Svetoga Jakopa apoštola opčinski list

Vuči skušavanj hasen ter da se mudrost mora od Boga prositi z zaufanostjum; Bog ni skušitel ali početnik greha, nego od njega ishađa vsaki dober dar; opomina da budemo na poslušanje hitri, a na govorenje i srditost kesni; niti ni dosta istinu poslušati ako se ona ne zvršava vu činu; pridaje takaj koje je pravo i neoskrunjeno bogočastje.

Jakop, Boga i našega Gospona Ježuša Krištuša sluga, dvanajsterem pokolenjam koja jesu vu raspršenju^*, svoje pozdravlenje.
Za najvekšu radost držete, moja bratja, kada vu razlučna skušavanja vpadnete^*
znajuči da zveđanje vaše vere z sobum donaša trpljivnost,
trpljivnost pako ima zvršeno delo tak da vi budete zvršeni i nedužni i nikaj vam ne zmenjka.
Ako pako gdo zmed vas potrebuje mudrost,^* naj si nju isprosi od Bog, koj vsem obilno podeljuje i nikomu ne spočitava,^* i ona bude njemu dana.
Naj pako prosi vu veri nikaj ne dvoječi^* ar koj dvoji, je spodoben morskomu slapu koj se od vetra giblje i okolo goni.^*
Takov anda človek naj ne štima da bude kaj dobil od Gospona.
Človek razdeljenoga srca je nestalen vu vseh svojeh putih.^*
Ponizen pako brat naj se diči vu svojem izvišenju.
Bogat pako vu svojoj poniznosti^* pokehdob on bude kakti cvet trave preminul!
Ar Sunce je izišlo z sparinum i je osušilo travu i njejin cvet je otpal i lepota njejine spodobe je poginula: tak bude takaj bogatuš na svojeh putih povehnul.
Blažen človek koj podnese skušavanje ar kada bude iskusen, bude prijel korunu živlenja^* koju Bog je obečal onem koji ljubiju njega. Red 14,18.
Nigdo pako naj ne reče, kada se skušava, da se skušava od Boga ar se Bog ne more skušavati na zlo, sam pako nikoga ne skušava.
Vsaki se pako skušava pokehdob se od svojega lastovitoga poželenja vleče i vabi.
Onda, kada poželenje zanosi, rađa greh, greh pako, kada se zvrši, porađa smrt.
Najte anda bluditi, moja preljubljena bratja!^*
Vsako dobro danje i vsaki zvršeni dar dohađa odzgor dole od Oca svetlostih^* pri kojem ni nikakve premembe niti nikakve premenanja sence.^*
Ar^* iz slobodne volje je nas z rečjum istine porodil da budemo kakva prvina njegvoga stvorjenja.^*
To vi znate, moja preljubljena bratja! Zato vsaki človek naj bude hiter na poslušanje,^* kesen pako na govorenje^* i kesen na srditost.^*
Ar srditost človeka ne čini kaj je pred Bogom pravično.^*
Zaradi toga^* odvrzite vsaku nečistoču i obilnost hmanjice ter vu krotkoči primite zasađenu reč koja more vaše duše zveličiti.^*
I budite zvršiteli reči, a ne samo poslušiteli, po čem bi sami sebe vkanjuvali.^*
Ar ako je gdo samo poslušitel reči, a ne zvršitel, takov se prispodablja k človeku koj svoj naravski obraz ogleda vu zrcalu
i kada je njega pogledal, odide i mahom pozabi kak je zgledal.^*
Koj pako zvršenu zapoved sloboščine pregleda i vu njoj opstaje,^* niti ni včinjen pozabljiv poslušitel, nego zvršitel dela, ov bude po svojem delu blažen postal.
Ako pako gdo štima da je bogoslužen, a ne zavuzda svoj jezik, nego napeljava svoje srce, ovoga bogoslužnost je prazna.^*
Čisto i neoskrunjeno bogočastje pred Bogom i Ocom je ovo: sirote i vdovice pohađati vu njihoveh nevoljah^* i sebe neoskrunjenoga čuvati od ovoga sveta.^*

