Nagovarjanje da vbogem koji vu Jeruzalemu stanuju z pripravnem srcom almuštvo naj davaju, tak po Macedoncev preporučanju, kak po Krištuševi peldi, opomenuvši da koj vre zdavna činiti vzeli su si naprvo, to sada poleg vsakoga premogučnosti naj zvrše i službenike hvali koje pošilja za nje pobrati.
- Na znanje pako davamo, bratja, milošču Božju koja dana je po cirkvah macedonskeh
- da vu vnogem zveđanju nevolje obilnost veselja njihovoga je bila i najvišeše siromaštvo njihovo obiljuvalo je vu bogatstvu priprostoče njihove.
- Ar poleg premogučnosti svedočanstvo njim dajem i zvrhu premogučnosti zadovoljni bili jesu.
- Z vnogem opominanjem proseči nas milošču i opčinstvo službe koja se čini med svetemi
- i ne kak smo se ufali, nego su sami sebe dali prvič Gosponu, zatem nam po volji božanskoj,
- tak da bi prosili Tituša da kak je počel, tak i naj dovrši pri vas milošču ovu.
- Ali kakti goder vu vseh obiljuvate vu veri i govorenju i znanju i vsoj skrbljivosti, vrh toga i vu ljubavi vaši proti nam, da i vu ovoj milošči obiljujete.
- Ne velim kakti zapovedajuči, nego po drugeh skrbljivosti, takaj vaše ljubavi nakanenje dobro skušavajuči.
- Ar znate milošču Gospona našega Ježuša Krištuša da zbog vas vbogi je postal pokehdob bi bil bogat da po njegovem siromaštvu bogati bi postali
- i tolnača vu tom dajem ar ovo je vam hasnovito koji ste ne samo činiti, nego i hoteti započeli od prešesnoga leta.
- Sada pako i vu činu zvršete da kak goder pripravno je srce voljno, tak naj bude i zvršenje iz onoga kaj imate.
- Ar ako volja je pripravna, poleg onoga kaj ima, prijetna je, ne poleg onoga kaj nema.
- Ar neču da drugi lehkoču, vi pako teškoču imate, nego vsi jednak.
- Vu vezdašnjem vremenu vaša obilnost njihovo siromaštvo nadomesti da i njihova obilnost vašega pomenjkanja bude nadomeščenje da postane jednakost, kak pisano je:
- „Koj je vnogo pobral, ni obiljuval i koj je malo nabral, ni imal menje.“
- Hvala pako Bogu koj je vu Tituševo srce ravno takvu skrbljivost za vas dal
- ar je on zadnjič opominanje prijel, ali pokehdob je bil skrbljiveši, povdal se je k vam ob svojoj volji.
- Mi smo takaj poslali brata kojega hvala je po vseh cirkvah zbog Evangelijuma kojega je on nazveščal,
- ne pako samo to, nego on je takaj od vseh opčinah određen za pajdaša našega putuvanja zbog ove milošče koja se od nas na Gosponovu diku i poleg odlučene naše volje zvršava.
[…]
