Knjiga Prirečjah — Del XII.

Koj ljubi v redu držanje,^* ljubi mudrost, koj pako mrzi na pokaranje, je bedak.
Koj je dober, zadobi milošču od Gospona, koj se pako zanaša na svoja mišljenja,^* hudobno barače.^*
Po hmanjici ne bude se čovek vtvrdil,^* a koren pravičneh ne bude se zgibal.
Marljiva^* žena je koruna svojega muža, ona pako koja sramote vredna čini, je kakti gnjiloča vu njegveh kostih.^*
Misli pravičneh jesu pravica, tolnači pako nepobožneh jesu vkanljivost.
Nepobožneh reči strežeju na krv,^* vusta pako pravičneh budu nje oslobodila.^*
Obrni nepobožnjake i njih nestane,^* hiža pako pravičneh bude opstala.
Človek bude iz svoje vučenosti znan,^* koj pako je oholen, ispostavlja se zametavanju.
Boljši je siromak koj je z svojem zadovoljen,^* nego bahati koj kruha strada. Cirkv 10,30.
Pravičen ima skrb za živlenje svoje marhe, srce pako nepobožnjakov je ljuto. Cirkv 20,30.
Koj svoje polje obdelava, bude z kruhom zasičen, koj pako je len, je najbedasteši.^* Koj je ljubek^* vu vinskem društvu, on vu svojem čvrstem stanu ostavlja sramotu.

Nepobožneh želja je potvrđenje najgoršeh,^* koren pako pravičneh bude napreduval.^*
Hmanjemu zaradi vusneh grehov približava se pogublenje, pravičen pako bude vušel stiski.^*
Iz sada svojeh vust bude vsaki z dobrem napunjen^* i poleg dela njegveh ruk bude se njemu povračalo.
Bedaku vidi se njegov put taj pravi, koj pako je muder, posluša tolnače.
Norc svoju srditost sproti pokažuje, koj pako krivicu pregleda, je pameten.
Koj govori kaj zna, govori kaj je prav, koj pako laže, je vkanljiv svedok.^*
Vnogi obečaju i zatem nje meč dušnoga spoznanja prebada,^* jezik pako mudreh je zdravje.^*
Istinska vusta vekom stalna opstaju,^* koj pako je prenagel svedok, plete laži z jezikom.^*
Vu srcu oneh koji zlo misliju je vkanljivost,^* one pako koji mir svetuju, sledi veselje.^*
Pravičnoga nikaj ne žalosti kaj se goder njemu događa, nepobožni pako budu napunjeni z zlem.^*
Lažljiva vusta jesu Gosponu gnjusoba, koji pako verno baračeju, dopadaju se njemu.
Pameten človek zakriva vučenost, a srce bedakov razodeva bedastoču.
Ruka jakeh^* bude gospoduvala,^* lena pako bude dači podvržena.^*
Tuga vu srcu človeka bude njega ponizila, ali po dobrem govorenju bude razveseljen.
Koj za volju svojega prijatela^* ne mara za škodu, je pravičen, put pako nepobožneh bude nje vkanil.^*
Vkanljivec ne bude našel dobička, a imetek človeka^* bude zlata vrednost imal.^*
Na putu pravice je živlenje, bludni pako put pelja vu smrt.

