Svetoga Jakopa apoštola opčinski list

Opomina da ne gledaju na preštimanje osob; koj prekrši jednu zapoved, on je prekršitel Zakona; nagovarja da dela milosrdnosti zvršavaju pokazuči da se človek po delih opravičuje ar vera prez delih je mrtva.

Moja bratja, pokehdob da verujete vu našega odičenoga Gospona Ježuša Krištuša, tak ne gledajte na zvunešnje osob.^* 3Moj 1,17; Prir 24,23; Red 42,1.
Ar ako vu vaše spravišče^* vlezne kakov človek koj ima zlati prsten i lepu opravu, vlezne pako takaj vbogi vu priprosti opravi
ter pogledite na onoga koj je oblečen vu lepoj opravi i velite njemu: „Ti se sim sedi na dobro mesto!“, vbogomu pako velite: „Ti stoj onde ali se sedi k podnožju mojeh nog!“^*
Je li vi ne sudite svojvoljno i je li neste postali suci krivičneh mišlenj?^*
Posluhnite, moja preljubljena bratja! Ne li Bog je na ovem svetu odebral vboge da bi bili bogati vu veri i odvetniki kraljestva koje Bog je obečal onem koji njega ljubiju?^*
Vi pako jeste neopoštenili siromaka.^* Ne li bogatuši vas po mogučnosti tršiju i oni vas vlečeju na sude?^*
Je li oni ne blazniju lepo Ime z kojem se vi ozivate?^*
Ako vi anda kraljevsku zapoved^* zvršavate primerom Pisma: „Ljubi svojega bližnjega^* kak samoga sebe!“, tak prav činite. Mat 22,39.
Ako pako na zvunešnje osob gledite, tak činite greh i budete od Zakona kakti prekršiteli kaštigani.^*
Koj anda celi Zakon obdržava ali samo jednu zapoved prekrši, on je včinjen krivec vsega.^*
Ar koj je rekel: „Ne praznuj!“, je takaj rekel: „Ne vmarjaj!“. Ako anda ne prazniš, ali vendar vmarjaš, tak jesi včinjen prekršitel Zakona.
Tak govorete i tak činete kak koji po Zakonu sloboščine^* budete suđeni.
Ar sud prez milosrdnosti bude imel on koj ni zvršaval milosrdnost, milosrdnost pako nadvišava sud.
Kaj hasni, moja bratja, ako gdo veli da ima veru, dela pako nema? Je li njega more zveličiti vera?
Ako bi pako brat ali sestra goli bili i bi potrebuvali vsagdašnju hranu,
pak bi gdo zmed vas rekel njim: „Hodte vu miru, ogrejte se i zasitete se!“, ne bi pako njim dali koja jesu potrebna telu, kaj bi to njim hasnelo?
Tak je takaj vera, ako nema del, sama vu sebi mrtva.
Ali reče gdo: „Ti imaš veru, ja pak imam dela. Pokaži meni tvoju veru prez del, ja pak pokažem tebi iz delih moju veru.“^*
Ti veruješ da je jeden Bog, to ti dobro činiš, ali takaj duhi peklenski veruju i trepečeju.^*
Hočeš pako znati, o, čalarni človek, da vera prez delih je mrtva?^*
Je li ni bil Abraham, naš otec, iz delih opravičen kajti je on svojega sina Izaka alduval na oltaru?
Vidiš da vera je skupa z njegovemi deli posluvala, po delih je bila vera zvršena.
I ovak se je dopunilo Pismo koje veli: „Abraham je veruval Bogu i to je bilo njemu k pravičnosti priračunano i on je bil imenuvan prijatel Božji.“
Vidite anda da se človek iz delih opravičuje i ne samo iz vere?
Spodobno je li ni takaj Rahab^* grešnica iz delih opravičena včinjena pokehdob je poslenike prijela i po drugem putu otpravila?^*
Ar kak goder telo prez duha je mrtvo, ravno tak takaj vera prez delih je mrtva.

