Pokažuje zakaj k njim ni došel da ne bi vekše zrok bil žalosti opomenuvši da praznika onoga nazad naj primeju vu milošču, zajedno obznanivši da z velikem zadnjič trudom ali vendar takaj z velikem napretkom je prodekuval akoprem prodekuvanja njegovoga lepa duha nekojem smrti prilika je bila.
- Odlučil sem pako to isto vu meni da ne bi opet vu žalosti došel k vam.
- Ar ako vas ja žalostim, a gdo je koj mene razveseli kak koj po meni je ražalosten?
- I to isto pisal sem vam da, kada k vam dojdem, ne budem žalost zvrhu žalosti imel nad onemi nad kojemi bi se bil moral veseliti zaufajuči se na vas vse da je veselje moje vseh vas veselje.
- Ar iz velikoga traplenja i stiske srca pisal sem vam med vnogemi suzami, ne da bi se ražalostili, nego da spoznate kakovu ljubav imam obilenše proti vam.
- Ako gdo pako je ražalostil, ni mene ražalostil, nego iz strane da ne optršim vse vas.
- Zadosta je njemu, koj takov je, pokaranje ovo koje biva od vnogeh,
- tak da suprotivno bolje njemu otprostite i obatrivete ga da se od obilneše žalosti ne prevzeme koj takov je.
- Zbog česa prosim vas da potvrdete proti njemu ljubav.
- Ar sem zato i pisal da spoznam skušavanje vaše, je li vu vseh pokorni jeste.
- Kojem pako kaj vi otpustili jeste, i ja njem otpustim ar i ja kaj sem otpustil, ako sem kaj otpustil, zaradi vas sem otpustil vu osobi Krištuševi
- da se ne prekanimo od Šatana ar znamo mišlenja njegova.
- Kad bi pako došel bil vu Troadu zaradi Evangelijuma Krištuševoga i vrata mi otprta bi bila vu Gosponu,
- nesem imel pokoja vu duhu mojem zato kajti nesem našel Tituša, brata mojega, nego, spričavši se njem, povdal sem se vu Macedoniju.
- Bogu pako hvala koj nam vsigdar obladanje da vu Krištušu Ježušu i duha spoznanja svojega očituje po nas vu vsakem mestu
- ar smo Krištuševa dobra duha Boga vu oneh koji zveličeni postaju i vu oneh koji pogineju.
- Jednem zadnjič duha smrti na smrt, drugem pako duha živlenja na živlenje. I k ovem gdo je tak prikladen?
- Ar nesmo kak prevnogi kvareči reč Božju, nego iz otprtosrčnosti, nego kakti iz Boga pred Bogom vu Krištušu govorimo.
