Knjiga Prirečjah — Del XIII.

Muder sin kaže navuk oca,^* koj pako je osmehavec, ne posluša kad se opomina.^*
Iz sada svojeh vust bude človek z dobrem zasičen,^* duša pako oneh koji zapovedi prekršuju je hmanja.^*
Koj čuva svoja vusta, čuva svoju dušu,^* koj pako vu govorenju je nepremišljen, njemu se bude zlo godilo.
Leni hoče i neče,^* delavneh pako duša bude vu obilnosti.^*
Pravičen mrzi na lažljivo govorenje,^* nepobožen pako osramočuje druge^* i sam bude osramočen.
Pravica čuva put nedužnoga, nepobožnost pako potkapa grešnika.^*
Jeden vidi se biti bogat, pak vendar nikaj nema, a drugi se vidi biti siromak, pak vendar ima veliko bogatstvo.^*
Človek otkupljuje svoje živlenje z svojem bogatstvom, koj pako je siromak, ne podnaša grožnje.^*
Svetlost pravičneh rasvečuje, svetnica pako nepobožneh bude vgasnula.^*
Med gizdavemi jesu vsevdilj svađe, koji pako vse z tolnačom činiju, ravnaju se od mudrosti.^*
Naglo skupspravljeno bogatstvo bude se pomenjšalo,^* koje se pako pomalom z rukami skup zbira, bude raslo.
Ufanje koje se odvlači trapi dušu, ako pako dojde kaj se želji, tak je to živlenja drevo.
Koj od kakve stvari z zametavanjem govori, on se za budučnost zavežuje, koj se pako zapovedi boji, bude vu miru živel.^* Vkanljive duše^* okolo bludiju vu grehih,^* pravični pako jesu milosrdni i smiluju se.

Zapoved mudroga je živlenja zvirališče da se vugne smrtnomu pogublenju.
Dober navuk^* bude dal milošču, na putu zametavcev je prepast.^*
Razumen človek čini vsa z tolnačom,^* koj pako je bedak, on razodeva svoju bedastoču.
Obznanitel nepobožnoga bude vu zlo prepal, veren pako poslenik je k sreči.^*
Siromaštvo i sramota dohađa zvrhu onoga koj zapušča strahuvanje, koj pako pokaranje dragovoljno prijemlje, bude na čast podignjen.
Želja, ako se spuni, razveseljuje dušu; bedaki odurjavaju one koji zlo bežiju.^*
Koj se pajdaši z mudrem, bude muder, koj je prijatel bedakov, bude njim jednak postal.^*
Grešnike preganja zlo, pravičnem pako budu se dobra vračala.
Dober ostavlja za odvetke sine i vnuke,^* a grešnika imetek bude pravičnomu začuvan.^*
Novo polje ocov doprinaša obilen sad, od drugeh pako bude krivično skupspravljan.^*
Komu se šibe milo vidi, on odurjava svojega sina, koj pako ljubi njega, vsevdilj strahuje njega. Dole 23,13.
Pravičen je i zasiti svoju dušu, trbuh pako nepobožneh ni nigdar sit.

Objašnjenje

*
Pokažuje njega vu činih. ↩︎
*
Muder sin posluša navuke svojega oca, osmehavec pako nikakve opomenke. ↩︎
*
Vid. gore 12, 14. ↩︎
*
I zato dobiva zlo i nesreču kakti posledicu toga. Ali: … nepobožneh poželenje je hmanjica (anda zato takaj dobivaju zlo). ↩︎
*
Od vnogeh grehov i muk. ↩︎
*
Je neodlučen, nikak se ne more na delo otpraviti i zato ostaje vu potrepčini. ↩︎
*
Poslen bude bogat. ↩︎
*
Na ogovarjanje. ↩︎
*
Po ogovarjanju. ↩︎
*
Pravičen hodi srečno, a nepobožen prepada vu nesreču. ↩︎
*
Ni vsaki vsigdar onakov kakvoga se zvana kaže. ↩︎
*
Bogat ima iz svojega bogatstva tu hasen da se on, ako se njegvo živlenje nahađa vu pogibeli, nje more otkupiti, siromak pako ima vekšu hasen da se njegvo živlenje po plenanju i pregonih menje nahađa vu pogibeli, on anda je menje kakvoj nesreči izvržen. ↩︎
*
Sreča pravičneh je svetlost (Job 18,5) koja vsevdilj sveti, sreča nepobožneh je svetlost koja bude vgasnula. ↩︎
*
Koji su odviš gizdavi da bi na druge pazili, budu zmir vu nemiru živeli, koji pako vu slogi dragovoljno drugeh tolnače prijemlju, budu mudri i od svađe oslobođeni. ↩︎
*
Kajti se takvo navadno krivičnem načinom skup spravlja. ↩︎
*
Koj od kakve zapovedi z zametavanjem govori, čini se krivca budučega suda Božjega, koj se pako zapovedi boji, bude ovde i onde mir našel (ovak Beda Navučitel). Drugi: koj od koga z zametavanjem govori, zavežuje se za potvrditi ono kaj govori, ali kakti očivesti lažec ono opozvati. Ali: koj reči (zapovedi) zametava, bude po zlu prešel, koj se pako zapovedi boji, njemu se bude naplatilo. ↩︎
*
Koji drugem zasede načinjaju. ↩︎
*
I vu nesreči. ↩︎
*
Ali: razum z dobrotum. ↩︎
*
Baratanja način zametavcev, koji neznajuče ne podvučaju, nego osmehavaju, doprinaša pogibeli i pogublenje. Ali: put zametavcev zrokuje boli. ↩︎
*
Z razbornostjum. Ali: z previdljivostjum. Pokažuje vu vsem tolnač i razum. ↩︎
*
Koj po naručenju nepobožnoga opravlja njegve posle i nakanjenje ispeljava, bude od Boga z nesrečum kaštigan, koj pako je pravednoga, poštenoga človeka veren i praveden opravitel, on sebi i svojemu zapovedniku pripravlja sreču i dobrogođenje. ↩︎
*
Ispunenje poželenj vgađa čutenjam. Ovakvo poželenj ispunenje iščeju duhovnem načinom bedasti i oni mrziju na vse one koji svoja poželenja zavuzdaju i ogibljeju se zla. ↩︎
*
Bude nesrečen. ↩︎
*
Pravičen ostavlja svoj imetek deci i dece deci. ↩︎
*
Krivično skupspravljeno blago nepobožnjakov navadno nema opstanka niti stalnosti, nego se vre od lastoviteh ladavcov ali od njihoveh odvetkov rasprudi i tak prehađa vu ruke vrednešeh ladavcov. ↩︎
*
Z onem kaj se pravičnem načinom za del odvečtva dobiva, moči se je dobro zdržavati, ali vnogo puti biva da prehađa vu ladanje oneh koji vu nje nikakve pravice nemaju. Ali: siromaku novo polje vnoga sada doprinaša, a bogatstvo, gde krivica lada, nestane, znikne, to je: siromak ali kreposten, ako samo kakvu krčevinu ima, more se dobro hraniti, krivičen pako bogatuš more svoje bogatstvo pogubiti i na zadnje stradati. ↩︎