Del I.

Pavel zahvaluje Bogu za dare podeljene Korintijancem medtemtoga žaluje se da zbogkrsnikov bi bile med njimi nesloge, veseleči se da poslan za prodekuvati Evangelijum retke je krstil, pokazujuči takaj da je zahičena sveta mudrost ter da su prosti izebrani, kak goder takaj zadržava se zveličenje vu Krištuševi smrti, kojega nazveščanje vidi se svetu bedastoča, verujučem pako krepost i mudrost ar zato zavržena sveta odebira Bog da se ne bi gdo vu sebi dičil.

1. Pavel, pozvan apoštol Ježuša Krištuša po volji božanski, i Zosteneš brat,
2. Cirkvi Božjoj koja je vu Korintušu, posvečenem vu Krištušu Ježušu, pozvanem svetem z vsemi koji zazivaju ime Gospona našega Ježuša Krištuša vu vsakem mestu njihovem i našem.
3. Milošča vam i mir od Boga, Oca našega, i Gospona Ježuša Krištuša!
4. Ja se zahvaljujem mojemu Bogu vsigdar za vas, za onu milošču Božju koja je vam dana vu Ježušu Krištušu:
5. da ste vi po njem vu vsem bogati postali, vu vsakem navuku i vu vsakoj znanosti,
6. kak je svedočanstvo Krištuševo vu vas potvrđeno postalo,
7. tak da vam, koji na očituvanje Gospona našega Ježuša Krištuša čakate, ne menjka nikakve milošče.
8. Koj vas takaj tja do konca bude potvrđuval da prez greha budete na dan došestka našega Gospona Ježuša Krištuša.
9. Veren je Bog po kojem pozvani jeste vu opčinstvo Sina njegovoga Ježuša Krištuša, Gospona našega.
10. Prosim pako vas, bratja, po imenu Gospona našega Ježuša Krištuša da jednako govorite vsi i da ne budeju med vami odelenja, budete pako zvršeni vu jednakoj misli i v jednoistem štimanju.
11. Ar obznanjeno je meni od vas, bratja moja, od oneh koji su vu Klojes da su svade med vami.
12. To pako velim da vsaki zmed vas veli: „Ja zadnjič jesem Pavlov“, „Ja pako Apolov“, „A ja Cefašev“, „Ja pako Krištušev“.
13. Razdeljen je Krištuš? Je li Pavel raspet je za vas ali vu imenu Pavlovem krščeni jeste?
14. Hvalu dajem Bogu da nesem nikoga zmed vas krstil, kak Krišpuša i Kajuša,
15. da gdo ne reče da vu imenu mojem krščeni jeste.
16. Okrstil sem pako i Štefanovu družinu, drugač ne znam je li sem koga drugoga krstil.
17. Ar ni poslal mene Krištuš krstiti, nego prodekuvati, ne vu mudrosti reči da se ne isprazni križ Krištušev.
18. Ar reč od križa je onem koji se skvariju bedastoča, onem pako koji zveličeni postanu, to je nam, je božanska krepost.
19. Ar pisano je: „Pogubim mudrost mudreh i razumnost razumneh zavržem.“
20. Gde je mudri? Gde je pisar? Gde zveđavec sveta ovoga? Ne li k bedastoči načinil Bog mudrost sveta ovoga?
21. Ar pokehdob vu mudrosti božanski ni spoznal svet po mudrosti Boga, dopalo se je Bogu po bedastoči nazveščanja zveličene činiti verujuče.
22. Pokehdob i Židovi znamenja prosiju, a grki mudrost iščeju.
23. Mi pako nazveščamo Krištuša raspetoga: Židovom zadnjič spačku, poganinom pako bedastoču.
24. Istem pako pozvanem Židovom ter grkom Krištuša kakti božansku krepost i božansku mudrost.
25. Kajti kaj bedastoča Božja je, mudreša je od ljudih i kaj slabost Božja je, jakše je od ljudih.
26. Ar gledajte na vaše zvanje, bratja, pokehdob ni vnogo mudreh poleg tela, ni vnogo mogučeh, ni vnogo plemeniteh (pozvaneh).
27. Nego koja jesu bedasta pred svetom, je Bog izebral da osramoti mudre i koja su slaba pred svetom, je izebral da osramoti jaka.
28. I neplemenita pred svetom i zavržena izbira Bog i ona koja nikaj nesu, je Bog izebral da ona koja nekaj jesu, pod nikaj spravi.
29. Da se nijeden človek ne hvali vu njegovoj nazočnosti.
30. Po njem pako jeste vi vu Krištušu Ježušu, koj je bil nam za mudrost i na pravicu i na posvečenje i na otkuplenje od Boga dan. Jer 2.
31. Da kak je pisano: „Koj se diči, naj se vu Gosponu diči.“