Del VIII.

Tobijaš izganja nečistoga duha. Raguel postavlja njega za svojega odvetka.

1. Poklamkam bi se bili navečerjali, zapeljaju mladenca nuter k njoj.
2. Tobijaš pako spomene se iz angelskoga govorenja, izvadi iz svoje torbe falat jeter i postavi nje na žerjavku.
3. Onda Rafael angel pograbi vraga i njega priveže vu puščini gornjega Egipta.^*Angel je po božanski kreposti pretiral nečistoga duha vu puščinu da mu vsaku priliku ljudem naškoditi prevzeme. Ova reč „priveže“ ne stoji ovde vu svojem pravem slovnem znamenuvanju i tuliko znamenuje kak ʻveč mu ne dopustiti ljudi skušavati i napeljavatiʼ (Aug.) Prispod. 1Petr 5,8. Vidi Mat 8,29, pasku 31. Puščina gornjega Egiptuša je bila, primerom svetoga Hijeronimuša, čisto zaostavljena puna čemerneh živin i kač, i ovak čisto prikladno mesto za onoga koj vu sebi opuščen, čemer vsega zla vu sebi ponaša. Kesneše jesu vu ovoj puščini vnogi najsveteši ljudi stanuvali i nju vu raj božanski premenili. Ar sveti Anton, Makarijuš, Pakomijuš, Pafnucijuš i ostali sveti puščeniki jesu ovde živeli, vojujuči proti Šatanu i njega po svojem svetem živlenju odganjajuči. Ako li jednoč Krištuš bude vu vseh srcah ladal, onda bude puščina vu nebeski vrt premenjena i Šatan več nikakvoga ne najde na zemlji za se mesta.
4. Onda opomene Tobijaš devicu i reče njoj: „Sara, stani se i molemo danas, zutra i pozutra ar se ove tri noči z Bogom združujemo. Kada pako tretja noč mine, budemo v našem zakonu živeli.
5. Ar mi jesmo deca sveteh i ne moremo se^*Poleg naše svete dužnosti primerom koje zavežujemo se na sveto živlenje. tak skup združiti kak poganini koji Boga ne spoznavaju.“
6. I oni se jesu skupa stali i obodva skrušeno molili da bi se pri zdravju obdržali.
7. I Tobijaš reče: „Gospodine, ti Bog našeh ocov, naj tebe blagoslavljaju nebesa i zemlja, morje i zdenci i potoki i vsa tvoja stvorjenja koja se vu njih nahađaju.
8. Ti si načinil Adama iz ilovače zemlje i dal si njemu na pomoč Evu.“ 1Moj 2,7.
9. „I sada, Gospone, ti znaš da ja moju sestru^*Tečičnu. Vidi gore del 7, pasku 2. nesem za ženu vzel iz telovne nasladnosti, nego jedino iz želje zadobiti odvetka po kojem naj bi se tvoje ime vse večne čase blagoslavljalo.“
10. Sara je takaj rekla: „Smiluj se nam, Gospone, smiluj se i daj nam obodvem skupa zdravem starosti doživeti.“
11. I včinjeno je bilo ob^*Ob času pevčevoga popevanja. pevčevem kukurikanju da je Raguel zapovedal dozvati svoje sluge i z njimi skupa je odišel da bi jamu iskopali.
12. Ar on je rekel: „Morebiti je se njemu ravno kaj takvoga dogodilo kak onem sedmem mužom koji su k njoj nuter išli.“
13. I kad bi oni jamu načinili, povrne se Raguel k svojoj ženi i reče njoj:
14. „Pošlji jednu zmed tvojeh dekelj i naj pogleda če je mrtev da ga zakopam predi nego se razdani.“
15. I ona pošlje jednu zmed svojeh dekelj. Kad bi ova vu spalnicu bila stupila, najde nje zdrave i prez vsake škode skupa speče.
16. I ona dojde nazad i donese dobre glase i oni jesu blagoslavljali Boga, najmre Raguel i Jana, njegva žena,
17. i rečeju: „Tebe, gospodine Bože izraelski, blagoslavljamo pokehdob da se ni dogodilo kak se jesmo nadejali
18. ar ti jesi nad nami iskazal svoju milosrdnost i od nas odegnal neprijatela koj je nas preganjal,
19. i zvrhu obodveh jedinorođeneh^*Sara i Tobijaš jesu bili jedina deca svojeh roditelov. jesi se smiluval. Podelji njim, Gospone, da oni tebe jošče obilneše blagoslavljaju i tebi za volju svojega zdravja aldov tvoje hvale davaju da vsi narodi spoznaju da ti jesi sam Bog na celi zemlji.“
20. I sproti zapove Raguel svojem slugam da bi jamu koju su bili iskopali, zasipali predi nego bi dan nastal.
21. Svojoj pako ženi reče da bi goščenje naredila i pripravila vsa koja su putnikom za hranu potrebna.
22. On je takaj dal dve debele krave i četiri ovne zaklati i gosti napraviti vsem svojem susedom i vsem prijatelom.
23. I Raguel zakune Tobijaša da bi pri njem dva tjedna ostal.
24. Od vsega pako kaj je Raguel imal, je polovicu dal Tobijašu i načinil pismo da polovica koja jošče po njihovoj^*Raguela i njegve žene. smrti preostane, Tobijaša vsikak zapadne.

Objašnjenje

• *
  Angel je po božanski kreposti pretiral nečistoga duha vu puščinu da mu vsaku priliku ljudem naškoditi prevzeme. Ova reč „priveže“ ne stoji ovde vu svojem pravem slovnem znamenuvanju i tuliko znamenuje kak ʻveč mu ne dopustiti ljudi skušavati i napeljavatiʼ (Aug.) Prispod. 1Petr 5,8. Vidi Mat 8,29, pasku 31. Puščina gornjega Egiptuša je bila, primerom svetoga Hijeronimuša, čisto zaostavljena puna čemerneh živin i kač, i ovak čisto prikladno mesto za onoga koj vu sebi opuščen, čemer vsega zla vu sebi ponaša. Kesneše jesu vu ovoj puščini vnogi najsveteši ljudi stanuvali i nju vu raj božanski premenili. Ar sveti Anton, Makarijuš, Pakomijuš, Pafnucijuš i ostali sveti puščeniki jesu ovde živeli, vojujuči proti Šatanu i njega po svojem svetem živlenju odganjajuči. Ako li jednoč Krištuš bude vu vseh srcah ladal, onda bude puščina vu nebeski vrt premenjena i Šatan več nikakvoga ne najde na zemlji za se mesta. ↩︎
• *
  Poleg naše svete dužnosti primerom koje zavežujemo se na sveto živlenje. ↩︎
• *
  Tečičnu. Vidi gore del 7, pasku 2. ↩︎
• *
  Ob času pevčevoga popevanja. ↩︎
• *
  Sara i Tobijaš jesu bili jedina deca svojeh roditelov. ↩︎
• *
  Raguela i njegve žene. ↩︎