Objašnjenje

*
Apoštol započimlje drugu stran svojega lista z kudenjem nepridneh šeg koje se jesu zavlekle vu krščanske skupčine. Po oveh rečih hoče on to reči: pri razdeluvanju službih, častih, mest ne gledajte na zvanjsko preštimanje pokehdob se vera vu našega odičenoga Gospona Ježuša Krištuša nikak ne slaže z krivičnem precenanjem niščetneh, zvunjskeh posebnostih koje se vidiju na kakvem človeku. ↩︎
*
Vu bogoslužni zbor. ↩︎
*
Vu sinagogah jesu se na stranah nahađala naredna i prilična sedališča preštimanešeh i bogatešeh Židovov. Siromaškeši pako jesu morali stati ali na zemlju, posledno k nogam oneh na stranah sedečeh, sesti se. Pokehdob ova razluka je se takaj vu krščanskeh zborih obdržavala, nju kudi apoštol kakti kakvu nekrščansku navadu. ↩︎
*
Pokehdob ne gledite na krepost ali zaslužbe, nego samo na preštimanje i bogatstvo. ↩︎
*
Ne li, Bog je takaj priproste i siromake ovoga sveta pozval da bi takaj oni postali bogati i odvetniki vekivečnoga blaženstva koje Bog je obečal vsem koji njega ljubiju i na koje imaju vekšu pravicu samo oni koji njega več ljubiju. ↩︎
*
Potom kajti vi njemu bogatuša pretpostavljate samo zato kajti je bogat. ↩︎
*
Na sterjanje duga. ↩︎
*
Je li oni po svojeh silovitostjah ne opoštenjuju ime Krištuševo po kojem se vi imenujete krščeniki? Oni anda niti takvo pretpostavlanje ne zaslužiju. ↩︎
*
Poglavitu zapoved. ↩︎
*
Anda vu opčinskom vsakoga bližnjega negledeč zvanjske posebnosti. ↩︎
*
Akoprem neg samo vu jednem pomenjkate, budete kakti prekršiteli Zakona kaštigani. ↩︎
*
To je: zagreši proti Zakonu kakti kaj celomu, vu opčinskom proti ljubavi od koje ves Zakon, vse zapovedi visiju, vu opčinskom proti Bogu koj je vse zapovedi dal ar koj jednu stranku od česa celoga vrazi, on vrazi takaj to celo na koj ta stranka spada, vrazi ljubav, vrazi vu opčinskom Boga. Zakon dobrorednosti je kakti kaj celoga i potrebuje proti vsem svojem prepisom pokornost. Koj si anda vu tom kakvu iznembu dopušča, potom vu opčinskom pokažuje svoje proti celomu Zakonu zametavanje i zato bude kaštigan kakti prekršitel Zakona vu opčinskom. Potom vendar neče reči apoštol da jeden jedini greh, ako je veliki ili smrtni, je vre zadovoljen človeka kakti prekršitela Zakona mentuvati božanske dopadnosti i vekivečnoga blaženstva ar Jakop ima ovde navlastito velike grehe na misli. ↩︎
*
Poleg krščanskoga Zakona. ↩︎
*
Ali reče gdo onomu koj se diči z verum, delih pako nema: „Ti veruješ ter se dičiš z verum, ja pako z verum zjedinujem dela. Pokaži anda meni tvoju veru koja je prez delih, zaisto to ti ne moreš, ja pako morem tebi moju veru pokazati iz mojeh delih i tebe opsvedočiti da ja jesem pravoverni, kaj ti ne moreš.“ ↩︎
*
Takaj vragi veruju prez delih, ali ova vera samo povekšava njihove muke. ↩︎
*
Tak vu to ime čuj svedočanstva takaj iz Svetoga pisma. ↩︎
*
Rahab koja pred svojem obrnenjem je sprevađala bludno živlenje. ↩︎
*
Takaj Rahab je z verum zjedinila dela i nju je po delih pokažuvala, po čem je zadobila božansku dopadnost ter je bila pri živlenju obdržana. Od toga obilneše Joz 2,4; Žid 11,31. Na zadnješem mestu biva spomenek samo od vere, ali ravno to je vera koja je z deli skupa složena. ↩︎