
*
Zaradi svojeh krepostih ljubavi vredna (red 22.). ↩︎
*
To je: kak jaki (delavni, posleni) dobivaju bogatstvo. ↩︎
*
Samomu sebi. ↩︎
*
Barače z sobum i z svojum najbližnešum rodbinum nemilostivno. ↩︎
*
Ostaje prez napretka, prez ploda. Vid. Gal 6,7. ↩︎
*
Pravica. ↩︎
*
Daj ruku, vadljaj se. ↩︎
*
Hmanji akoprem bude ruke za križ držal, ne bude nedužen. Drugi: Akoprem se hmanji vodiju za ruke (skup si pomažeju), ne ostaneju prez kaštige. Ali: od pokolenja do pokolenja ne ostane hmanji bez kaštige. ↩︎
*
Zlobna, hmanja. ↩︎
*
Žene na Istoku nosiju svoje vitice vu nosnicah, nesramnoga razvuzdanoga držanja žena mogla se je anda pravedno prispodobiti prasici z zlatum viticum vu nosnici. ↩︎
*
Pravični imaju se samo dobra, a nepobožni samo srditosti božanske i kaštige nadejati. ↩︎
*
Ali drugi jesu skupi gde ne bi morali biti ter vendar zmir ostaju vu siromaštvu. ↩︎
*
Koja dobročinstva iskažuje. To je: koj dobročinstva iskažuje, njemu se bude vu obilnoj meri povračalo. Vid. Luk 6,38. ↩︎
*
Koj napaja, bude napojen, koj dobro čini, bude se njemu dobro včinilo. ↩︎
*
Žitka trgovci, da potlam žitku cenu nabiju ili povekšaju. ↩︎
*
Ali: …trsi se, išče dopadnosti. ↩︎
*
Koji se vu Boga ufaju. ↩︎
*
Po vsevdiljnem nemiru, rasipnosti, pravdah itd. ↩︎
*
Ne bude nikaj pridelal. ↩︎
*
Imetek takveh bedakov bude vu ruke mudreh došel i onda bude moral bedak iz milošče mudreh živeti. ↩︎
*
Sad, dobra dela pravičnoga jesu kakti živlenja drevo vu Raju (1 Moj 2,9; 3,18) ar ona doprinašaju ne samo njim, nego takaj drugem nevmrtelno živlenje. ↩︎
*
Nje dobavlja, k Bogu vodi. ↩︎
*
Vu 1. listu svetoga Petra delu 4, redu 18, čteje se: „Ako se pravičen komaj zveliči, nepobožen i grešnik gde se bude skazal?“ ↩︎