Objašnjenje

*
Židovom koji izvan Palestine med poganini živeju raspršeni i na krščanstvo jesu prestupili. ↩︎
*
Po skušavanjih razmevaju se ovde navlastito vanjski pregoni, optršenja, kak Luk 22,28, kojem krščeniki vnogovrsno jesu bili podvrženi. Krščenik mora se zvrhu ovakveh skušavanjih veseliti pokehdob njemu ponuđaju priliku vu veri stalno opstajati i vu trpljivnosti zvršenost stignuti. Ovak se jesu apoštoli zvrhu svojeh muk veselili (Čin Ap 5,41). ↩︎
*
Navlastito da spozna veliku hasen skušavanj. ↩︎
*
Ako človek božanskeh darov dobro se vživa ar drugač bi se njemu godilo kak onomu evangelijumskomu slugi (Mat 18,32 i sl.). ↩︎
*
Stalno ufajuči se, vu božansku mogučnost i darežljivost nikaj ne dvoječi. Bog hoče da se po zaufanosti oblada ter da se njemu istom kakti sveta sila včini. Ovak je obladal Jakop, 1Moj 32,24. ↩︎
*
Ar koj dvoji, je igra svojeh mišlenj kak je oblak igra vetrov, ar sad drži Boga za tuliko mogučega i dobrotivnoga da more ispuniti njegve prošnje, sad pako ne. ↩︎
*
Takov med veruvanjem i neveruvanjem, med Bogom i svetom razdeljeni človek je vu opčinskom nezaufan i neseguren vu vseh svojeh činih. ↩︎
*
Pokehdob apoštol zmir jošče od trpljivnoga obladanja skušavanj govori (v. r. 12.), tak oveh redov vu skupsvesku z prvešemi je ovo znamenuvanje: nikakov zvanjski stališ, vu kojem se nahađate ali vu kojega budete prestavljeni, ne sme vam na skušavanje biti da bi vu veri nestalni bili ar siromak ni zato nesrečen kajti je siromak, dapače, naj se zbog svojega izvišenja diči da bude Božje dete i brat Ježuša Krištuša, odvetnik i skupladavec vu Nebesih, a bogatuš ni zato srečen kajti je bogat, dapače svoju sreču i diku naj išče vu poniženja stališu vu kojem se vsaki krščenik po zatajenju i tela krotenju mora nahađati, ne pako vu nestalnem bogatstvu, koje je denes, a zutra ga več ni. ↩︎
*
Plaču vekivečnoga blaženstva. ↩︎
*
Ne pripisujte greh, zlo Bogu ar od Boga neg samo dobro dohađa. ↩︎
*
Od zvirališča vsake svetlosti, tak zemeljske kak duhovne, istine, kreposti, milošče i vsega dobra. ↩︎
*
Koj sebi vu svojoj lastovitosti samo dobra davajuč zmir jednak ostaje i vu opčinskom je nepremenljiv. ↩︎
*
Da vsaki dober dar je od Boga, to pokažuje apoštol po daru krščanstva koj je zmed vseh darov najboljši. ↩︎
*
Iz slobodne milošče svoje samovladne volje (ovo je temelj našega zveličenja) je nas preporodil i novem stvorjenjem načinil. Način k tomu je bila reč istine, Evangelijum, z svojemi miloščih načini, navlastito krst, božansko namenenje je bilo da bi mi spadali k prvem vu kojeh se ova duhovna prememba bude opravila. ↩︎
*
K ovomu opomenku (od 19. do 27. reda), da bi, najmre, reč Božju puščali vu dobreh delih sad doprinašati, je apoštolu prez dvojmbe priliku dala ona vu naprvo stoječem redu spomenjena reč istine. Kajti da ova reč bude nam služila na zveličenje, tak se mora poslušati, vu čisto srce prijeti ter vu činu zvršiti, od česa on vu 19., 21. i 22. redih barače. Vera dohađa iz čujenja veli sv. Pavel ap. Rim 10,17. ↩︎
*
Vu krščanskeh skupčinah je se višeputi događalo da se nekoji rečljivi jesu vtekali čednešem vu reči da tak pokažeju svoju mudrost (1Kor 14,29), ove navlastito je imel apoštol na misli. ↩︎
*
Pokehdob rečljivi navadno jesu nagloga srca ter se lehko rasrdiju, tak opomina apoštol da se čuvaju od srditosti. On zadnjič vsaku i slednju srditost ne prepoveda ar je i pravična srditost, kada najmre z mirnem premišljavanjem vojuje proti grehu i krivičnosti – on samo nepremišljenu srditost kudi. ↩︎
*
Vu naglosti čini i veli človek višeputi kaj je njemu potlam žal. „Vu srditosti nikaj ne včini niti ne reči“, veli nekoj mudri, „doklam vsu abeceju ne zgovoriš i do toga se tebi srce vtaži“. ↩︎
*
Kajti morate novo stvorjenje postati (r. 18.) ter da zvršeno stvorjenje postanete. ↩︎
*
Zato odvrzite vsaku srca nečistoču i iz nje izrađajuču se, istom vu činu preobiljujuču se hmanjicu ter takaj buduč prijemljite vu pokojnem, dobrovoljnem premišljavanju onu vre predi vu vaša srca zasađenu reč Božju kajti po tom morete se zveličiti. ↩︎
*
Koji štimaju da je to vre dosta na zadobljenje zveličenja ako li samo poslušaju reč Božju akoprem nju vu činu ne zvršavaju. ↩︎
*
Oni koji reč Božju samo poslušaju, vkanjuju sami sebe ar oni prispodabljaju se k človeku koj ide mimo zrcala pak se vu nje ogleda. Kak goder ov samo za čas vidi svoj obraz ter ipak mahom pozabi, ravno tak vidi poslušitel reči ob času prodečtvih zločest stališ svojega srca, ali kajti nju vu činu ne zvršava, tak se spozabljuje iz ovoga svojega stališa, ne poboljša se ter posledno niti se ne more zveličiti. ↩︎
*
Koj krščansku veru ne samo iz vekšega, nego potpunoma zna i stalno vu njoj opstaje, niti ni itd. Krščanska vera imenuje se zvršena kajti vodi k zvršenosti. Imenuje se zapoved sloboščine kajti nas od jarma službe Mojžeševeh šeg (Gal 5,1) i od greha (Jan 8,32) oslobađa. ↩︎
*
Ako se gdo ne zdržava od vseh jezika grehov, od lažih, ogovarjanja, otepanja, blaznostih, nesramneh i nepristojneh rečih, od nehasnovitoga žlabranja ter je vu ovem bljudnem mišlenju da to nikaj ni, takov ni bogaboječi, ni bogoslužen. ↩︎
*
Vu opčinskom poslenu ljubav bližnjega zvršavati. ↩︎
*
Od poželenja, gizdosti, skuposti i ljubavi sveta. ↩︎