Objašnjenje

*
Koj se da voditi, opominjati. ↩︎
*
Na svoja nagnenja, na svoju pametnost. ↩︎
*
Koj čalarnosti zmišljava, takvoga on kaštiga. ↩︎
*
Ne bude imal stalne sreče. ↩︎
*
Ali pridna, kreposna žena. ↩︎
*
Je mužu tak škodljiva kak gnjile kosti. ↩︎
*
Koji zasede kuju ili koji šetuju bližnjemu na življenje. ↩︎
*
Vu pogibeli postavljene oslobađaju po navukih, opomenkih. ↩︎
*
Kak da bi ti grešnike obrnul, tak hitro njih nestane, njihova sreča. Kak da bi gdo ruku obrnul, tak malo stalno je njihovo dobrogođenje. ↩︎
*
Primerom njegove vučenosti (mudrosti) hvali se človek. ↩︎
*
Koj si svoj strošek pridela. ↩︎
*
Ne samo nema nikaj za jesti, nego njemu menjka takaj pameti. ↩︎
*
Prijeten, dopaden, zabaven. Ali: koj se rad vu vinskem društvu zadržava, on… ↩︎
*
Zločesteh stvarih… je optršenje dobreh. ↩︎
*
Pravični pako i njihove dobre stvari budu vendar izvišene. Ali: nepobožni poželjuju mreže nesreče (oni hočeju vlovljeni biti), koren pako pravičneh bude doprinesel sada. ↩︎
*
Nepobožnjak vlovi se vu svojeh lastoviteh rečih, suprotivno pako praveden, istinski človek vugne se pogibeli po svojoj zdravoj pameti. ↩︎
*
Koj mudro govori, bude obilnoga sada delnik. ↩︎
*
Koj ima svedočanstvo davati pak to govori kaj zna, on je svoju dužnost ispunil, suprotivno pako on, bilo iz kakvoga goder zroka, koj drugač govori, on ne sledi pravicu i istinu, nego vkanljivost. ↩︎
*
Ako oni prenaglo, nepremišljeno ali pak čisto kaj grešnoga jesu obečali. V. Mat 20. ↩︎
*
Ne puščaju se vu prenaglo obečanje. Ali: nepremišljeni frfravec je kakti prebadajuči meč, a mudreh jezik je ozdravlenje. Nepremišljeno govorenje, ne pazeč na okolnosti i nazočne osobe, je bodec vu dušu oneh na koje spada, suprotivno pako pokojno, premišljeno govorenje mudroga dobro godi, navlastito ako drugeh nepremišljenost ipak popravlja. ↩︎
*
Nad onem kaj govoriju. ↩︎
*
Svedok, koj ne premisli dobro kaj svedoči, prepada vu lažljiva valuvanja koja on, da posvedoči, z novemi lažmi potvrđava. ↩︎
*
Oni koji od drugeh zla zmišljavaju, to navadno čine iz lastovite hasni, ali se oni vkanjuju vu svojeh računih, pokehdob same sebe načinjaju nesrečne. ↩︎
*
Oni pako koji drugem k miru, to je: k pravoj sreči i k vsemu dobru pripomažeju, po tom vstanavljaju svoju lastovitu sreču i vu tom nahađaju zvirališče veselja. ↩︎
*
Pravični vklanja se vu vseh dogođajih božanski volji, on zna da Bog vsa na njegvo dobro obrača i zato ne pogubiva pokoj srca; nepobožen nema ovu batrivnost vu nesreči i zato je dvojvrsno nesrečen. Ali: pravičnomu se nikaj zla ne pripeča, nepobožni pako budu puni nesreče. ↩︎
*
Delavneh, posleneh, marljiveh. ↩︎
*
Marljiv bude si imetek napravil i postane svoj gospodar. ↩︎
*
Bude podložen. ↩︎
*
Bližnjega. ↩︎
*
Pravičen ne samo ne zavdaje svojemu bližnjemu nikakvo zlo, dapače za volju svojega bližnjega ne mara škodu sam trpeti, suprotivno nepobožnjak išče se z kvarom svojega bližnjega obogateti, ali se bude vu svojem nakanenju vkanil ar Bog ne bude puščal njegvu sreču stalnu opstati. Ali: pravičen ravna svojega bližnjega na pravi put, put pako nepobožneh pelja vu bludnost. ↩︎
*
Pravičnoga, marljivoga. ↩︎
*
Lov lenjakov bude prez napretka, pravičnoga, marljivoga pako človeka plača je bogatstvo. ↩︎