Knjiga Tobijaša — Del I.

Tobijaševo pokolenje i njegva bogaboječnost.

Tobijaš je bil iz pokolenja i varaša Neftali^* koj leži vu gornjeh stranah Galileje, nad^* Nasonom, za^* putom koj pelja proti sunčenomu zahodu, koj iz leve strani^* ima varaš Žefet.
Kad bi on vu dnevih Salmanasara kralja asirijanskoga^* bil zarobljen ni vendar, akoprem vu sužanstvu držan, put istine zapustil^*
tak da je on vsa koja je mogel zmoči, vsaki dan podeljuval svojem skupsužnem bratom koji su bili iz njegvoga roda.^*
I akoprem je on zmed vseh vu Neftalijevem pokolenju najmlajši bil, tak vendar vu svojeh delih ni nikaj dečinskoga včinil.^*
Ar kad bi vsi bili išli k zlatomu teletu koje je Jeroboam, izraelski kralj, bil napravil, je se on sam vseh druženja habal, 3Kralj 12,18,
i išel je k Gosponovi cirkvi vu Jeruzalem i onde se je Gosponu Bogu izraelskomu vklanjal ter je vse svoje prvine i svoje desetine verno alduval
tak da je on tretje leto^* novakom vu veri^* i tuđinam vsu desetinu podeljuval.
Ova i ovem spodobna je on poleg božanskoga zakona kakti mladenec obdržaval.
Kad bi pako bil postal vrsten, je za ženu vzel Janu iz svojega pokolenja i iz nje je rodil sina kojega je po svojem imenu ozval,
i od dečinstva počemši je njega navučal bojati se Boga i habati se vseh grehov.
Kad bi anda on, z svojum ženum i sinom vlovljen, bil došel vu Ninive varaš k svomucelomu pokolenju,^*
opčuval je on (kad bi vsi od jestvin poganinov bili jeli)^* svoju dušu, niti se ni z njihovemi jestvinami ognjusil.
I pokehdob da je iz svojega celoga srca mislil na Gospona, je njemu Bog pred licem Salmanasara kralja dal milošču.^*
I dal je njemu oblast iti kam bi goder hotel i njemu je bilo dopuščeno včiniti kaj goder njemu bi bilo po volji.
Hodil je anda k vsem koji su bili vu sužanstvu i njim je daval hasnovite opomenke.
Kad bi pako bil došel vu Rages, varaš Medijancev i od onoga z čem je bil od kralja nadaruvan jošče deset talentumov srebra bil imal,^*
i med velikum vnožinum svojega roda bil videl stradati Gabela, koj je bil iz njegvoga pokolenja, je njemu na rukopis^* spomenutu vagu srebra dal.^*
I čez dugo časa poklamkam bi Salmanasar kralj bil vumrl i Senakerib, njegov sin, namesto njega bil kraljuval i sini izraelski vu njegveh očih bili odurni,
je Tobijaš vsaki dan hodil k svojem rođakom i nje batrivel ter vsakomu od svojega imetka deljil kuliko je premogel:
on je hranil gladne i golem je daval odeču i mrtve ter vmorjene^* je skrbljivo pokapal.
I kad bi se Senakerib kralj iz Judeje bil povrnul, bežeč pred pobojem z kojem je njega^* Bog zbog njegveh blaznostih pohodil i zvrhu tega rasrđen vnoge zmed izraelskeh sinov bil skončal, je Tobijaš njihova mrtva tela pokapal. 4Kralj 19,35; Cirk 48,24; 2Mak 8,19.
Kad bi pako kralju bilo vjavljeno, je zapovedal njega vmoriti i ves njegov imetek je otel.^*
Tobijaš pako je z svojem sinom i z svojum ženum pobegel i držal se je skrit vu svojoj goloti^* ar vnogi jesu njega ljubili.
Za četrdeset pako i petemi dnevi jesu kralja njegvi lastoviti sini vmorili. 4Kralj 19,17; 2Par 32,21; Izaj 37,38.
I Tobijaš je se nazad vu svoju hižu povrnul i ves njegov imetek je bil njemu nazad dan.

Objašnjenje

*
Vu grčkem prenašanju imenuje se Tižbe. Tobijaš anda je živel vu držanju oneh deseteh pokolenj koja su bila od Jude otpala ter se zlatomu teletu jesu vklanjala. On vendar je bil zažgani pravoga Boga klanjavec i med hmanjemi je ostal Bogu podložen i dober. ↩︎
*
Severno od Nasona. ↩︎
*
Zapadno od puta. ↩︎
*
Koj (Tobijašev varaš) iz leva, to je od severa itd. Juternjeh stran stanovniki obračaju se z obrazom k ishodu kada hočeju ležaj kakvoga mesta odlučiti. ↩︎
*
Vidi 4Kralj 17,3; 18,9. Prvomu zaroblenju izraelskeh plemen po Teglatfal Azaru vu letu 3257. pred Krišt. nar. 747. je morebiti Tobijaš vutekel. ↩︎
*
Veru i ljubav oposred poganinov! Božanski zakon je istina. Po putu istine hodi on koj se drži zakona niti se ne da od njega odvrnuti. Šolt 118,30. ↩︎
*
Koji po putu Zakona hodiju, ne prikapčujusvoje srce k vremenitem dobram, podeljuju od svoje obilnosti siromakom ter sami živeju siromaški. ↩︎
*
Primerom grčkoga je bil Tobijaš sirota. Jošče mlad je ladanje svojeh imanj poprijel i poleg toga se je kakti vrsten človek zadržaval. ↩︎
*
V. 5Moj 14,28.29. ↩︎
*
Onem med Židovmi živučem obrnjenem poganinom. Ovi nesu nikakve zemlje imali zbog česa su morali iz dobročinstvih živeti pokehdob drugu kakvu zaslužbu jesu teško najti mogli ↩︎
*
Koje je vre predi bilo otpeljano. V. 4Kralj 15,19. ↩︎
*
Od jestvin koje su bile Židovom vu Zakonu prepovedane kakti svinjsko meso itd. V. 3Moj 11. ↩︎
*
Primerom grčkoga prenašanja je bil on dvorni opskrbnik. ↩︎
*
Okolo četrnajst jezer škud. ↩︎
*
Valuvaš prez vsakoga vendar vujema. Primerom grčkoga je mu on ove peneze vu zalog dal. ↩︎
*
Spomenjenu glavnicu. Reč „vaga“ otud dohađa kajti starinska vremena je bilo zlato i srebro vagano, a ne kovano brojeno. ↩︎
*
Tela zločincev nezakopana ostaviti je bilo veliko osramočenje ar stanovnik juterneh orsagov drži si za najvekšu nesreču da bi se njegvo truplo za hranu zgrabljivoj zveri ostavilo (Jer 8,2; 22,19) i zato je pokapanje ovakveh tel osebujno ljubavi iskazanje. ↩︎
*
Njegov šereg. ↩︎
*
Tobijaš je pokapal, ne boječi se srditosti kraljevske, svoje kakti hudodelnike skončane zemljake ar on bi si primerom svetoga Ambrozijuša za greh bil držal da bi on dužnost pobožnosti iz straha pred smrtjum bil zapuščal. Dapače, je on smrt kakti za cenu i naplačenje svoje pokojnem iskazane milosrdnosti preštimaval. ↩︎
*
Siromaštvu. Skril se je pri svojeh prijatelih vsega mentuvan. ↩︎