Pokažuje apoštol iz kulikeh vu Aziji započeteh suprotivčin izbavil je njega Gospon da bi i on druge batrivel, zatem, očitujuči srca svojega i navuka istinitost, pokazuje da premda, poleg onoga kaj si je bil naprvo stavil, k njim ni došel, to ni po njegovoj včinjeno nestalnosti, potvrđavajuči da stalna je prodekuvanja njegovoga istina.
- Pavel, apoštol Ježuša Krištuša po volji Božjoj, i Timotejuš, brat Cirkvi Božjoj, koja je vu Korintušu, z vsemi svetemi koji su po celoj Akaji.
- Milošča vam i mir od Boga, Oca našega, i Gospona Ježuša Krištuša.
- Blagoslovljen budi Bog i Otec našega Gospona Ježuša Krištuša, Otec milosrdnosti i Bog vsega obatrivenja
- koj nas batrive vu vsoj našoj nevolji da i mi moremo batriveti one koji su vu vsakojačkoj stiski po opominjanju z kojem se mi sami opominamo od Boga.
- Ar kak goder trplenja Krištuševa obiljuju vu nami, ravno tak i po Krištušu obiljuje obatrivenje naše.
- Ali se pako trapimo, na vaše opominanje i zveličenje (biva to), ali se batrivemo, za vaše obatrivenje biva to, ali se opominamo, na vaše opominanje i zveličenje biva to koje opravlja podnašanje oneh isteh trplenj koja i mi trpimo
- tak da naše ufanje gledeč na vas je stalno pokehdob znamo da kak goder ste vi tovaruši trplenj, ravno tak i obatrivenja budete.
- Ar nečemo da ne bi znali vi, bratja, traplenje naše koje se nam je pripetilo vu Aziji pokehdob smo preko mereoptrženi bili zvrhu naše moči, tak da se je nam takaj živlenje pridurilo.
- Ali mi sami vu sebi dopitanje smrti imeli jesmo da se sami na se ne zanašajmo, nego vu Boga koj obuđuje mrtve.
- Koj nas je iz tulikeh pogibelih otel i iskopal, vu kojega ufamo se da nas bude i jošče otel.
- Ako pomagali budete i vi vu molitvi za nas da po vnogeh osobah vnogo hvale zvrši se za nas zarad daruvanja koje nam je dano.
- Ar dika naša je ova, svedočanstvo dušnovesti naše, da smo vu prostoči srca i istinitosti Božjoj, a ne vu mudrosti telovnoj, nego vu milošči Božjoj živeli na svetu ovem, obilneše pako pri vas.
- Ar druga ne pišemo vam, kak koja ste čteli i spoznali. Ufam se pako da tja do konca spoznali budete,
- kak ste i spoznali nas iz jedne strane, da dika vaša jesmo kak i vi naša na dan Gospona našega Ježuša Krištuša.
- I z ovum zaufanostjum hotel sem predi k vami dojti da drugu milošču bi imali
- i prek vas prejti vu Macedoniju i opet iz Macedonije dojti k vam ter od vas sprevoditi se vu Judeju.
- Kada sem anda to hotel, je li sem kaj nepremišljenoga činil? Ali koja mislim, poleg tela mislim da bude pri meni „je“ ali „ni“?
- Veren je pako Bog pokehdob govorenje naše, koje je bilo proti vam, neje bilo vu onem „je“ ali „ni“.
- Ar Božji Sin, Ježuš Krištuš, koj je med vami po nas nazveščen, po meni i Silvanušu i Timotejušu, ni bil „je“ i „ni“, nego „je“ bilo je vu njem.
- Ar kuliko goder obečanj božanskeh je bilo, jesu vu onem „je“: zato i po njem je „Amen“, (naj bude) Bogu na diku našu.
- Koj pako potvrđava nas z vami vu Krištušu i koj namazal je nas, je Bog,
- koj i zapečatil je nas i dal zalog Duha vu srcah našeh.
- Ja pako svedoka Boga nazivam na dušu moju da oprosteči vam nesem došel več vu Korintuš, ne kajti ladamo nad verum vašum, nego pomočniki jesmo veselja vašega ar vu veri stojite.
